Amos 9 - Maktub Ta Kumkajir

De a ãi tɔi takɨgang lo Bɨraɓe al

¹ M'oo Bɨraɓe duba ɗa dɔ dɨngɨr kadkarit kɨjakɔ, ɗà el an: I ndan dɔ pilieg kɨtakad girr tabitg yeen. I tetɨnd, ad son dɔ degt tube goto. M'a m'nuj ndeg deg kɨ kiyaɗɔɔ. De kɨɗa kudt kɨ ngah ɗob kãi al, de kɨɗa kudt kɨ a aj goto tɔ.

² Ke neni urɨn ɓe mbã kɨ koo kaa ne, nu la m'am la jim m'a m'hɔdɨn. Ke alɨn mbã aw teen dɔrãt kaa ne, m'a m'ad'd ɗisɨn kɨber.

³ Ke neni yan rod tasom mbalbo Karmelt kaa ne, m'a m'sahd god, na m'a m'hɔd. Ke a yan rod takum'mt girr bahbot kaa, nõbe m'a m'nda mber li kad tõd.

⁴ Ke awɨn ɓert nõ madngétadgt kaa, nu m'a m'nda mber kiyaɗɔɔ kad tɔld, m'a m'nda kumm godt kɨta ɗa majal sed, na kɨta ɗa sed maj al.

⁵ Bɨraɓe Luwah Ngekoosɨg ɔd dɔning ad nyẽ, ngendɨt tube hɔn ndo ad dɔning kɨtaagbe ɓai tit'n bah Nil a ɓain, kamla dɔning a tel kɨber gog tit bah Nil kɨ dɔning Ejipt't,

⁶ Bɨraɓe ɗa kuj lon dõ dɔrãt, na ndɨna lo kɨ dõ dɔ dɔningt, i Ngekun man kɨ bahbot, mbel kɨ dɔningt, tɔa i Bɨraɓe.

⁷ Kokɨromt ĩn tit ngan deg kɨ Etiopiat be ale? A deg kɨ Israel, kel Bɨraɓe, M'tee kɨ Israelag ko kam dɔning Ejipt't ale? M'tee kɨ Pilistiag ko Kaptor kɨ Siriag ko Kir ale?

⁸ Oon. Bɨraɓe Luwah nda kumɨn kɨdɔ kõɓet kɨmajal'n ɗan, ad i Samari. M'a m'nujakɔ dɔningt, na m'a m'nuj ngékɨɓe lo Jakob kɔ kɨtaagbe al, kel Bɨraɓe.

⁹ Kɨtɔ oon m'a m'nda mber, na ngékɨɓe lo Israel a yeen ku girrdegt tube, tit'n a sian ne nyako kɨkanj kad kuma kɨɗa so ningt.

¹⁰ Ngéɗamajalg tube ku degt lom ndɨ anan: nya kɨ to a ɔdj al, a tee dɔjt al tɔ. Deg'n non a oin ta kiyaɗɔɔt.

Israelag a ngahn majkurr lo Bɨraɓe gog ɓaitɔ

¹¹ Ndɔt'n non m'a m'un ɓe lo Dabid kɨ so nõ kɨ dõ, m'a m'ut burrolo ndogbɔrrg loa, m'a m'ɗagootɓe kij gog, m'a m'ɗaa gog tit kɨ kam ndɔgt kɨmaɗi,

¹² kɨtakad taan ndeg dɔning ndeg dɔning lo Edomag kɨ nãi kɨ girrdeg tube'n kunɨn tɔm dɔdt, kel Bɨraɓe kɨ ngeɗa nya 'nten.

¹³ Bɨraɓe elɓaitɔ an: Oon ndɔg ndɨ ɗen nõ na ngendɔɔ a i go ngeja nyakot nderbe: ngeɓa kand nduu a ɗa ɓa ɓaitɔ a ne, ngeduw kum nduu ɗe ndɔda tat Mbalbog a nden kasɨnduu kɨkij, kasɨnduu a nu dɔ doorlog tube tit bah be.

¹⁴ M'a m'tel kɨ deg lom Israel ɓe ɓert, a ɗan gootɓeg kɨ maɗi kɨ tuj kij gog. A ndɨnt. A hɔn ndɔɔ nduu, na a ãin kasɨnduu lod. A ɗan ndɔɔ, na a san nyako kɨtit.

¹⁵ M'a m'hɔd tit kag be dɔningt lod gog na a ɔrrɨnd kɔ kam dɔningt kɨ m'ad'd gog al, Kel Bɨraɓe Luwah loi.