Amos 8 - Maktub Ta Kumkajir

Amos oo nya kɨkõsɔɔ kam ndilt: Jàng kɨ ɗoosɨ kɨ kand kag kɨ mbuj

¹ Bɨraɓe Luwah ɔjɨm nya 'nten: jàng mad kɨ ɗoosɨ kɨ kand kag kɨ mbuj,

² na Luwah ndɨjem an: Amos, oo ɗi a? M'tur m'an: M'oo jàng mad kɨ ɗoosɨ kɨ kand kag kɨ mbuj. Kamla Bɨraɓe elɨm an: Ndɔ lo deg lom Israel tɨga woi mbuj tit kand kag be. M'a m'nyago majal lod kɔ gog al ta.

³ Ndɔt'n non pag kɨ kɔsɨ kam kuj kõɓet a telɨn wui kɨ kud, kel Bɨraɓe Luwah. Nin deg a ĩn ngãibe, a ũnd kɨ log paabe. Lo a to juju.

Takɨgang dɔ Israelagt i nderbe

⁴ Oon dɔ ta 'nten, ĩn ngésanya lo ngéndɔɔg tube, kɨ ngétuj de kɨdangtg:

⁵ I ndɨ elɨn anan: Kij nah a tɔi ndɔ ɗit kad kɨ ɗaw nyako loj a? Sabat a tɨga dɔkàd ɗit kad kɨ j'ɔsɨ ta damg loj kɨ ɗaw gem kɨtit kɔ a? J'a kɨ jad ngo tɔrr nya i kɨdu, na ja kɨla gat nyako dɔt; j'a kɨ gool deg kɨ nyambɔjnya kɨgoot al.

⁶ J'a kɨ ɗaw ngendo kɨ taan nar, na de kɨdangt kɨ taan sanja, J'a kɨ ɗaw bɨna nyako ho,

⁷ Bɨraɓe nda yo kɨ tɔko lo Jakob, an: Rota, kamm a oi dɔ kɨkɨɗa ku kɨlaɗadt al kɨnõt.

⁸ Kɨtɔ 'nten dɔning'n ɗan a yee. Dekɨɗen kɨ ngendɨt a hɔ ndo. Ã dɔning'n ɗan kɨtaagbe a ɓai tit bah be, dɔning'n ɗan a ɓai kamla a tel kɨber gog tit bah Nil kɨ dɔning Ejipt't.

⁹ Nya a ɗa nya kam ndɔt'n non, kel Bɨraɓe Luwah. M'a mad kàd kɨɗa dan ɓet ud. M'a mad til diw dan kàda.

¹⁰ M'a mad ɗa nahg losɨ telɨn ndo kɨhɔ, pag losɨ tube a telɨn pa nõg. M'a mad deg dɔn ɓod kɨ kub hɔndo, m'a mad ngɨsen dɔ dekɨɗen, m'a mad deg hɔn ndo tit'n a hɔn ne ndo ngon kɨkal kɨɗabe na dɔboia a i ndɔ kɨkat bang.

¹¹ Oon ndɔg ndɨ ɗen, kel Bɨraɓe Luwah, Lon m'a m'la kɨ ɓoo dɔ dɔningt'n ɗan. A i ɓoo nyasa ke nyakãi al, na a i ɓoo koo dɔ ta lo Bɨraɓe.

¹² Deg a awɨn kɨ njad dõ ɓai ko bahbot mad mbã teen bahbot mad, a ãin kɨ yo kɨ nẽ, a awɨn ho a telɨn ho, sahn ta lo Bɨraɓe na a ngahn al.

¹³ Ndɔt'n non ngan kɨdẽ kɨmandg ngãi kɨ ngan kɨbasag rod a oi yelel kɨta kɨnda man.

¹⁴ Kɨ deg'n ndɨ ndan yo kɨtakul majal lo Samari, ad i yo ngon mang lɔr, ndɨ elɨn anan: Ɓebo Dan. Kɨ yo ngon mang lɔr loi ndɨ kɨ dɔn dõ. Ngendayo kɨ ɗob ɗa yo lo ngendɨ Beer Seba son na kɨ ɓain al.