Amos 7 - Maktub Ta Kumkajir

Amos oo nyag kɨmita kam ndilt: Kɨbetg kɨ horr kɨ kɨllambɔj nya

¹ Kamla Bɨraɓe Luwah ɔjɨm nya 'nten: Ndɨ ɗa kɨbetg kad teen kaglot'n mũg ɓan kɨmbool gog, ad i mbi mũg kɨ ɓa gog, lon jan ne mũ lo ngar tɨga woi.

² Lon kɨbetg san mũ kɨ ɓa dɔningt loj tube ye, M'el m'an: A. Bɨraɓe Luwah, m'kɔi kɨ i nyàgo kɔ. Titbãi ngaka Jakob a ɗan bijir a? Ĩn deg kɨ tẽbe.

³ Bɨraɓe nya ta ɗa nya'n non, an: An: Nya'n non a ɗa nya al.

⁴ Bɨraɓe Luwah ɔjɨm nya 'nten tɔ: Bɨraɓe Luwah la mber takɨgang lon kɨgo ɗob horr Horr'n non ad bahbo ii ndã, õ dɔning loj tɔ.

⁵ M'el m'an: A. Bɨraɓe Luwah, m'kɔi kɨ i nya ta. Titbãi i ngaka Jakob a ɗan bijir a? Ĩn deg kɨ tẽbe.

⁶ Bɨraɓe nya ta ɗa nya'n non. Nya'n non a ɗa nya al.

⁷ Nya'n Bɨraɓe ɔj kad m'oo tɔ laten: Bɨraɓe ɗa dõ kad ndogbɔrrt kɨla kɔjnya jint,

⁸ Bɨraɓe elɨm an: Amos, oo ɗi a? M'tur m'an: M'oo nya kɔjnya Bɨraɓe elɨm tɔ an: M'nõl nya 'nten m'oo: Girrdeg lom i tit ndogbɔrr kɨ ɗa kɨɗing al Oo maj m'a m'nda kɨla kɔjnya mad dan degt lom Israel, kad m'nãdɨn m'oon denesew lod. M'a m'nyago majal lod kɔ gog al.

⁹ Doorlog lo ngaka Isaak a telɨn gootlog, log kɨjaɓat lo Israel a nujɨn, m'a m'ɓai m'ndoor ngaka Jeroboam.

Amasia tuɓa Amos kɔ Betelt

¹⁰ Kamla Amasia ngejamosɨkadkari lo yo ngon mang lɔr kɨ Betel, la kɨ ro Jeroboamt ngar kɨ Israel, an: Amos la tan ber ndoorɨn ku ngan Israelt. Deg kɨ dɔningt 'nten asɨn ndɨdɔt kɨ tag loa tube al.

¹¹ Kɨtɔ Amos el titbe an: Jeroboam a oi ta kiyaɗɔɔt, kari na Israelag a awɨn ɓert, sãi kɨ dɔning lod.

¹² Na Amasia el Amos an: Ngekoo nyakamndilt, aw kɔ. Ãi kɨ dɔning Judat, i sanya nu, elta kɨ ta Luwaht nu tɔ.

¹³ Na ot kelta kɨ ta Luwaht Betelt kɨta i lo kɨjaɓat'n ngar ɔsɨ dɔn ber tit, i kuj loa tɔ.

¹⁴ Kamla Amos tur Amasia an: Mĩ ngekelta kɨ ta Luwaht al, ke ngon de kɨ ngekelta kɨ ta Luwaht, na mĩ ngengom nyakulg, mĩ ngekoogo kag ɓɔlg.

¹⁵ Bɨraɓe ɔrrɨm go ɓut nyakult, na Bɨraɓe elɨm an: Aw el deg lom Israel ta kɨ tamt.

¹⁶ Kɨtɔ 'nten tajigla oo dɔ ta lo Bɨraɓe. Ĩ Amasia elɨm ta 'nten: Ot kelta kɨ ta Luwaht kɨ ndoor Israel, ot kelta kɨ ndoorɨngékɨɓe lo Isaak.

¹⁷ Kɨtɔ 'nten Bɨraɓe el an: Nẽi a i ngeɗakaya kam ɓebot'n ɗan, ngani kɨdɨngãg kɨ kɨdẽg a son ta kiyaɗɔɔt, a lan kɨla gangɨn ne dɔning kegɨn deg, loi kɨ goɗob kɔj kɨ kɨla, na ĩ kɨdɔi, a i oi.