Amos 6 - Maktub Ta Kumkajir

Nujkɔ kɨ a tee dɔ Israelagt

¹ Beto lo deg kɨ ngendɨ kari lom kam ɓebo Siõt, kɨ deg kɨ ngendɨ lom dɔ mbalbo Samarit. Ad i mbaiɓeg lo girrdeg kɨ kɨdasa ku girrdegt kɨdangdang'n, ngékɨɓe lo Israel ndɨ ɗen kɨrodt.

² I tɔi awɨn ɓebo Kalne, na oon. I ɓain nõbe awɨn mbã ɓebo Hamat. Kamla awɨn ɓebo Gat ro Pilistiagt. Kõɓeg'n non majɨn tɔi kõɓeg kɨ Juda kɨ kɨ Israel a? Dɔning lod tat tɔi dɔning losɨ oo?

³ I ndɨ ɔjɨn ta kamsɨt kad ɔsɨn ndɔ kɨmajal kɨgog, na adɨn nyaɗa kɨgo lo ngetɔgt ɗe dɔ degt

⁴ Beto lo deg kɨ ngéto dɔ tɨragt kɨ ɗan kɨ ngang ked, to ndajɨn rod dɔ tɨra todgt, na san ngan batg kɨ kɔt kam ɓut batgt, kɨ ngan mangg kɨ rod bo lublub kam kuj kuldt.

⁵ Ndɨ ɔsɨn pag kɨpãbe kɨ ndɨ kund, ndɨ ɗan nyakɔsɨpag kɨkij, tit'n Dabid ɗan maɗi.

⁶ Ndɨ ãin kasɨnduu kam ngogt, ndɨ wurɨn rod kɨ yib kɨmaj tɔ, na hɔn ndo kɨta tuj kɨ tee dɔ ngaka Jojept al.

⁷ Kɨtɔ 'nten tajigla a ĩn kɨdasa kad awɨn sed kam ɓe ɓert, na ronel lo ngékoomajrog'n non a goto.

⁸ Bɨraɓe Luwah nda yo, Bɨraɓe Luwah Ngekoosɨg an: M'un kumm kɔ dɔ dɔngangt lo Jakob, m'mbet kuj kõɓeg loa, m'la ɓebo Samari kɨ nyag kɨ kamt tube ji madngétagt.

⁹ Ĩla deg nãin asɨ kɨlah kam kujt kɨkɨɗa a ne, a oin tu.

¹⁰ Lon de mad a ɗe nat kɨ ngelahorr nin, kad n'ɔi kɨngag kuju teen kɨtɨga a ne, a ndɨje de kɨkeme an: De mad i nõ nat sei a? De'n non a tur an: I ndɨ tai mbo. I kaglo kun tɔ Bɨraɓe al ta.

¹¹ Kɨtɔ oo. Bɨraɓe ndamber, kamla a tetɨn kuj kɨbo ad nuj kɔ, a tɔn kuj kɨdu kɔsɨkɔsɨ tɔ.

¹² Sɨndag a ãin ngɔd dɔ mbanggt a? De a ndɔɔ dɔ mbanggt kɨ mangg a? Be al, na i mbelɨn takɨgang kɨgoɗobat kɨ kĩ tɔl de, i mbelɨn kand nyaɗa kɨdenesew kɨ nya kɨ at bangt tit kag mband be. Kɨtɔɗi a?

¹³ I ndɨ ɗan ronel kɨta nya kɨpãbe, anan: I kɨtakul ngang loj jĩ kɨɓe la kɨ ngahn tɔg 'nten ale?

¹⁴ Ĩn ngékɨɓe lo Israel, oon maj. Bɨraɓe Luwah Ngekoosɨg el an: M'a m'ɓai kɨ girrdeg madg kad ɗɔɔn sesɨ ko ɓebo Hamat't ko ɓodo mbã kɨ bah Arabat ko dɔɔ.