Amos 5 - Maktub Ta Kumkajir

Luwah kun Israelag kad telɨn kɨront

¹ Ĩn deg kɨ Israel i nelɨn mbisɨ oon ne dɔ ta 'nten kɨ pa nõ hɔndo'n m'ndɨ m'ɔsɨ kɨtɔsɨ nõ.

² Israel i tit ngomand kɨ koi so, na asɨ ɓai dõ, nyana kɨnõbe dɔningt loa, de mad kad una kɨ dõ goto.

³ Kɨtɔ titbe Bɨraɓe Luwah elɨn an: Ɓebo mad a la kɨ dekɨdɨngãg dub ta ɗɔɔt na a telɨn kɨ ɓe ɓu koon; dekɨdɨngãg ɓu a teen kam ɓebot mad, a awɨn ɗɔɔ, ngon ɓe mad a la kɨ dekɨdɨngã ɓu ta ɗɔɔ na a telɨn kɨ ɓe lo Israel kɨlah koon.

⁴ Kɨtɔ Bɨraɓe el ngékɨɓe lo Israel titbe: I sahmɨn a ne, a i ndɨn kɨ dɔsɨ dõ.

⁵ Ot sahmɨn kam kuj ndub Luwah kɨ Betel. Ot kawɨn kam kuj ndub Luwaht kɨ Gilgal. Ot tɔin dɔ ɗob kawɨn kam kuj ndub Luwaht kɨ Beer Seba. Kɨtɔ rota, deg kɨ Gilgal kɨtaagbe a awɨn ɓer, deg kɨ Betel tɔ a telɨn nya kɨtuj.

⁶ I sahn Bɨraɓe a ne, a i ndɨn kɨ dɔsɨ dõ Na ɓeta ndu bip tit horr be dan ngaka Jojept ad horr'n non õ nya kɨ Betelt mugɨj na de kɨ ngetɔla goto

⁷ Ĩn ngétuj takɨgang kɨgoɗobat kad tel nya kɨkad kam deg at bang, ĩn ngéɓa dɔ nyaɗa kɨdenesew kɨ njasɨ.

⁸ Bɨraɓe ĩla i ngeɗa ɓut kɨmẽdeg kɨ tɔd i Ngamand kɨ Bisɨ tuɓa tal, I ngembel til kɨ diw kirir. I ngembel lokɨkàda kad tel lo kɨ diw til. I ngekun man kɨ bahbokat't, kad mbel kɨ dɔningt; tɔa i Bɨraɓe.

⁹ A ad nujkɔ tee pat dɔ degt kɨ tɔgd i ngãi, a ad nujkɔ ɗe dɔ kuj ngom dɔ ɓet tɔ.

¹⁰ Ndɨ ɔsɨn ta de ngendangd lo gangtat, na unɨn kumd kɔ dɔ det kɨ ngekel rota.

¹¹ Kɨtɔ 'nten, tit kan hã i ndɨ i ɓan ne dɔ de kɨdangt mbujmbuj kɨber, na i ndɨ taan nyako lo kadkarit kɨ lo ngetɔgt, i ndɨ ɗan kujg kɨ mbalg kɨ tɔsɨ ye, a i ndɨn kamdt al. I hɔn ndɔɔ nduug kɨmaj ngãi, na a i ãin kasɨnduu al.

¹² Kɨtɔ m'ger tɔidɔtag losɨ ĩn ngãi, majalg losɨ bɨlan kɨdɔtdɔt tɔ, i ndɨ dan kum deg kɨdenesew ndo, i ndɨ i taan kadkari kut dɔ ta, i ndɨ i tujɨn ta lo ngendo lo gangtat.

¹³ Kɨtɔ 'nten la de'n i ngegoosɨ a ne, a ndɨn tan mbo kaglot'n non kɨta i kaglo kɨmajal.

¹⁴ I sahn go maj, na majal al. Kɨtakad i ndɨn kɨ dɔsɨ dõ. Titbe tɔ Bɨraɓe Luwah Ngekoosɨg a i nat sesɨ, tit'n i ndɨ elɨn ne nõ.

¹⁵ I mbetɨn majal, na i ndigɨn maj. Adɨn nyaɗa kɨdenesew õɓe lo gangtat. Maj a ne, Bɨraɓe Luwah Ngekoosɨg a oo kumtondo lo ndeg ngaka Jojep kɨ nãi.

¹⁶ Kɨtɔ 'nten, Bɨraɓe Luwah Ngekoosɨg, Bɨraɓe an: Deg a nõn kam natlogt tube, a elɨn anan: Beto. Beto dɔ ɗobgt tube. A kunɨn ngéndɔɔg kad ɗe hɔn ndo, a kunɨn ngégoosɨ pa nõ kad ɗe nõn.

¹⁷ Deg a nõn kam ndɔɔ nduugt tube, kɨta m'a m'tɔi dãsɨt, kel Bɨraɓe.

Ndɔ lo Bɨraɓe

¹⁸ Beto losɨ ĩn kɨ i ngégeen ndɔ lo Bɨraɓe. Kɨtɔɗi i geen ne ndɔ lo Bɨraɓe a? A i ndɔ til, na i ndɔ kunj al.

¹⁹ A i tit de'n ãi tubo na so ta dã urst, ke and kuju, na nda jin kad bɔrrt kad ndɨnan ron a ne, li dõa.

²⁰ Ndɔ lo Bɨraɓe, a i kunj a? A i til kɨ diw kirir kanj lokar

²¹ M'mbet ɗa nahg losɨ, m'kid'd, na m'ngaa ronel dɔ kawnagt losɨ al.

²² Ke neni i admɨn kadkarig kɨlahorrt kɨɗaibe kɨ kadkari nduj nyakog kaa, m'oo majd al. M'ɗa ronel dɔ kadkarigt kɨkad kamsɔllom kɨ dãg losɨ kɨ boon mbulmbul al tɔ.

²³ I ɗan sãi m'ndig ko dɔ ndi pa losɨ al. M'a m'oo dɔ ndi kɨndehg losɨ al tɔ.

²⁴ Kɨ adɨn nyaɗa kɨgoɗobat ãi tit man bah be, nyaɗa kɨdenesew to tit bah kɨ nũ kanj nya ta.

²⁵ Ĩn ngékɨɓe lo Israel, ɓal dɔsɔɔ kam dɨlalot ye, i lan kadkarig kɨjakɔ kɨ kadkarig kɨ dang dang admɨn e?

²⁶ Tajigla i ton kujkub lo ngar losɨ Sikut kɨ kɨmẽ yo losɨ Kɨyun, I ɗan ɓakumta nyag kɨtɔsɨ.

²⁷ Mĩ tɔ m'a m'aw sesɨ ɓert gid ɓebo Damasɨt nu, kel Bɨraɓe kɨ tɔa i Luwah Ngekoosɨg.