Amos 3 - Maktub Ta Kumkajir

Kɨla lo de kɨ ngekelta kɨ ta Luwaht

¹ Ĩn deg kɨ Israelt, oon dɔ ta'n Bɨraɓe ndɨ el dɔsɨt, ad i dɔ girr Israelagt tube'n m'tee sesɨ dɔning Ejipt't kɨtɨga.

² Ĩn kɨ kɨɗasɨ be la m'mbedsɨ ku girrdegt kɨ dɔningt tube, kɨta 'nten la m'a m'nda m'ɔjsɨn kɨta ɗagootal losɨ tube.

³ Deg joo a ndian nat, kanj kad kɔd so go nat e?

⁴ Tubo a ko kam kùt, kanj hɔ dã a? Ngon tubo a ko kam holɓent, kanj hɔ nya a?

⁵ Yel a so dɔningt kam gum kɨ ya kanj nya kamt e? Ke gum a kɨla kanj hɔ nya a?

⁶ Tow ɗɔɔ a ko kam ɓebot, kanj kad deg ɓoolɨn e? Tuj a so dɔ ɓebot mad, kanj kad Bɨraɓe i ngela kɨ tujɨn non e?

⁷ Rota, Bɨraɓe Luwah a ɗa nya mad, kanj kad tee dɔ takɨmund lon ad ɓerg lon, ngékelta kɨ tant, gerɨn girra al.

⁸ Lon tubo ko a ne, nõ a ɓool al a? Bɨraɓe Luwah elta a ne, nõ a mbet kelta kɨ taat a?

Tuj kɨ a so dɔ dɔning Samarit

⁹ I lan mberta 'nten kam kuj kõɓegt kɨ ɓebo Asdod, kɨ kam kuj kõɓegt kɨ dɔning Ejipt, anan: I kawɨn na dɔ mbalbot kɨ Samari. Oon burɓukɨt kɨbobe i nõ. Oon dakumndɔɔ kɨbobe kɨ kamat tɔ.

¹⁰ Bɨraɓe el an: Deg kɨ Samari gerɨn ɗa nya kɨgoɗobat al, ndɨ mbõn nyag'taan ji degt kɨ lo ngetɔgt kɨ deg kɨ ngéɓoog kam kuj kõɓegt lod.

¹¹ Kɨtɔ 'nten, Bɨraɓe Luwah elɨn an: Ĩ Samari, Madngétag a gugɨn dɔi, a tujɨn ndogbɔrr loi a taan tɔgi, na a tirɨn nyag kɨ kam kuj kõɓegt loi pur.

¹² Bɨraɓe el an: Tit'n ngekulnya a n'arɨn nja nyakul lon joo kɨ gaj mbia kɨɗa taa ji tubot ye, titbe tɔ la, Israelg'n ndɨn dɔning Samarit, na ton kam tɨra tot kɨ nya kɨ sɔlom lom to oon maja ye, a narɨnd taand ji madngétagt ho ye.

¹³ Oon dɔ. I man naj dɔ ngaka Jakobt, kel Bɨraɓe Luwah, Luwah Ngekoosɨg:

¹⁴ Ndɔt'n m'a m'nda m'ɔj Israelag kɨta tɔidɔtag lod, m'a m'nuj dɨngɨr kadkarig kɨ Betel, na gajg kɨdɔ dɨngɨr kadkarit a tet son ber.

¹⁵ Kujg kɨ deg a ndɨnt ɓala kɨ kujg kɨ deg a ndɨnt ɓara m'a m'tɔsɨ m'tɨlad, Kujg kɨ ɗan kɨ ngang ked a nujɨn, na kuj kɨbobog a goton, kel Bɨraɓe.