Amos 2 - Maktub Ta Kumkajir

¹ Bɨraɓe el an: Kõɓe kɨ Moab tɔi dɔ ta nja mɨta ke nja sɔɔ, kɨta 'nten m'a m'ɔrrɨn takɨgang dɔat kɔ al, kɨta lahor kɨnga ngar kɨ Edom ad tel buhoor.

² Kɨtɔ 'nten m'a m'lan horr dɔ dɔning Moabt, na a õ kuj kõɓeg kɨ ɓebo Kerijot mugɨj. Deg kɨ Moab a oin kɨ kɨse kɨ ko kɨ mbiting kɨ kah tow brunj kɨ ko.

³ M'a m'nuj ngar lod dandt kɔ, m'a m'tɔl mbaiɓeg lod nat sed, kel Bɨraɓe.

⁴ Bɨraɓe el an: Kõɓe kɨ Juda tɔi dɔ ta nja mɨta ke nja sɔɔ, kɨta 'nten m'a m'ɔrrɨn takɨgang dɔat kɔ al, kɨta deg kɨ Juda mbetɨn ta lo Bɨraɓe, ngomɨn go mberkɨndag loa al tɔ. Yog'n adɨn bɔwdg son mut ye, goolɨnd tɔ.

⁵ M'a m'lahorr dɔ dɔning Judat, na a õ kuj kõɓeg kɨ ɓebo Jerusalem mugɨj.

Takɨgang dɔ Israelagt

⁶ Bɨraɓe el an: Kõɓe kɨ Israel tɔi dɔ ta nja mɨta ke nja sɔɔ, kɨta 'nten m'a m'ɔrrɨn takɨgang dɔat kɔ al, kɨta deg kɨ Israel ɗawɨn de kɨdenesew taan ne nar, ɗawɨn de kɨdangt tɔ taan ne sanja.

⁷ Ndɨ ɓan dɔ ngéndog kɨber mbujmbuj kɨ but, ndɨ ɔsɨn ngang kɔ dɔ nyagt kɨ sumbad. Ngon kɨdɨngã kɨ bɔwɨn tujoo ndɨ awɨn ro ngon kɨdẽt kɨkɨɗa, ad tujɨn ne tɔm kɨkunjɗang.

⁸ Ndɨ tõn nderbe kad dɨngɨr kadkarit kɨɗen dɔ kubgt kɨ tɨnan ne nya kam kujgt lo yog lod. Ndɨ ãin kasɨnduu kɨ ndugon kɨ nar lo deg'n gangɨn lamand dɔdt.

⁹ Na mĩ m'nuj Amoriag kɔ nõ Israelagt. Amoriag ĩn deg kɨ ngal tit kag sedɨr, ngangɨn tit kag dil be. M'tuj kand'd kɨ dõ kɨ ngɨrrad kɨ ningt.

¹⁰ Na mĩ m'tee sesɨ dɔning Ejipt't kɨtɨga, m'ɔrrsɨ ta ɗob ɓal dɔsɔɔ kam dɨlalot, kad m'adsɨ dɔning lo Amoriag,

¹¹ M'ɓai kɨ deg madg ku ngansɨgt kad ĩn ngékelta kɨ ta Luwaht, m'ɓai kɨ deg madg ku basagt losɨ tɔ kad ĩn Najiriag, kel Bɨraɓe.

¹² Na adɨn Najiriag ãin kasɨnduu, i ndan mber ngékelta kɨ ta Luwaht anan: Ot kelɨn ta.

¹³ Oon m'a m'rigj dɔsɨ, tit'n pusɨ mang kɨ ɗoosɨ kɨ nyako a rigɨjɨn dɔ nyag kɨ ningt.

¹⁴ De kɨ ngekãi ngɔd ngãi kaa, ngɔd a aja al. De kɨ ngang ngãi kaa, ngang loa a ɗa sia al. Gõɗɔɔ a aj ron al tɔ.

¹⁵ De kɨ nda kɨrã dɔ gãt a ɗa loɗant al, de kɨ ɓa nja ngɔd a ãi aj ron al, Ngekal sɨnda a teet al tɔ.

¹⁶ De'n kama misɨmisɨ ku gõɗɔɔgt kaa, a ãi kɨ ro kɨkari ndɔt'n non, kel Bɨraɓe.