Aje 1 - Maktub Ta Kumkajir

Bɨraɓe kun deg kad ɗan kuj lon kij gog

¹ Ɓal ngar Darius kɨ ngekõjoo kɨ nah kɨkõkɨbojidet kɨ ndɔ kɨdasa lo nah'n non ye ta lo Bɨraɓe ɗe kɨtakul Aje, ngekelta kɨta Luwaht. Kɨ ro Jorobabel ngon Salatiel ngekõɓe kɨ Juda. Kɨ kɨro Jojue ngon Josadak, bɨradɔ ngejanyamosɨ an:

² Titbe kel Bɨraɓe Ngekoosɨg; Deg'n ɗan elɨn anan: Kaglo ɗago kuj lo Bɨraɓe asɨ al ɓaitɔ.

³ Kɨtɔ 'nten ta lo Bɨraɓe ɗe kɨtakul Aje, ngekelta kɨta Luwaht an:

⁴ I kaglo kɨtɔsɨ kad i ndɨn kam kujgt losɨ kɨ ɗan kamd kɨ plapõd na kuj'n ɗan tã i kɨtuj a?

⁵ Kɨtɔ 'nten tajigla, kel Bɨraɓe Ngekoosɨg, i gan kamsɨ dɔ nyaɗasɨt maj.

⁶ I duwɨn nya ngãi na i tetɨn tẽbe. I san nya ngãi na i ndanɨn al. I ãin nyakãi na a i tɔlɨn kõna al. I lan kub na rosɨ tɨnga al: nyabaji lo ngeɗakɨla'n hã ngah ye, la kam ɓɔlt kɨmbut.

⁷ Titbe kel Bɨraɓe Ngekoosɨg: I gan kamsɨ dɔ nyaɗasɨt maj,

⁸ Awɨn dɔ mbalbot i gan kag, i ɗen i ɗan ne kuj'n ɗan gog kɨtakad m'ngaa ronel tit na kɨ m'tee hɔi kam kunjɨmt kɨɗangeɗeng, kel Bɨraɓe.

⁹ I ndan kamsɨ dɔ nya ngaht kɨngãi na oon, i ngahn tẽbe na lon i awɨn ne be ye, m'toa pu kɨ ko kɨtamt ad goto. M'ɗa titbe kɨta ɗi a? Kel Bɨraɓe Ngekoosɨg. Kɨta kuj lom kɨtuj na ĩn taa, dekɨɗen kusɨt ndɨ oo go kuj lon kɨkɔsɨdɔn,

¹⁰ Kɨtɔ 'nten dɔrã ɔgsɨ tal na dɔning ɔg kandɨn.

¹¹ Na m'kun ndii m'ada hɔ la dɔ dɔningt, kɨ dɔ mbalbogt, dɔ nyakot, dɔ man nduut kɨkij, dɔ yibt. Dɔ kand nya kɨ tee dɔningt, dɔ degt kɨ dãg kɨ kɨlaɗa ji tube.

Deg telɨn rod go tat lo Bɨraɓe

¹² Kamla Jorobabel ngon Salatiel kɨ Jojue ngon Josadak bɨradɔ ngejanyamosɨ, kɨ ndeg deg tube telɨn rod go tat lo Bɨraɓe Luwah lod kɨ tag lo Aje ngekelta kɨta Luwaht tit'n Bɨraɓe Luwah lod laan ad deg ɓoolɨn nõ Bɨraɓet.

¹³ Kamla Aje, ngombangkɨla lo Bɨraɓe, el deg ta kɨta Luwaht, an: Mĩ nat sesɨ, kel Bɨraɓe.

¹⁴ Bɨraɓe tɔsɨ ndil Jorobabel ngon Salatiel. Nge kõɓe kɨ Juda, kɨ ndil Jojue ngon Josadak, bɨradɔ ngejanyamosɨ kɨ ndil ndeg deg tube ndool. Ĩgɨn non to ɗen, ɗan kɨla kuj lo Bɨraɓe Ngekoosɨg, Luwah lod,

¹⁵ dɔ ndɔt kɨdɔjoo gidaisɔɔ lo nah kɨkõkɨbojidet kɨ ɓal kɨkõjoo lo ngar Darius.