3 Jã 1 - Maktub Ta Kumkajir

Lapia

¹ Mĩ kɨbo lo ngékawna, m'ndang maktub 'nten mad kɨbo lo ngékawna Gaius kɨ ngetar lom kɨ jeje.

² Ngetar lom, m'ndig kad maj urri kam nyagt tube, kɨ ĩ kɨ lapia kam dãroit, tit'n roi kɨ keme ĩn kɨmajkur ye be.

³ M'ɗa ronel ngãi, lon ngankõg ɗe manaj dɔ rotat'n i kamit, kɨ ɗob rota'n i ndulo go nõ.

⁴ Lon m'oo hoi nganɨm a ndian kam rotat ye, nya kɨ adɨm ronel tɔia goto.

Jã hit Gaius kɨta kɨlaɗaa kɨmaj

⁵ Ngetar lom, i ndɨ i ɗamaj kɨ ngankõg mbã mbahg kaa ne, i ndɨ oo god ye, i kɨla kɨro la i ndɨ ɗa ye.

⁶ Deg'n non manaj dɔ tart loi nõ ngékawnat. Maj kad i ɗa sed dɔ kaw mbaht lod tit'n Luwah ndigɨn.

⁷ I kɨtatɔ Jeju Krist la deg'n non awɨn ne ye, ndɨ taan nya mad ji degt'n gerɨn Luwah al al.

⁸ Kɨtɔ 'nten, maj kad j'oo go deg kɨ titbe kɨtakad jĩn ngéɗakɨla nat sed kam rotat.

Ta lo Diotrep kɨ Demetrus

⁹ M'ndang ngon maktub tẽbe mad ngékawna kete woi, na Diotrep ndig koo dɔ ta lom al, kɨta ndig kad nĩ kɨbo dɔ ngékawnat.

¹⁰ Kɨtɔ 'nten, lon m'a m'aw rosɨt ye, m'a m'ɔrrsɨ girr nyag kɨmajal n'ɗa ye nõ ngékawnat, kɨ tagkɨbal'n ndɨ el sẽ dɔjt. Ĩn non kaa asɨ al ɓaitɔ, na mbet hɔ ngankõg kɨ mbahg kɨ ront, na deg'n ndigɨn hɔ ngankõg kɨ rodt ye, ndɨ ɔgd dɔ, na ndɨ tuɓad kɔ kam ngékawnat tɔ.

¹¹ Ngetar lom, ot ndaj kɨlaɗa kɨmajal. Na i ndaj kɨlaɗa kɨmaj tã. De'n ndɨ ɗa nya kɨmaj a ne, i ngon Luwah; na de'n ndɨ ɗa nya kɨmajal a ne, de'n non ger Luwah al bat.

¹² Deg tube ndɨ manaj dɔ Demetrust, anan i de kɨmaj, mbã Rota ĩ kɨɓe kɨdɔn ndɨ elta kɨmaj dɔat. Jĩ kaa ne, ndɨ kɨ manaj dɔ Demetrust kad i de kɨro.

Ta kɨ dɔboit

¹³ M'aw kɨ tag ngãibe kad m'ndang m'adsɨ, na m'ndig kad m'ndang kam maktubt al.

¹⁴ M'nda kammt kad kɨ m'ooi kam kaglot kɨ tẽbe lon m'a m'aw roit ye, j'a kɨ j'el na ta kɨ taj.

¹⁵ Kɨ kam kɨsokɨber lo Luwah i nat sei. Namig tube ɗain lapia, m'kɔi kad i ɗa lapia namjg kɨɗa kɨɗa tube, dekɨɗen kɨ tɔa adɨm.