2 Timote 4 - Maktub Ta Kumkajir

I la mber ta

¹ Nya'n m'ndɨ m'ndai mbera kɨ tɔgɨm nõ Luwaht, kɨ nõ Jeju Krist'tn a ɗe gangta dɔ ngékumkajɨrgt kɨ ngékoi lon a teen hɔi kɨ kõɓe lon la ten:

² Kɨ i la mber ta lo Luwah, i hɔtɔgiba kam kɨla la mber tat 'nten kam kaglot kɨmaj kɨ kaglo kɨmajal. Sumba kad deg gerɨn ɗagoot al lod, i ndángd, i ɗa sed kad awɨn kɨ ketekete kam kadkam Luwaht, i ndood kɨ ndɨdɔt kɨ kasɨnatap.

³ Kɨtɔ kaglo mad a ɗe nõ, deg a ndigɨn koo dɔ nyandoo kɨjaraw al, na kɨgo nyurkõgt lod kɨ kɔsɨ dɔd, a kawɨn ne ngéndoo deg'n a elɨnd nyag'n ndigɨn koo dɔ.

⁴ A unɨn mbid kɔ dɔ rotat, a telɨn rod go sukɨdagt.

⁵ Na ĩ, majkad i ndɨ kɨ kum kɨ jaroi kam nyagt tube, i hɔtɔgiba kamkõt, i ɗa kɨla lo ngelamber hoita kɨmaj, i tɔlkon kɨlaɓer'n sumba kad i ɗa ad Luwah nõ.

⁶ Mĩ taa ne, ndɔ asɨ woi kad m'oi. Tajigla a tɔlmɨn tit kadkari nyakãi'n deg a mbelɨn kɔ adɨn Luwah be.

⁷ M'ɗɔɔ ɗɔɔ kɨmaj, m'ãi ngɔd m'gug dɔ bang woi, m'ngomgo kadkam Luwah maj.

⁸ Nãi nya kɨɗabe, i jɔg lo ngétetɗɔɔ'n Bɨraɓe ngegangta kɨgoɗobat a adɨm kam ndɔt kɨ nu nõ, a adɨm mĩ kɨ kɨɗambe al, na a ad deg tube'n ndɨ ngoon, kam tart, ndɔ teea hɔi.

Hoitag kɨ dang dang

⁹ I sah ɗob kad i ɗe romt kanangbe.

¹⁰ Demas tĩ nyam kɔ kɨta ndɨ tar dunia ngen ten ngãibe ad aw ɓebot kɨ Tesalonik. Kreskes aw dɔning Galatit, Tit aw Dalmatia.

¹¹ Luk kɨ kɨɗanbe la i nat sem ye. Un Mark i ɗen sia, kɨta asɨ kad ɗa sem dɔ kɨlat'n m'ndɨ m'ɗa.

¹² Na Tisik taa, m'laa ɓebot kɨ Epesɨ.

¹³ Lon a i ɗe a ne, un kubji'n hã m'nya kɨ Troast ro Karpust i ɗen. Ɔi maktubg, na kɨbo tɔi, i ɗe kɨ ndarrg'n ndangɨn nya tit.

¹⁴ Alegjandɨr kɨ kɔd ko nya ɗa sem nyag kɨmajal ngãi, Bɨraɓe a baa kɨgo kɨlaɗaagt.

¹⁵ Oo go roi maj dɔ det'n non. Kɨtɔ mbet ta'n kɨ j'el nõ.

¹⁶ Lon m'ɗa m'orrɨn ta dɔmt nõ ngekõɓet dasa nõ ye, de kɨ ɗa sem dɔ tat goto, na deg tube tĩ nyàmɨn kɔ. M'kɔ Luwah kad tɨda majal 'nten kɨdɔdt al.

¹⁷ Na Bɨraɓe ɗa kadɨmt, ɗa adɨm tɔg. Kɨtɔ 'nten m'asɨn la mber Hoita kɨmaj tube kɨtakad mad girrdeg kɨ dang dang tube oon dɔ. Na Bɨraɓe ajɨm ta tubo ndat tɔ.

¹⁸ Bɨraɓe a ajɨm kam nyat kɨmajal kɨɗen, a ngomɨm lapia mbã m'tee kõɓet loa kɨ dõ dɔrãt, kɔsɨgon i kɨ dɔat mbã kɨ kohgt lo kohg. Amin.

Lapia kɨ dɔboit

¹⁹ I ɗa lapia Prisil kɨ Akilas kɨ ngékɨɓe lo Onesipor adɨm.

²⁰ Erast nãi kɨ ɓebot kɨ Korent. M'nya Tropim kam ɓebot kɨ Mile kɨta mõi ɗaa.

²¹ I sah ɗob kad i ɗe kete nõ ɓart kɨkud. Ebulus, kɨ Pudes kɨ Linus kɨ Klodia kɨ ngankõ tube ɗain lapia.

²² Kɨ Bɨraɓe ndɨ nat sei. Kɨ majkurr lo Luwah i nat sesɨ tube.