2 Timote 1 - Maktub Ta Kumkajir

¹ Mĩ Pol, ngombangkɨla lo Jeju Krist kɨgo ndigt lo Luwah, kad m'la mber kumkajir'n Luwah unɨn kɔn adj, ĩn jĩn ne kɨtakul roj kɨndanat kɨɗa kɨ Krist Jeju.

² M'ndang maktub 'nten mad ngonɨm Timote kɨ ngetar lom. Kɨ Luwah kɨ Bɔw, kɨ Krist Jeju kɨ Bɨraɓe loj adi'n majkurr kɨ kookumtondo, kɨ kam kɨsokɨber.

Pol ɗa mersi Luwah

³ M'ndɨ m'ɗa mersi Luwah'n m'ndɨ m'ɗa kɨla nduba kɨ ta kɨ kammt kɨjanjoi tit'n kaamg kɨ maɗi ɗan ne. M'ndɨ m'ɗaa mersi kɨta m'ndɨ m'ga kamm dɔit ndɔ ho, kàda ho kɨkanj nya ta, lon m'ndɨ m'elɨn ta kɨ Luwah.

⁴ Lon m'ga kamm dɔ man nõt loi ye, ndo kooi ndɨ toom kɨtakad m'ɗan ronel ngãibe.

⁵ M'ga kamm dɔ kadkam Luwaht'n i kɨkanj ndokum kamit, kadkam Luwah 'nten i kam kaai Loist dasa kɨ kam kõi Enist. M'ger ɓet kadkam 'nten i kamit tɔ ho.

⁶ Kɨtɔ 'nten, m'ndɨ mad i ga kami dɔ kadkarit kɨgo ndilt'n Luwah adi, ĩn i kamit lon m'ndan jim dɔit. Maj kad i tɔsɨ kadkari'n non kamit i ndool.

⁷ Kɨtɔ Ndilɨn Luwah adj i Ndil ɓool kum de al, na Ndila ndɨ ɗoosɨj kɨ tɔg, kɨ tar, kɨ terr.

⁸ Kɨtɔ 'nten ot kad rosɔl ɔgi dɔ kelta lo Bɨraɓe loj kɨ tɨga wakɨsɨ. Ot kad roi sɔli dɔmt mĩ, kɨta kĩm dedangãi loa. I soot kad i nda roi nat sem kam daiyogt'n m'ndɨ m'dai kɨta Hoita kɨmaj kɨgo tɔgt'n Luwah ndɨ ad.

⁹ Luwah la aj'j, kunj tɔ kad jĩ deg lon kɨjaɓat. Kɨtakul kɨlaɗajg hã kunjɨn al, na kɨgo kɔjɗat lon kɨ kɔsɨdɔn, ĩn ndah kɨgo kamkẽt lon. Adj majkurr'n non kam Krist Jejut kete nõ yaɓood kaglot.

¹⁰ Na tajigla ad majkurr'n non tee kɨtɨga kɨtakul tee Ngekaj'j Krist Jeju. Kɨtɔ Krist Jeju ta tɔg koi ad koi goto, na tee kɨ kumkajir kɨdum koi kɨ kam kunjt kɨtakul Hoita kɨmaj.

¹¹ Luwah ndahm ngelamber hoitat kɨmaj'n non, ngombangkɨlaa, kɨ ngendoo girrdeg kɨ dang dang.

¹² Kɨtɔ 'nten la m'ndɨ m'dain yom kɨ kõg 'nten. Titbe kaa ne, rom ndɨ sɔlɨm al, kɨta m'ger Krist'n hã m'ndɨ m'ada kamm ɓet, m'ger kɔikɔi asɨ ngom nya'n la jimt mbã ndɔ gangtat.

¹³ I hɔ go tag kɨjaraw'n i ndoo romt kad ĩn nyandaj kɨ kad i ndaj, i hɔ go kadkam Luwah kɨ tarɨn jĩn ne kam ro kɨkɨɗat nat kɨ Krist Jeju.

¹⁴ Sumba kad i ngom nyag kɨmaj'n lan jiit. I ngomd kɨtakul tɔg Ndil Kɨkunjɗang'n ndɨ kɨ kamjt.

¹⁵ Deg tube kɨ kam dɔning Ajit nyàmɨn kɨ kɨɗambe tit'n i gerɨn. Pijel kɨ Hermojen ĩn kudt tɔ.

¹⁶ M'kɔ Bɨraɓe kad okumtondo lo ngékɨɓe lo Onesipor kɨta adɨm tɔg kɨ nja natnatbe, roa sɔla dɔmt al lon mĩn dangait.

¹⁷ Na lon ɗe ɓebot kɨ Rom ye, sahm kɨ rotĩn mbã ngahm.

¹⁸ M'kɔ Bɨraɓe kad Onesipor ngah kookumtondo kokɨro Bɨraɓet ndɔ gangtat kɨ nu. I ger ɓet Onesipor ɗa kɨlaɓer adɨm ngãibe kam ɓebot kɨ Epesɨ.