2 Jã 1 - Maktub Ta Kumkajir

¹ Mĩ kɨbo m'ndang maktub 'nten mad dekɨdẽ kɨmbed lo Luwah kɨ nganag'n hã m'ndɨ tard kam rotat; i mĩ kɨ kɨɗambe hã m'ndɨ m'tard al, na tube'n gerɨn rota tɔ.

² Kɨ ndɨ kɨ tarsɨ kɨta rota'n hã ndɨ kɨ kamjt a i sej nat mbãkɨnõt tɔ.

³ Kɨ Luwah kɨ Bɔw, kɨ Jeju Krist Ngon Luwah kɨ Bɔw, adjɨn majkurr kɨ kookumtondo kɨ lapia. Kɨ nyag'n non ĩn sej nat kam rotat, kɨ kɨ kam tart.

Ta lo rota kɨ tar

⁴ M'ndɨ m'ɗa ronel kɨ dumbit dɔ ngaht'n hã m'ngaa kɨmadg ku nganigt a ndian kam rotat tit'n Bɔwj ndajɨn mbera.

⁵ Tajigla m'ndɨ m'kɔi dekɨdẽ kɨmbed kad i tarɨn na. I mberkɨnda kɨ kij hã m'ndang al, na i mberkɨnda'n kɨ taa lo yaɓoodat nu kad kɨ tarɨn na.

⁶ Ĩn ten la i tar ye, kad kɨ i ndian kɨgo mberkɨndagt loa, 'nten la i mberkɨnda tit'n oon ne lo nyaɓoodat; kɨ i ndian kam tart.

⁷ Ngégool deg ngãibe teen ku degt kɨ dɔningt kɨtaagbe. Deg'n non ndɨ elɨn ta kɨ tɨga wakɨsɨ anan: Jeju Krist ɗe kam dãro det al bat. De kɨ titbe i ngegool deg, kɨ ngendoor Krist.

⁸ Oon go rosɨ maj, na ɓeta kɨla'n kɨ ɗa kusɨt nãi kɔ, na kad i taan nyabaji kɨkasɨnatap.

⁹ Dekɨɗen kɨ ndɨ aw kɨ kete kam nyandoot mad na ndɨ kɨ kam nyandoot lo Krist al a ne, Luwah loa goto bat, na de'n ndɨ kam nyandoot lo Krist a ne, ndɨ kam noojt kɨ hɔ kɨ Bɔw kɨ Ngon tujoo ho.

¹⁰ Ĩla de mad ɗe rosɨt, na ɗe kɨ nyandoo'n non al a ne, ot hɔna kɨ ɓe losɨ, ot ɗana lapia.

¹¹ Kɨtɔ de'n ɗaa lapia a ne, de'n non i madna sia dɔ kɨlaɗaagt kɨmajal.

Dɔboi ta

¹² Ke nenɨ m'aw kɨ tag ngãibe kad m'ndang m'adsɨ kaa, m'ndig kad m'ndang maktub kɨ ãkɨr al, na m'nda kammt kɨ m'aw rosɨt kad j'elɨn na ta kɨ taj kɨtakad ronel losɨ i kɨkasɨnatap.

¹³ Ngan ngonkõi kɨdẽ kɨmbed lo Luwah ɗain lapia.