Zudu 1 - Bibeli do fee

Zudu í ce ŋa fɔɔ

¹ Amu Zudu woo ce icɛi Jesu Kirisi, amu iyi ǹ jɛ ifɔi Zaaki, amui ǹ wa n kɔ nŋɛ tiau ihɛ̃ wa, iŋɛ iyi Ilaaɔ̃ Baaba í kpe. Í bi ŋɛ, nɔ wa degbe ŋɛ i jɛ ti Jesu Kirisi ŋa.

² Ilaaɔ̃ ku jɔ̀ araareɛ do laakai ku sũ do kubi ku maa kɔ̃ɔsi si ŋɛ.

Woo kɔsi cio ilu ibo ŋa

³ Iŋɛ baakɔɔm ŋa, ǹ dasi idɔ wo ntɔ ntɔ n kɔ nŋɛ tia wa, na idei faabai awaɛ ŋau. Amma wee ǹ yɛ í cem tilasi n kɔ nŋɛ tiau ihɛ̃ wa nsɛi n kɔ̃ɔ nŋɛ si himma ku ba i jabu i maa leekĩ si kukɔsi ntɔ iyi à na inɛi Ilaaɔ̃ ŋa gbakã akã hee do ajɔ fei.

⁴ Tilasii n kɔ nŋɛ wa nsɛi si na iyi í jɔ̀ inɛ laalɔ gɔ ŋa à lɔ si inɔ nŋɛ do ile, aŋa iyi à waa kpaasi didɔ̃i Ilaaɔ̃ a ba a ceò daa sãmi nŋa, nɔ a kɔ̀si Jesu Kirisi, nŋu akã iyi í jɛ ilaalu nwa do Lafɛ̃ɛ nwa. Hai tako takoi à kɔ idei ijuukpã iyi inɛ ŋau aa na a yɛ si ajɔi kiitiu.

⁵ Nɔ baa bii ì mà fei ndɛɛ sãa sãa ŋa, do nŋu fei, ǹ wa n bi n ye ŋɛ gigi iyi si inɔi inɛi Izirɛli ŋa iyi Aɔ̃ Lafɛ̃ɛ í nya hai ilɛi Ezibiti, inɛ ŋa iyi a kù na a kù waa dasiɛ naanɛ í ce nfe nŋa.

⁶ Nɔ i ye gigii amaleka ilu faau ŋa mɔ iyi à donda gbugbã iyi Ilaaɔ̃ í na ŋa nɔ à kɔ̀si bi kuwa nŋa. Ilaaɔ̃ í jɔ̀ à dĩ ŋai si ilu kuku hee do ajɔ fei à waa degbeò ajɔi kiiti nla nlau.

⁷ Bɛɛbɛ mɔi inɛi Sodomu do inɛi Gomɔɔ ŋa do ilu ŋa iyi à kaako ŋa à ya maa ce daa laalɔ bɛi amaleka ŋau. À ya maa ce sɛ̃ɛ ku tɔtɔɔ hai nɛ yaase. Inɛmɔkɔ do inɛmɔkɔ à ya maa sũò njɛ. Na ŋɔi í jɔ̀ à kpa irii ilu ŋau do ina iyi ci ya ku, nɔ nŋu bɛ í jɛa inɛ ŋa sɛɛda.

⁸ Do nŋu fei, inɛ ŋa iyi à lɔ inɔ nŋɛ ŋau, à waa ce bɛɛbɛ. Kuyɛ ibo nŋa ŋaui í jɔ̀ à waa dasi ara nŋa daa sãmi ŋau bɛ. À donda ilaalu ku jɛi Ilaaɔ̃ nɔ à waa bu inɛi lele ilu amboe ŋa.

⁹ Wee baa Misɛli, nŋu iyi í jɛ inɛ ngboi amaleka ŋau kù ce bɛɛbɛ. Si kakɔɔ iyi aŋaò Seetam à ce à waa ja si ikui Moizi kù jɛ kù yɛ taalei Seetam hee ku buu, amma í sɔ̃ɔ í ni, Aɔ̃ Lafɛ̃ɛi á la siɛ.

¹⁰ Amma inɛ ŋau, mii iyi a kù mà yaaseɛ fei à ya buui. Nɔ baa mii ŋa iyi à mà bɛi mɛɛmu ŋa mɔ à ya mà, nŋui í ya ce nfe nŋa.

¹¹ Aa yɛ ijuukpã, domi tuubai Kaɛ̃ɛi à waa too, à dasi ara nŋa kurara ku ba a ba fia bɛi Balamu í ce, nɔ à kɔ̀si Ilaaɔ̃ bɛi Kore í ce nɔ à ce nfei ara nŋa.

¹² Inɛ ŋaui à jɛ sankala si jingau nŋɛu, à waa ba ŋɛ ku jɛ do iju hai nɛ anyɔ, ara nŋai à waa wo ngbɛ ngbɛ. À yɛi bɛi ijĩ iyi í dũ nɔ kaa wɔ si na iyi í jɔ̀ fufu wa taleɛ. À yɛi bɛi jĩi iyi í da koko nɔ kù so, bɛi jĩi iyi à wuu do icãɛ í kú mam mam.

¹³ À yɛi bɛi tenku iyi wa tãngãm do gbugbã. Si bɛi kutãngãm nɔu í ya fã inyiu, bɛɛbɛ mɔi kucei iju hai nɛ anyɔ nŋa í ya maa fangaa. À yɛi má bɛi leleaɔ̃ iyi í kua kpãaɛ, nɔ Ilaaɔ̃ í jilɛ nŋa ilu kuku nla nla hee do ajɔ fei.

¹⁴ Enɔku mɔ iyi í jɛ tɔku mɛɛjesiai Adamu í ce walii na iri nŋa í ni, Aɔ̃ Lafɛ̃ɛ wee wa naa do amaleka kumáɛ ŋa bututu,

¹⁵ ku kiiti inɛ fei nɔ ku yɛ taalei inɛ ŋa iyi a kù màa ŋau na kuce laalɔ nŋa fei do bɛi à dondaɛ, do na ide laalɔ ŋa iyi ilu dulum ŋa à ya maa fɔaa.

¹⁶ Inɛ ŋau, à ya maa gbagbai, nɔ nkãma kù wɛɛ iyi í ya sĩa nŋa si, binɛ nŋai wa cua nŋa. À ya maa tɔɔ fufui nɔ à ya maa lɛlɛ inɛ ŋai do ide didɔ̃ ku ba a ba mii ndii lafɛ̃ɛ ŋa.

Bɛi woo dasi naanɛ ŋa à nɛ a ce

¹⁷ Amma iŋɛ baakɔɔm ŋa, í sĩa i ye gigii ide iyi woo bɛi Lafɛ̃ɛ nwa Jesu Kirisi ŋau à tako à fɔ wo.

¹⁸ À sɔ̃ ŋɛ wo à ni, si waatii ankãanyi, woo yaako inɛ ŋa aa naa iyi a kù mà bɛɛrɛi Ilaaɔ̃, nɔ binɛ nŋai á maa cua nŋa.

¹⁹ Aŋai aa jɔ̀ inɛ ŋa a ja a maa fɛɛfɛ njɛ. Iyi à bi nŋai aa ya maa ce, domi a kù nɛ Hundei Ilaaɔ̃.

²⁰ Amma iŋɛ baakɔɔm ŋa, i ya maa mua njɛ gbugbã si naanɛ iyi ì dasi Jesu ŋa, nɔ i ya ce kutɔɔ do gbugbãi Hundei Ilaaɔ̃ ŋa.

²¹ Nɔ i leekĩ si kubii Ilaaɔ̃ ŋa, i maa degbeò ajɔ iyi Lafɛ̃ɛ nwa Jesu Kirisi á mu nŋɛ kuwɛɛ hai tã na araare nŋɛ iyi wa ce.

²² I ya ce araarei inɛ ŋa iyi à waa sika sika ŋa.

²³ I faaba inɛ ŋa iyi aa yɔkɔ i nya wa hai si ina ŋa. Inɛ ŋa iyi à gbe ŋau mɔ i ce araare nŋa, amma i ya ce laakai ŋa ku ba iŋɛ taka nŋɛ i maà dasi dulum du ŋa ŋa. I maà lu baa ibɔ nŋa ŋa iyi dulum du ŋa í riisi.

Saabui ankãanyi

^24-25 Ilaaɔ̃ nŋu akãi í jɛ woo faaba nwa, nŋu iyi á yɔkɔ ku degbe ŋɛ i maà na i cuku ŋa, nɔ ku jɔ̀ i naa si amboeɛ ŋa do inɔ didɔ̃, lɛɛfi ku maà wa si. Amboe do jirima do gbugbã do yiiko ku jɛ tɛɛ hai sinte, do nsɛi, hee do ajɔ fei na saabui Lafɛ̃ɛ nwa Jesu Kirisi. Ami.