Romu 5 - Bibeli do fee

À dɔ̃ do Ilaaɔ̃

¹ Nsɛi, si bɛi Ilaaɔ̃ í ce wa inɛ dee dee ŋa na naanɛ ku dasi nwa, à dɔ̃ do nŋu na saabui Lafɛ̃ɛ nwa Jesu Kirisi.

² Jesu mɔi í mu nwa kpãa do saabui naanɛ ku dasiu ka sɛkɛɛ si Ilaaɔ̃, nŋu iyi í ce nwa didɔ̃. Na didɔ̃ui à waa leekĩ dim dim nɔ à nɛ inɔ didɔ̃ domi à waa cɔ kpãa iyi aa ka nɛ baa nwa si amboei Ilaaɔ̃.

³ Iyi í re mɔm, baa si wahala à ya ka nɛ inɔ didɔ̃i domi à mà iyi wahala í ya bí temua.

⁴ Bii à nɔ à temua si wahalau, aa ka fita bɛi inɛ iyi í jɛ igũ si laakai ku cɔ, nɔ igũ iyi à jɛu á bí nwa kpãa ku cɔ.

⁵ Nɔ kpãa iyi à waa cɔu kaa jɛ ngbɛ domi kubii Ilaaɔ̃ í wa si idɔ nwa do saabui Hundeɛ iyi í mu nwa.

⁶ Si waati iyi a kù nɛ gbugbã, Kirisi í ku na irii inɛ ŋa iyi a kù mà bɛɛrɛi Ilaaɔ̃. Í kui si waati iyi Ilaaɔ̃ í jilɛu.

⁷ Á gaabua amanɛ ku jɛsi nŋu ku ku baa na inɛ dee dee. Á yɔkɔ ku jɛ ilu wɔɔkɔ gɔ á jɛsi nŋu ku ku na inɛ jiida gɔ.

⁸ Amma Ilaaɔ̃ í nyisi wa kubi nlaɛ domi waati iyi à jɛ ilu dulum ŋa Kirisi í ku na iri nwa.

⁹ Nsɛi, si na iyi í jɔ̀ njɛi Kirisi í jɔ̀ Ilaaɔ̃ í ce wa inɛ dee dee ŋa, kù nɛ sika kãma á faaba wa hai si idɔɔkɔ̃ɛ iyi á naa.

¹⁰ Waati iyi à jɛ mbɛɛi Ilaaɔ̃, í jɔ̀ à dɔ̃ do nŋu na ikui Amaɛ. Na nŋu nsɛi, si bɛi à dɔ̃ do nŋu, sika kãma kù wa si á nyi ku faaba wa má na kuwɛɛi Amau.

¹¹ Iyi í re mɔm, Lafɛ̃ɛ nwa Jesu Kirisi, nŋu iyi í jɔ̀ à dɔ̃ do Ilaaɔ̃, í nyi í jɔ̀ à nɛ inɔ didɔ̃ má si Ilaaɔ̃.

Adamu* do Kirisi*

¹² Dulum í lɔ wai si andunya hai bi inɛ akã, nɔ dulum nɔu í naaò iku wa. Si bɛɛbɛ, ikuu í tosi inɛ fei domi inɛ feii í ce dulum.

¹³ Ntɔi dulum í wa si andunya wo woodai Moizi í bɛi í naa, amma bii wooda kù wɛɛ, ijuukpãi wooda ku kua mɔ kaa wɛɛ.

¹⁴ Do nŋu fei, hai waatii Adamu hee ku naa si Moizi fei, inɛ ŋa à ya ku baa do iyi a kù kua wooda bɛi Adamu í ce. Aa ka yɔkɔ ka wã Adamu do inɛ iyi í na í naau.

¹⁵ Ntɔ ntɔ, inɛ nkpɔi í ku na dulum dii inɛ akãu, amma didɔ̃i Ilaaɔ̃ í la í re dulum dii Adamu. Didɔ̃i Ilaaɔ̃u mɔ hai bi inɛ akãi í naa, nɔ lafɛ̃ɛui í jɛ Jesu Kirisi. Didɔ̃u amua nla nlai, nɔ í tosi inɛ nkpɔ.

¹⁶ Amuai Ilaaɔ̃u do dulum dii inɛ akãu í wãaia njɛ, domi dulum akãui í jɔ̀ Ilaaɔ̃ á kiiti inɛ ŋa ku yɛ taale nŋa, amma didɔ̃ɛi á jɔ̀ ku ce wa inɛ dee dee baa do iyi à tako à ce dulum nkpɔ nkpɔ.

¹⁷ À mà iyi iku í tosi inɛ feii na dulum dii inɛ akãu. Amma na inɛ akã mɔi aa ka ba mii iyi í la í re, domi inɛ iyi í gba didɔ̃ nlai Ilaaɔ̃ do amua nlaɛ iyi í jɔ̀ í jɛ dee dee fei, á maa wɛɛ nɔ á jɛ bomma na irii Jesu Kirisiu.

¹⁸ Na nŋu, si bɛi dulum dii inɛ akã í jɔ̀ Ilaaɔ̃ í yɛ taalei inɛ fei, bɛɛbɛ mɔi kuce dee deei inɛ akã í jɔ̀ inɛ fei í jɛ dee dee í baò kuwɛɛ.

¹⁹ Si bɛi ide hai gbɔi inɛ akã í jɔ̀ inɛ nkpɔ í jɛ ilu dulum, bɛɛbɛ mɔi Ilaaɔ̃ á ce inɛ nkpɔ dee dee na ide ku jirimai inɛ akãu.

²⁰ Wooda í lɔ wai ku ba dulum ku kɔ̃ɔsi, amma bii dulum í kɔ̃ɔsi, didɔ̃i Ilaaɔ̃ mɔ í ya kɔ̃ɔsi ku roo mái.

²¹ Si bɛi dulum í lɔ si inɛ fei hee í naaò iku wa, bɛɛbɛ mɔi didɔ̃i Ilaaɔ̃ í naa si inɛ fei ku ba ku ce wa inɛ dee dee ŋa nɔ ku mu nwa kuwɛɛ iyi ci ya tã na anu akã iyi à nɛ do Lafɛ̃ɛ nwa Jesu Kirisi.