Iri ku kɔ̃ 28 - Bibeli do fee

Kutɔɔi inɛ gɔ iyi í ce amɛɛ do iku

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, awɔi ǹ wa n dɔ̃ si anu, awɔi ì jɛ bɛi kuta bii an manji. Maà ceem bɛi dekĩ, domi bii ì waa cokom bɛɛbɛ, an yɛ bɛi inɛ iyi wa bɔ nfe ku ce.

² Gbɔ kutɔɔm ŋa waati iyi ǹ wa n dɔ̃ siɛ anu ǹ wa n tɔɔ faaba, do waati iyi ǹ wu awɔm ŋa wa ikpa kpasɛ̃ kumáɛ.

³ Maà ceem bɛi aa cea ilu inɔ kukã ŋa do woo ce laalɔ ŋa. Aŋa iyi à ya maa fɔ idei laakai ku sũ si gɛlɛ bi kpaasi nŋa ŋa, amma wee laalɔi wa kɔ̃ si idɔ nŋa.

⁴ Sã nŋa mii iyi à ce. Sã nŋa laalɔ iyi awɔ nŋa ŋa à ce. Jɔ̀ mii iyi à ce ku cuku si iri nŋa.

⁵ Aɔ̃ Lafɛ̃ɛ, inɛ ŋau a ci ya mà bɛɛrɛi mii iyi ì waa ce, nɔ a kù mà bɛɛrɛi icɛi awɔɛ ŋa. Na nŋu, jɔ̀ a cuku, nɔ a maà dede má.

⁶ Saabu ku jɛ ti Aɔ̃ Lafɛ̃ɛ, domi í gbɔ kutɔɔm.

⁷ Aɔ̃ Lafɛ̃ɛi í jɛ gbugbãm nɔ í jɛ bɛi tɛlim. Siɛi naanɛm í wa nɔ wa faabam. Ǹ wɛɛò inɔ didɔ̃ nla nla si idɔm nɔ an na iriɛ bɛɛrɛ do iri ku kɔ̃m ŋa.

⁸ Aɔ̃ Lafɛ̃ɛi í jɛ gbugbãi zamaaɛ. Nŋui í jɛ inya ku nɛ gbugbã bii faabai inɛ iyi í cicau í wa.

⁹ Faaba inɛɛ ŋa nɔ i wee nŋa, aŋa iyi à jɛ amaniɛ ŋa. Jɛ woo degbe nŋa, nɔ i maa mu nŋa gbugbã hee do ajɔ fei.