Iri ku kɔ̃ 26 - Bibeli do fee

Inɛ dee dee gɔ wa kpe Ilaaɔ̃

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, jɔ̀ n jɛ dee dee, domi isɛɛnɛm kù nɛ lɛɛfi. Aɔ̃ Lafɛ̃ɛi ǹ dasi naanɛ, n kaa n koosɛ pai.

² Aɔ̃ Lafɛ̃ɛ, wusɛ idɔm, cɔ laakaim nɔ i mà lasabum do mii iyi ǹ bi.

³ Jiida ku jɛɛ í wa si wajum, nɔ ǹ wa n nɛ si ntɔɛ.

⁴ N ci ya n buba do inɛ laalɔ ŋa, n ci ya n maa n nɛ do ilu muafiti ŋa.

⁵ Ǹ cé kutɔtɔɔi woo ce laalɔ ŋa. Nɔ n ci ya n buba do ilu inɔ kukã ŋa.

⁶ Aɔ̃ Lafɛ̃ɛ, an wɔɔ awɔm ŋai n nyisiò iyi n kù ce taale. Nɔ an kaako bi kuweeɛui

⁷ n ceò fei ndɛɛ ku ba n saabuɛ nɔ n sisi mii nla ŋa iyi ì ce fei.

⁸ Aɔ̃ Lafɛ̃ɛ, ǹ bi n wa kpasɛ̃ bii ì wa, inya tengi bii amboeɛ í ya maa wa.

⁹ Maà nya hundem bɛi ti ilu dulum ŋa, nɔ i maà kpam bɛi woo kpa inɛ ŋa,

¹⁰ aŋa iyi laalɔi í ya maa wa si awɔ nŋa, nɔ ntɔ ku ba nŋa si amua nkpɔi í ya wa.

¹¹ Aɔ̃ Lafɛ̃ɛ, amu ǹ wa n nɛ si dee dee ku jɛm, ceem didɔ̃ nɔ i jɔ̀ n nɛ aram.

¹² Aɔ̃ Lafɛ̃ɛ, ǹ wa n leekĩi si kpãai ntɔ, nɔ bii inɛ ŋa à tɔtɔɔ an maa n cĩɛi.