Iri ku kɔ̃ 17 - Bibeli do fee

Nsɛi, awɔi ǹ wa n tɔɔ

1 Kutɔɔi Davidi.

¹ Kutɔɔi Davidi. Aɔ̃ Lafɛ̃ɛ, gbɔ mii iyi ǹ bi, de itĩ do laakai si kukpatam, gbɔ kutɔɔm domi hai si idɔ hai nɛ muafitim nii wa naa.

² Awɔi aa kiitim nɔ i jɔ̀ ntɔm ku fita gbugbãa si wajuɛ. Awɔ takaɛ wusɛ nɔ i mà do bii ntɔ í wa.

³ Ì naa bi tom idũ, ì wusɛ idɔm, ì cɔ laakaim, amma i kù yɛ nkãma. N kù ce dulum kãma si ide ku fɔm.

⁴ N kù too si kucei inɛ laalɔ ŋa bɛi awɔ takaɛ ì fɔu, nɔ n kù too kpãai woo taa inɛ ŋa gbugbã.

⁵ Ǹ leekĩ dim dim si kpãaɛ, n kù yaa.

⁶ Nsɛi, Aɔ̃ Lafɛ̃ɛ awɔi ǹ wa n tɔɔ domi aa jɛɛm. Sotĩ i gbɔ idem ŋa.

⁷ Nyisim jiida ku jɛɛ, awɔ iyi ì ya faaba inɛ iyi wa dɛ bi ku manji bi tɛɛ hai si awɔi mbɛɛɛ ŋa.

⁸ Mum bɛi amanɛ í ya maa nɛ laakaii ijuɛ. Biim do jĩjĩi ikpaɛ ŋa.

⁹ Jɔ̀ n fita hai si awɔi inɛ laalɔ ŋa iyi à waa kpãm iju, do hai si awɔi mbɛɛ ŋa iyi à kaakom à waa dɛ ku kpam.

¹⁰ Inɔ nŋa í kã, a kù nɛ araare. À ya maa fɔ idei do faau.

¹¹ Inɛ ŋau wee à waa too akpam wa, nɔ à kaakom mɔm tã, à waa dɛdɛ waati iyi aa ba a nyɔm ilɛ.

¹² À yɛi bɛi muusu nla iyi wa manji si koloɛ ku ba ku mu iŋa. À yɛi má bɛi muusu nla iyi wa saasa a naa iŋa wa ku ŋɔ.

¹³ Aɔ̃ Lafɛ̃ɛ, dede si ŋa, kɛkɛ gbugbã nŋa, nyam hai si awɔ nŋa, kpa ŋa do taakubaɛ.

¹⁴ Kpa ŋa do taakuba, nɔ i tambɔ ŋa do awɔɛ. Mii iyi í nɛ ku ba ŋai í jɛ a maà wɛɛ si hunde má. Jɔ̀ a mɔ inyi kuro iyi ì jilɛ nŋa. Jɔ̀ ama nŋa ŋa a mɔɔ hee ku kpa ŋa nɔ a jɔ̀a tɔku nŋa ŋa iyi í gbeu.

¹⁵ Amma amu, na dee dee ku jɛm, an yɛ wajuɛ, nɔ waati iyi ǹ jĩ, an maa n cɔɛi n kaa n gbɛɛji.