Mɔnda ŋa 27 - Bibeli do fee

¹ Maà maa tɔɔ fufu do mii iyi aa ce ala, domi i kù mà baa mii iyi á ce nnyi.

² Maà saabu araɛ. Jɔ̀ inɛ mmu ŋa a coo.

³ Kuta í wo nɔ sãa mɔ í wo, amma idɔɔkɔ̃i nnyɛi í wo í re aŋa minji fei.

⁴ Idɔɔkɔ̃ í ya kpa inɛ, nɔ ara gbãa í gaabu, amma yooi á nɔ igu ku gɛɛɛ.

⁵ Á sĩa i sɔ̃ inɛ kuraraɛ, do iyi aa buu nɔ inɛ gɔ kù waa yɔɔ.

⁶ Bii kpaasiɛ wa gbagba siɛ wa nyisi idɔ kumáɛi, amma mbɛɛ í ya zambaɛi do ide didɔ̃.

⁷ Inɛ iyi wa yo í ya tɛɛsɛ nyikɔ̃i, amma inɛ iyi ari wa kpa baa mii kuro í ya dɔ̃a sii.

⁸ Inɛ iyi í bɔ wasangai í yɛi bɛi yɛ́i iyi í jɔ̀ antɛɛ wa dabii.

⁹ Ikɔi kpaasi jiida í ya jɔ̀ inɔi inɛ ku dɔ̃, bɛi inunui tuae do ikpo í ya dɔ̃a inɛ si.

¹⁰ Maà toa kpaasiɛ walakɔ kpaasii baaɛ anyi. Bii wahala gɔ í naa siɛ, maà bɔ sobi ku dɛdɛ bi nyaanzeɛ nŋu akã, domi inɛ iyi í wa kɔkɔɛ í tia baakɔɔi jĩijĩ.

¹¹ I ya ce isɛɛnɛɛ do bisi amam, nɔ inɔm ku dɔ̃. Baa bii inɛ gɔ wa yɛ taalem an ba ide n jɛaa.

¹² Ilu laakai í ya yɛ laalɔi nɔ ku sa ku manji. Amma nnyɛi í ya maa nɛɛi hee ijuukpãɛ ku na ku baa.

¹³ Bii inɛ gɔ í jɛsi nŋu ku so gbesei inɛ gɔ si iriɛ, gba ibɔɛ. Bii í nɔ í jɛ ti inaabo ace sakara mɔi tilasiɛ ku jɔ̀ɛ tɔɔma.

¹⁴ Bii inɛ gɔ í naa í la wa weea kpaasiɛ amɛɛjuumá, á doo kuweeui si ikpe.

¹⁵ Inaabo à bi ija í yɛi bɛi ibai inyi iyi wa tontoo waati kãma fei sukui atɛ.

¹⁶ Inɛ iyi wa bi ku ganjiaa í yɛ bɛi wa bi ku leekĩ fufui walakɔ ku tibi inyii ikpo si awɔ.

¹⁷ Si bɛi isɔi í ya kpã anui isɔ, bɛɛbɛ mɔi amanɛ í ya teese daai amanɛ.

¹⁸ Inɛ iyi wa teese jĩi ndii figi á na ku jɛ isoɛ. Nɔ inɛ iyi wa gbɔa lafɛ̃ɛɛi á ba bɛɛrɛ.

¹⁹ Si bɛi amanɛ í ya yɛ wajuɛ si inyi, bɛɛbɛ mɔi í ya yɛ daaɛ si idɔɛ.

²⁰ Si bɛi bi kuwai iku ŋa ci ya kɔ̃, bɛɛbɛ mɔi binɛi amanɛ ci ya tã.

²¹ Do inai à ya yɔò isɔ fũfũ do wura a cɔò jiida ku jɛ nŋa, amma à ya wũaa amanɛi si ide ku fɔi inɛ ŋa.

²² Baa bii ì dasi nnyɛi si inɔ ido ì tutuɛ do amaado bɛi à ya tutu amaajɛ, i kaa yɔkɔ i fɛɛfɛɛ do kuce hai nɛ yaaseɛ.

^23-24 Amani ci ya maa wa awɔi amanɛ hee do ajɔ fei. Nɔ baa bomma kaa maa wa si dimi akã hee do ajɔ fei. Na nŋu, jɔ̀ i ce kookaai i mà baanii angudãɛ ŋa, nɔ i gbɔa gaaɛ.

²⁵ I ya ko kpaafo. Nɔ waati iyi fɔfɔ í fita í la má, i ya kpa fɔfɔu si iri kuta ŋa i jilɛ ŋa.

²⁶ Bii ì waa ce bɛɛbɛ angudãɛ ŋa aa na a jɔ̀ i ba jĩnɛ ku dasi, nɔ i ra iko ŋa do iwo komboɛ ŋa.

²⁷ Amɔi iwo iye ŋau mɔ á toɛ sɔnda awɔ do kpasɛ̃ɛ, nɔ i gbɔɔaò inaabo woo ce icɛɛ ŋa.