Mɔnda ŋa 22 - Bibeli do fee

¹ Iri jiida í re amani nla nla. Nɔ bɛɛrɛ í re isɔ fũfũ do wura.

² Ilu amani do ilu are, Aɔ̃ Lafɛ̃ɛi í taka aŋa minji fei.

³ Ilu laakai í ya yɛ laalɔ iyi wa naai nɔ ku sa ku manji, amma hai nɛ laakai í ya nɛ koo dasii nɔ ku ba wahalaɛ.

⁴ Inɛ iyi í kaye araɛ nɔ í mà bɛɛrɛi Aɔ̃ Lafɛ̃ɛ, Aɔ̃ Lafɛ̃ɛ á jɔ̀ ku ba amani do bɛɛrɛ do hunde sisɔ.

⁵ Kpãai inɛ laalɔ ŋa í nɛ agũ do cɛkũm ŋa. Inɛ iyi í bi hundeɛ í gbe ku saa ku jĩ.

⁶ Nyisi ama keeke kpãa iyi í nɛ ku too, baa bii í na í la kaa yaa ku jɔ̀ɔ má.

⁷ Ilu fia í ya taa ilu are ŋa gbugbãi, nɔ inɛ iyi í wɛ̃ fia í jɛ arui inɛ iyi í wɛ̃aa fiaui.

⁸ Inɛ iyi í gbɛ̃ laalɔ, laalɔi á da, nɔ gbugbã ku taɛ ku jɛ ngbɛ.

⁹ Inɛ jiida á ba kuwee si na iyi í jɔ̀ í ya mua ilu are ŋa sɔnda.

¹⁰ Lele woo yaako inɛ nɔ ija ku tã, nɔ kakɔɔ do arabu ku kpa iri.

¹¹ Inɛ iyi lasabuɛ í sĩa nɔ ideɛ í má á jɛ kpaasii ilaalu.

¹² Aɔ̃ Lafɛ̃ɛ í ya degbe inɛ iyi í nɛ kumà, amma í ya kɛkɛ idei inɛ laalɔi.

¹³ Ilu ika í ya nii, n kaa n fita, domi muusu nla í wa kpãa á na koo kpam.

¹⁴ Gɛlɛ didɔ̃i inaabo ace sakara í yɛi bɛi lumbu. Inɛ iyi idɔɔkɔ̃i Aɔ̃ Lafɛ̃ɛ í dede si í ya dasii.

¹⁵ Idei nnyɛi ku ce í ya wa si idɔi amu ŋa, amma golo á yɔkɔ ku nya ŋa si.

¹⁶ Inɛ iyi wa wahala ilu are na nŋu ku ba amani, walakɔ inɛ iyi wa cea ilu amani ŋa amua, á na ku dasi are.

Kai mmu ŋa

¹⁷ Sotĩ i gbɔ idei ilu laakai ŋa, jɔ̀ i mu ikɔm ŋa si idɔɛ.

¹⁸ Bii ì waa mu ŋa si idɔɛ, nɔ ì waa fɔɔ, aa nɛ inɔ didɔ̃.

¹⁹ Awɔ tii takaɛi ǹ bi ku na ikɔu ihɛ̃ nnyi ku ba i dasi Aɔ̃ Lafɛ̃ɛ naanɛ.

²⁰ Ǹ tako ǹ naɛ ikɔ nkpɔ nkpɔ iyi á muɛ bisi do kumà.

²¹ Nŋui á kɔɛ si ide ntɔ iyi í nɛ naanɛ, ku ba bii inɛ gɔ í beeɛ ide gɔ i yɔkɔ i jɛa lafɛ̃ɛ do ide ntɔ.

²² Maà bɛɛgɛ si are ku jɛi inɛ gɔ i potoɛ, nɔ i maà wahala ilu are bi ku ce kiiti,

²³ domi Aɔ̃ Lafɛ̃ɛi á gba nŋa nɔ ku nya hundei inɛ ŋa iyi à gba amani nŋa ŋa.

²⁴ Kù sĩa i ce ilu idɔɔkɔ̃ kpaasi, nɔ i maà ya bɔ bi inɛ iyi idɔɔkɔ̃ɛ í ya saasa ku dede,

²⁵ ku ba i maà na i so daaɛ nɔ i ce nfei kuwɛɛɛ.

²⁶ Maà jɔ̀ inɛ gɔ ku so gbese do iriɛ,

²⁷ domi bii i kù nɛ mii iyi aa sã, aa gba baa daayiɛ.

²⁸ Maà tekĩò kɔɔ nwo iyi balaɛ ŋa à nya.

²⁹ Inɛ iyi í mà icɛɛ kaa manji, á yɔkɔ ku cea baa ilaalu ŋa icɛ.