Mɔnda ŋa 12 - Bibeli do fee

¹ Inɛ iyi í bi kumà, í ya jɛsi a sɔ̃ɔ kuraraɛi. Inɛ iyi kù bi a gbagba siɛ í ce nnyɛi.

² Aɔ̃ Lafɛ̃ɛ í ya saabu inɛ iyi í ya ce jiida, amma í ya yɛ taalei ilu lasabu sãmi.

³ Inɛ iyi wa ce laalɔ ci ya leekĩ dim dim, amma nkãma kaa kɛkɛ inɛ dee dee ŋa.

⁴ Abo jiida bɛɛrɛi mɔkɔɛi, amma abo iyi wa dasi mɔkɔɛ anyɔ í ya yɛaai bɛi bɔ̃ɔ iyi wa ŋɔ kũkũɛ ŋa.

⁵ Lasabui inɛ dee dee ŋa fei í ya tɛi, amma ikɔi inɛ laalɔ ŋa fei iboi.

⁶ Idei inɛ laalɔ ŋa cɛkũm ku mɛɛ inɛi, amma gɛlɛi inɛ dee dee ŋa í ya faaba ŋa.

⁷ Bii à kɛkɛ inɛ laalɔ, nkãma ci ya gbeaa, amma kpasɛ̃i inɛ jiida ŋa í ya maa leekĩi dim dim.

⁸ Ilu laakaii í ya ba kucĩ, amma à ya donda inɛ iyi lasabuɛ kù jɛ dee deei.

⁹ Á sĩa i jɛ inɛ iyi í kaye araɛ baa bii ì nɛ woo ce icɛ do iyi aa maa so araɛ lele nɔ i kù nɛ baa sɔnda.

¹⁰ Inɛ dee dee í ya maa gbɔa hee do mɛɛmuɛ ŋai, amma ilu inɔ kukãi lasabui laalɔi í ya wɛɛa.

¹¹ Inɛ iyi í logoo ikoɛ í ya nɛ amaajɛ nkpɔ, amma inɛ iyi wa gbɔa mii nfe ku too í ce nnyɛii.

¹² Inɛ laalɔi í ya ce kɔdɛɛi ribai laalɔ iyi inɛ gɔ í ce, amma temuai inɛ jiida ŋai í ya nɛ aranfãani.

¹³ À ya mu inɛ laalɔi si ide sãmi ku fɔɛ, amma inɛ jiida í ya fita si wahala dimi baa yooma feii.

¹⁴ Bɛi à ya sãa inɛ fia na icɛ iyi í ce, bɛɛbɛ mɔi idei amanɛ á yɔkɔ ku jɔ̀ ku bɔ waju.

¹⁵ Nnyɛi í ya wɛɛ si mii iyi nŋu wa ce fei í sĩai, amma ilu laakai í ya gba ikɔi.

¹⁶ Nnyɛi í ya jɔ̀ à yɛ idɔɔkɔ̃ɛi anu akã, amma ilu laakai í ya tɛ̀ araɛi.

¹⁷ À fɔ ntɔ í ya jɔ̀ kiiti ku jɛ dee deei, amma woo jɛ sɛɛda ibo ci ya jɔ̀ ku jɛ dee dee.

¹⁸ Inɛ iyi ci ya ce lasabu si ide iyi wa fɔ, í ya mɛɛ inɛ ŋai bɛi taakuba, amma idei ilu laakai í ya naaò kuteese wa.

¹⁹ Ntɔ í ya wɛɛi waati kãma fei, amma ibo ci ya kpɛ.

²⁰ Iboi í ya wa idɔi inɛ iyi wa bi laalɔ ku ce, amma inɔ didɔ̃i í ya jɛ ti inɛ ŋa iyi à waa dɛ laakai ku sũ.

²¹ Laalɔ kãma ci ya ba inɛ dee dee ŋa, amma inɛ laalɔ ŋa wahalai í ya maa kɔ̃ nŋa.

²² Aɔ̃ Lafɛ̃ɛ í cé ibo ku sɔ, amma woo fɔ ntɔ ŋai í ya bi.

²³ Woo saku í ya singa kumàɛi titã, amma nnyɛi í ya nyisi nnyɛi ku jɛɛi.

²⁴ Ilu himmai í ya jɛ bomma, amma ika ci ya bɔò inɛ kaa si aru.

²⁵ Zigiida í ya jɔ̀ inɛ ku gbɛi, amma ide jiida í ya muaa gbugbãi.

²⁶ Inɛ dee dee í ya nyisi kpaasiɛ kpãa jiidai, amma kucei inɛ laalɔ ŋa í ya nyɔ ŋai.

²⁷ Tobi ilu ika ci ya ba iŋa iyi á banda, amma ilu himma í ya ba amani.

²⁸ Kuwɛɛ í wai si kpãai dee dee ku jɛ, amma kpãai laalɔ ku ce si ikui á bɔò inɛ.