Mɔnda ŋa 11 - Bibeli do fee

¹ Aɔ̃ Lafɛ̃ɛ kù bi kiloo iyi kù jɛ dee dee, amma í ya saabu si kiloo iyi í munga.

² Bii faau í wa, bɛ mɔi anyɔ í ya wa, amma laakai í ya wa bi woo kaye ara ŋa.

³ Dee dee ku jɛi wa nɛò inɛ jiida ŋa. Laalɔ ku cei í ya ce nfei inɛ yaamɔ ŋa.

⁴ Ajɔi kiitii Ilaaɔ̃, amani kaa yɔkɔ ku faaba amanɛ, dee dee ku ce nŋu akãi á nya inɛ si iku ajɔ nŋu.

⁵ Jiida ku jɛi inɛ dee dee í ya dasiɛ kpãa iyi í sĩa, amma inɛ laalɔ í ya nyɔi na laalɔ ku ceɛ.

⁶ Dee dee ku jɛi inɛ jiidai í ya faabaɛ, amma inɛ laalɔ í ya dasi cɛkũm dii kɔdɛɛi nŋu takaɛ.

⁷ Inɛ laalɔ í ya kui do kpãa ku cɔɛ ajɔ, nɔ naanɛ iyi í dasi amaniɛ ku ce nfe.

⁸ Inɛ dee dee í ya fita hai si zigiida, nɔ inɛ laalɔ ku sãsi agbɛɛ.

⁹ Inɛ iyi kù waa saalu Ilaaɔ̃ í ya ce nfei kpaasiɛ ŋai do idei gɛlɛɛ, amma inɛ dee dee ŋa à ya fita sii na kumà nŋa.

¹⁰ Inɛi inɔ ilu ŋa à ya nɛ inɔ didɔ̃, waati iyi inɛ dee dee ŋa à wɛɛò inɔ didɔ̃. Waati iyi inɛ laalɔ ŋa à ku, inɔi inɛ ŋa í ya dɔ̃i.

¹¹ Inɛ dee dee ŋa à ya naaò waju ku bɔ wai si ilu nŋa, amma inɛ laalɔ ŋa à ya bɛjɛɛi do idei gɛlɛ nŋa ŋa.

¹² Inɛ iyi í donda kpaasiɛ í ce nnyɛii, amma ilu laakai í ya cokoi.

¹³ Woo sɔ irii amanɛ ci ya singa asii, amma ilu naanɛ í ya maa mu fei ndɛɛi.

¹⁴ Zamaa í ya ce nfei bii kù nɛ woo cua jiida, amma woo kɔ nkpɔ á jɔ̀ zamaau ku bɔ waju.

¹⁵ Inɛ iyi í jɔ̀ inɛ njoo gɔ í so gbese do iriɛ á ba wahala, amma inɛ iyi í kɔ̀ ku coo á maa wɛɛi do laakai ku sũ.

¹⁶ Abo kusĩai í ya ba saabu, amma inɛmɔkɔ á ta gbugbãɛi, kú bɛi kú ba amani.

¹⁷ Inɔ akã í ya cea inɛ iyi í nɔɔu jiidai, amma inɔ kukã í ya sinda si lafɛ̃ɛɛi.

¹⁸ Ribai icɛi inɛ laalɔ ci ya kpɛ, amma inɛ iyi wa gbɛ̃ iyi í sĩa á ba riba ntɔ ntɔ.

¹⁹ Jiida ku ce í ya bɔò inɛ si kuwɛɛ, amma inɛ iyi wa sɛi si laalɔ á koo ku dasi iku.

²⁰ Aɔ̃ Lafɛ̃ɛ í cé inɛ ŋa iyi inɔ nŋa kù sĩa, amma í ya saabu inɛ ŋa iyi kuce nŋa í tɛ.

²¹ Ntɔ ntɔ inɛ laalɔ fei á yɛ ijuukpã, amma tɔkui inɛ dee dee ŋa aa ba faaba.

²² Abo kusĩa iyi í ce nnyɛi í yɛi bɛi lɛlɛawɔi wura iyi à dasi imɔi kuusɔɔ.

²³ Jiida ku ce nŋu akãi inɛ jiida ŋa à ya bi, amma mii iyi inɛ laalɔ í ya bii í ya faa idɔɔkɔ̃ wa.

²⁴ Amanii ilu inɔ akã í ya maa kɔ̃ɔsii, amma inɛ iyi awɔɛ ci ya fũ, í ya ce are ku maa kooi.

²⁵ Ilu inɔ akã á ba mii nkpɔ nkpɔ, nɔ inɛ iyi wa mua inɛ inyi ku mɔ, agbɛ kaa kpaa.

²⁶ Zamaa á ceekpe inɛ iyi wa degbe [ari nla nla] ku bɛi ku ta sɔnda, amma kuweei á jɛ ti inɛ iyi wa ta do njuma.

²⁷ Inɛ iyi lasabuɛ fei í wa si jiida ku ce, inɛ ŋa aa saabuɛ, amma inɛ iyi lasabuɛ fei í wa si laalɔ ku ce, laalɔi á baa.

²⁸ Inɛ iyi wa kaaba amaniɛ á cuku, amma inɛ dee dee ŋa aa maa bɔ wajui bɛi wua tũtũ iyi wa la.

²⁹ Inɛ iyi wa fɔ kpasɛ̃ɛ kaa ba nkãma, nɔ nnyɛi á jɛ arui ilu bisi.

³⁰ Kucei inɛ dee dee í yɛi bɛi jĩi ndii kuwɛɛ, nɔ ilu laakai í ya fa inɛ ŋa wa si kpãa jiida.

³¹ Bii inɛ dee dee ŋa à waa ba riba nŋa si andunya ihɛ̃, aa na a fɔ idei ribai ilu inɔ kukã ŋa do ti ilu dulum ŋa bɛi á to?