Filemɔɔ 1 - Bibeli do fee

Pɔlu í ce Filemɔɔ fɔɔ

¹ Amu Pɔlu iyi ǹ wa piisɔ̃ɔ na irii Jesu Kirisi, amu do Timɔtee inɛ nwa à ceɛ tiau ihɛ̃ wai Filemɔɔ, awɔ baakɔɔ nwa do minjisia nwa si icɛu.

² Nɔ à ce inɛi igbɛi Jesu ŋa iyi à ya tɔtɔɔ kpasɛ̃ɛu fɔɔ do wecĩ nwa Apia, do Aasipu, nŋu iyi wa ba wa ku jabu.

³ Ilaaɔ̃ Baa nwa do Lafɛ̃ɛ Jesu Kirisi a mu nŋɛ didɔ̃ do laakai ku sũ.

Kubii Filemɔɔ do naanɛ ku dasiɛ

⁴ Waati iyi ǹ wa n ce kutɔɔ fei ǹ ya n ye gigiɛi nɔ ǹ ya n saabu Aɔ̃ Lafɛ̃ɛm na iriɛ,

⁵ domi ǹ wa n gbɔ baaui naanɛɛ iyi ì dasi Lafɛ̃ɛ Jesu do bɛi ì bi woo dasi Jesu naanɛ ŋa fei.

⁶ Ǹ wa n tɔɔ Ilaaɔ̃ ku jɔ̀ anu akã iyi awaɛ ŋa à nɛ na naanɛ ku dasiu ku jɔ̀ i mà mii jiida iyi à nɛ si kpãai Kirisi fei.

⁷ Baakɔɔm, kubiɛu í muum gbugbã ntɔ ntɔ do inɔ didɔ̃ nla nla, domi ì waa tũ inɔi inɛi Ilaaɔ̃ ŋa.

Pɔlu wa tɔɔa Onezimu suuru

⁸ Na nŋu, baa do iyi ǹ nɛ kpãa na irii Kirisi iyi an tilasiɛ i ce iyi í sĩa,

⁹ do nŋu fei, na kubii í jɔ̀ ǹ wa n tɔɔɛ suuru. Amu Pɔlu, amu iyi ǹ jɛ mɔkɔ ngbo, nɔ wee nsɛi ǹ wa piisɔ̃ɔ na irii Jesu Kirisi,

¹⁰ ǹ wa n tɔɔɛ suurui na irii Onezimu, nŋu iyi í jɛ bɛi amam iyi ǹ bí si kpãai naanɛ ku dasi si ile piisɔ̃ɔ ihɛ̃.

¹¹ Tako wo kù sobiɛ jiida, amma nsɛi í jɛ sobi nla nla bi tɛɛ do bi tom.

¹² Nsɛi ǹ bɔɔ wai bi tɛɛ, nŋu iyi ǹ bi bɛi arai amu takam.

¹³ Ǹ bi ku wa kɔkɔm nii wo ku sobim si agbɛɛ si waati iyi ǹ wa piisɔ̃ɔ ihɛ̃ na laabaau jiidau.

¹⁴ Amma n kù bi n ce ngɔgɔ bii kù yeɛ, domi n kù bi i sobim do tilasi, bii kù jɛ do idɔɔbiɛ.

¹⁵ Á yɔkɔ ku jɛ iŋɛò Onezimu ì fɛɛfɛ njɛ ŋai wo si waati keeke ku ba i na i nɔɔ do ajɔ fei.

¹⁶ Kaa nyi wa bi tɛɛ baa bɛi aru nŋu akã má, amma í re aru. Á nyi wai bɛi baakɔɔ jiidaɛ. Ǹ nɛ kubiɛ ntɔ ntɔ, nɔ í sĩa titɛɛ ku re, domi kù jɛ aruɛ nŋu akã, í jɛ baakɔɔɛ si kpãai Kirisi má.

¹⁷ Na nŋu, bii ì waa kam bɛi kpaasiɛ, gba nŋu mɔ bɛi aa gba amu takam.

¹⁸ Bii ì raraɛ, walakɔ bii wa mu gbeseɛ, sindoɛ si irim.

¹⁹ Wee ǹ wa n kɔ iyi ihɛ̃ do awɔi amu takam, amu Pɔlu, an sãaɛ fei ndɛɛ. Baa bii n kù fɔɔ, awɔ takaɛ ì mà iyi ì waa mu gbesem na kuwɛɛɛ iyi ì ba.

²⁰ Na nŋu, awɔ inɛm, ǹ wa n tɔɔɛ i ceem didɔ̃u bɛ na irii Lafɛ̃ɛ. Tũ inɔm si kpãai Kirisi.

²¹ Ǹ ceɛ tiau ihɛ̃ wai si na iyi í jɔ̀ ǹ wa n naanɛɛ iyi aa jirima ide iyi ǹ wa n fɔu, nɔ ǹ mà kãm kãm aa ce ku re baa iyi ǹ wa n tɔɔɛu.

²² Mii akãi í gbe, ceem sɔɔlui ile bii an naa n wa, domi ǹ wa n cɔ kpãa iyi Ilaaɔ̃ á na ku sindoom wa bi tu ŋɛ má na saabui kutɔɔ nŋɛ.

Sukudɔ̃ ku tɔɔ

²³ Epafaasi, awaò inɛ iyi à wa ile piisɔ̃ɔ na irii Jesu Kirisiu, í ni n ceɛ fɔɔ.

²⁴ Bɛɛbɛ mɔi woo bam icɛ ku ce ŋa, Maaku do Aritaaki do Demasi do Luku, aŋa fei à ceɛ fɔɔ.

²⁵ Didɔ̃i Lafɛ̃ɛ Jesu Kirisi ku wa si ŋɛ.