Galati 6 - Bibeli do fee

I ya sobi njɛ si aso ŋa

¹ Iŋɛ inɛm ŋa, iŋɛ iyi Hundei Ilaaɔ̃ wa nɛò ŋɛ, bii ì mu inɛ gɔ si kurara, i nyisi lafɛ̃ɛ kpãa jiida do daa didɔ̃ ŋa. Nɔ i ce laakai ŋa ku ba iŋɛ mɔ i maà na i dasi kurara bɛɛbɛ.

² I sobi njɛ si aso ku so ŋa. Bii ì waa ce bɛɛbɛ ŋa ì waa jirima woodai Kirisi ŋai.

³ Bii inɛ gɔ wa cɔ araɛ ngɔgɔ nɔ wee kù jɛ ngɔgɔ, wa lɛlɛ araɛi.

⁴ I jɔ̀ inɛ fei ku wusɛ daai nŋu takaɛ nɔ ku yɛ si bii nŋu á tɔɔ fufu, amma ku maà tɔɔ fufu na iyi nŋu í re inɛ gɔ,

⁵ domi inɛ fei á so asoi nŋu takaɛi.

⁶ Awɔ iyi à waa kɔ idei Ilaaɔ̃, mii iyi ì nɛ fei jɔ̀ i kpɔ̃ɔ do inɛ iyi wa kɔɛ si.

⁷ I maà ti i lɛlɛ ara nŋɛ. A ci ya yaako Ilaaɔ̃. Mii iyi amanɛ í gbɛ̃ nŋui á da.

⁸ Bii wa gbɛ̃ iyi daai nŋu takaɛ í bi, nfe ku cei á bíaa. Bii í nɔ wa gbɛ̃ iyi Hundei Ilaaɔ̃ í bi, kuwɛɛ hai tãi Hundei Ilaaɔ̃u á bíaa.

⁹ Na nŋu, ka maà gbɛɛji do jiida ku ce, domi bii a kù mɔngɔ aa ka da si awaati iyi í jɔ.

¹⁰ Bɛɛbɛ mɔi waati iyi à ba awɔɛ fei, ka cea inɛ fei jiidaɛ. Nɔ kpaasi woo dasi Jesu naanɛ ŋai à nɛ ka cea ku re.

Ide ankãanyi do fɔɔ

¹¹ Hai ihɛ̃ bɛi do awɔi amu takam nii ǹ kɔ nŋɛ wa. Iŋɛ taka nŋɛ aa yɔɔ mɔm bɛi kukɔ ŋau à la à to.

¹² Inɛ ŋa iyi à waa bi a tilasi ŋɛ i ceò bango ŋau à waa ce bɛɛbɛi ku ba a ce mii iyi á dɔ̃a amanɛ ŋa si, nɔ a maà kpã ŋa iju na irii ikui Jesu Kirisi si jĩi ku gaauu.

¹³ Amma aŋa taka nŋa, baa do iyi à ce bango fei, a kù waa jirima wooda. À bi a dasi ŋɛ bango ku cei ku ba a tɔɔ fufu si na iyi í jɔ̀ à yɔkɔ à kãmia ŋɛ.

¹⁴ Amma amu n kù n wa n tɔɔ fufu bii kù jɛ na ikui Lafɛ̃ɛ nwa Jesu Kirisi si jĩi ku gaau. Na ikuɛu mii ndii andunya fei í yɛɛm nii bɛi mii iyi kù wɛɛ má, nɔ bɛɛbɛ mɔi ǹ wa n yɔɔ baa do kuwɛɛi amu takam fei.

¹⁵ À ce bango, a kù ce bango, kù jɛ ide kãma. Mii iyi í nɛ amboe í re, nŋui í jɛ a taka inɛ titɔ̃.

¹⁶ Laakai ku sũ do didɔ̃ ku wɛɛa inɛ ŋa iyi à waa too woodau ihɛ̃ hee do inɛi Izirɛli ŋa, aŋa iyi à jɛ inɛi Ilaaɔ̃ ŋa.

¹⁷ Hai nnyi inɛ kãma ku maà wahalam má domi na irii Jesui ǹ ba dalai juju ŋa iyi à wa si aram nɔu ihɛ̃.

¹⁸ Iŋɛ inɛm ŋa, didɔ̃i Lafɛ̃ɛ nwa Jesu Kirisi ku wɛɛ do iŋɛ fei. Ami.