Wooda ku kɔsi 16 - Bibeli do fee

Jingaui Iku ku kua

¹ Si cukpa iyi à ya kpe Abibuu bɛ, i ya ce jingaui Iku ku kuau ŋa na bɛɛrɛi Aɔ̃ Lafɛ̃ɛ, domi si cukpau bɛ idũ akãɛi Aɔ̃ Lafɛ̃ɛ í fitaò ŋɛ hai ilɛi Ezibiti.

² Mɛɛmu ŋa iyi aa ceaò Aɔ̃ Lafɛ̃ɛ kuwee si waatii jingaui Iku ku kuau ŋa hai si inɔi angudã gaa nŋɛi aa nya ŋa, do iwo ŋa, walakɔ kɛtɛ ŋa. Aa ce kuweeui tengi bii Aɔ̃ Lafɛ̃ɛ í cica iriɛ ku wau.

³ Si waatii jingauu, i maà jɛ sɔnda iyi í nɛ levɛ̃ɛ ŋa. Si ajɔ mɛɛjeu, sɔnda iyi aa jɛ ŋa kãma ku maà nɛ levɛ̃ɛ. Iyi bɛi á ye ŋɛ gigii yaase bɛi ì fitaò wa hai ilɛi Ezibiti do saasa ŋa. Waati iyi ì waa jɛ pɛ̃ɛi wahalau bɛ ŋa, waati bɛɛbɛ aa ya ye gigii ajɔ iyi ì fita wa hai ilɛi Ezibitiu ŋai si kuwɛɛ nŋɛ fei.

⁴ Si afei ajɔ mɛɛje ŋau bɛ, a kù nɛ a yɛ baa ilai levɛ̃ɛ bi tu ŋɛ si ilɛ nŋɛu fei. Iyi í jɛ ti iŋai mɛɛmu iyi aa ceò kuweei alɛu, a kù nɛ a jilɔɔ iju ku má ku baa.

⁵ I kù nɛ kpãai i ce jingaui Iku ku kuau baa si akãi ilu iyi Aɔ̃ Lafɛ̃ɛ í mu nŋɛ i buba si ŋau.

⁶ Aa coo ŋai tengi bii nŋu takaɛ í cica, bii iriɛ á wau. Aa ce kuweeu ŋai alɛ zakai kulɔi inunu, waatɔ zakai isɔ bɛi ì fita wa hai ilɛi Ezibiti ŋau.

⁷ Aa se iŋau ŋai nɔ i ŋɔɔ tengi bii Aɔ̃ Lafɛ̃ɛ í cicau. Bii iju í má, nɔ i sinda i nyi si ilei acɔ nŋɛ ŋa.

⁸ Zakai ajɔ mɛɛfau, pɛ̃ɛ hai nɛ levɛ̃ɛi aa maa jɛ ŋa, nɔ si ajɔ mɛɛjesiau aa tɔtɔɔ ŋai si wajui Aɔ̃ Lafɛ̃ɛ nŋɛ na bɛɛrɛɛ. Ajɔ nŋu bɛ i kù nɛ icɛ kãma ku ce ŋa.

Jingaui Amaajɛ sinte ŋa

⁹ Hai ì sinti amaajɛ nŋɛ ŋa ku da ŋa gbakã, azuma mɛɛjei aa ka ŋa.

¹⁰ Si anyiɛ nɔ i ce jingaui Amaajɛ sinte ŋau ŋa, nɔ i cea Aɔ̃ Lafɛ̃ɛ amua ŋa zaka bɛi jiida iyi í ce nŋɛu í to.

¹¹ Aa kpɛ̃ inɔ didɔ̃ nŋɛi si wajui Aɔ̃ Lafɛ̃ɛ, tengi bii nŋu takaɛ í cica iriɛ ku wau iŋɛ do ama nŋɛ ŋa do woo ce icɛ inɛmɔkɔ walakɔ inaabo ŋa iyi à wa kpasɛ̃ nŋɛ, do inɛi Levii ŋa iyi à wa inɔ ilu nŋɛ ŋa, do inɛ njoo, do kɔyɔ, do jaaɔ̃ ŋa iyi à wa inɔ ilu nŋɛ ŋau.

¹² I ye gigii iyi ì tako ì jɛ aru ŋa wo si ilɛi Ezibiti. Na nŋu, i jirima wooda ŋau ihɛ̃, nɔ i ceò icɛ ŋa.

Jingaui Kusu ŋa

¹³ Waati iyi ì kpokpo amaajɛi ilɛ nŋɛ ŋau ì tã ŋa, nɔ ì fɔ̃ inyii rezɛ̃ɛ nŋɛ ŋau ì tã ŋa, aa jɛ jingaui Kusu ŋai ajɔ mɛɛje.

¹⁴ Aa ce jingauu ŋai do inɔ didɔ̃ iŋɛ do ama nŋɛ ŋa do woo ce icɛ inɛmɔkɔ do inaabo nŋɛ ŋau do inɛi Levii ŋa do inɛ njoo ŋa do kɔyɔ ŋa do jaaɔ̃ ŋa iyi à wa si inɔ nŋɛ ŋau.

¹⁵ Jingauu bɛ iyi aa ce ŋa na bɛɛrɛi Aɔ̃ Lafɛ̃ɛ nŋɛ, aa coo ŋai ajɔ mɛɛje tengi bii Aɔ̃ Lafɛ̃ɛ takaɛ í cicau. I jɔ̀ inɔ didɔ̃ nŋɛ ku kɔ̃ ŋa, domi Aɔ̃ Lafɛ̃ɛ á wee si amaajɛ nŋɛ ŋau do si icɛ nŋɛ iyi ì waa ce fei ŋa.

¹⁶ Si adɔ̃ akã fei, inɛmɔkɔ ŋa aa koo si wajui Aɔ̃ Lafɛ̃ɛi bɛi isɛ gbɛɛta tengi bii í cicau, si waatii jingaui Pɛ̃ɛ hai nɛ levɛ̃ɛ ŋau do si waatii jingaui Amaajɛ sinte ŋau do si waatii jingaui Kusu ŋau. Nɔ a kù nɛ a koo si wajui Aɔ̃ Lafɛ̃ɛ awɔ ngbɛ.

¹⁷ Amma inɛ fei á ya kooò amuaɛi zaka bɛi á yɔkɔ si bɛi Aɔ̃ Lafɛ̃ɛ í weea í to.

Wooda ŋa iyi à jɛ ti kiiti

¹⁸ Si ilu ŋa iyi Aɔ̃ Lafɛ̃ɛ nŋɛ á mu nŋɛ fei, aa cica woo kiiti ŋai do inɛ ngbo ŋa si dimi do dimi iyi aa ya kiiti zamaau dee dee bi anu koofai iluu.

¹⁹ I maà ya ce kiitiu do baai a sã nŋɛ ngɔgɔ, nɔ i maà ya na kubi ntɔ ŋa, i maà ya gba amuai inɛ kãma ŋa, domi amua ŋau bɛ í ya jɔ̀ ilu bisi ŋau à fɛɛjui, nɔ ku bɛjɛ idei woo kiiti ŋau.

²⁰ Aa ya too ntɔu ŋai dee dee ku ba i wɛɛ si hunde ŋa nɔ i ba ilɛ iyi Aɔ̃ Lafɛ̃ɛ nŋɛ á mu nŋɛu.

Kucei Ilaaɔ̃ ku tɔɔ gɔ ŋa iyi à ganji

²¹ I maà ya gũa iwɛ̃ iyi à ya kpe Aserau jĩi kãma kɔkɔi bi kuwee iyi ì maa Aɔ̃ Lafɛ̃ɛ nŋɛu ŋa,

²² nɔ i maà jilɛ kuta kãma ku jɛ iwɛ̃ nŋɛ si afeu bɛ má ŋa, domi Aɔ̃ Lafɛ̃ɛ nŋɛ kù bi mii dimi bɛɛbɛ ŋau bɛ.