Kɔrɛnti 2, 10 - Bibeli do fee

Pɔlu wa kɔ̀ò araɛ na icɛɛ

¹ Amu Pɔlu, amu takam nii ǹ wa n fãa ŋɛ, amu iyi à ni ǹ ya n kaye aram bii ǹ wa bi tu ŋɛ, bii ǹ jĩò ŋɛ nɔ n ba ŋɛ ide ku fɔ do kulele. Amma do daa didɔ̃i Kirisi do jiida ku jɛɛi ǹ wa n tɔɔ ŋɛ

² i maà tilasim n ba ŋɛ ide ku fɔ do kulele waati iyi an na n to wa bi tu ŋɛ, domi bɛɛbɛi ǹ dasi idɔ n cea inɛ gɔ ŋa iyi à waa ni idɔɔbii ara nwai à waa ce.

³ Ntɔi, à wa si ara, amma a kù waa jabu do idɔɔbii ara.

⁴ Jĩnɛi igũ ŋa iyi à waa jabuò kù jɛ ti andunya, amma gbugbãi Ilaaɔ̃i iyi á jɔ̀ ka kɛkɛ bindi ŋa ka kpaò irii lasabui amanɛ

⁵ do dimii ara ku so iyi inɛ ŋa à nɛ fei à waa jãò ide ntɔi Ilaaɔ̃. Nɔ do nŋui à waa kãmiaò lasabu fei ku ba a jirima Kirisi.

⁶ À nɔ à tã sɔɔlu ka kpã inɛ ŋa iyi a kù waa jirima ideu fei iju waati iyi ì na ì waa jirimaɛ dee dee ŋa.

⁷ I jɔ̀ i cɔ mii ŋa iyi ì waa yɛ si waju nŋɛ. Bii inɛ gɔ í mà kãm kãm iyi nŋu í jɛ ti Kirisi, ku mà si idɔɛ iyi bɛɛbɛ mɔi awa mɔ à jɛ ti Kirisi.

⁸ Lafɛ̃ɛ í mu nwa yiiko ku ba ka mu nŋɛ gbugbã, kù jɛ ka kɛkɛ ŋɛ. Nɔ baa bii fufu ku tɔɔ nwa í la keeke na yiikou n kaa n yɛ anyɔ.

⁹ N kù bi a ni ǹ wa n da zigi nŋɛ do tiam ŋa.

¹⁰ Ntɔ ntɔ, inɛ ŋa à ya ni tiam í lele nɔ í gaabu, amma bii ǹ wa inɔ nŋɛ n ci ya nɛ gbugbã, ide ku fɔm ci ya nɛ bɛɛrɛ.

¹¹ Inɛ iyi wa fɔ bɛɛbɛ í sĩa ku mà iyi ihɛ̃. Do yaase bɛi à waa kɔ si tia nwa bii a kù wa bɛ, do yaase bɛɛbɛ mɔi kuce nwa á yɛ waati iyi aa ka wa bi tu ŋɛ.

¹² Ntɔi, a kaa ka jɛ ka wã ara nwa do inɛ ŋa iyi à ya maa so ara nŋa lele hee ka jɔ ŋa. Inɛ nŋu ŋau a kù nɛ bisi domi à so ara nŋa í baa í jɛ mii ku wã njɛ, nɔ à ya maa wã njɛ aŋa duusɔ̃ɔ.

¹³ Amma awa, a kaa ka tɔɔ fufu si mii iyi a kù nɛ kpãa ka tɔɔò fufu. Si icɛ iyi Ilaaɔ̃ í jilɛ nwa ku cei aa ka tɔɔò fufu, nɔ iŋɛi ì jɛ ribai icɛ nwa.

¹⁴ Ntɔ ntɔ, awai à naa nŋɛ laabaau jiidau wa. Bii kù jɛ bɛɛbɛ wo, a kaa ka nɛ kpãai fufu ku tɔɔ.

¹⁵ Si bɛɛbɛ, a kù waa tɔɔò icɛi inɛ gɔ fufu. Amma à waa cɔ kpãa, si bɛi naanɛ ku dasi nŋɛ í la wa kɔ̃ɔsi, icɛ nwa mɔ á na ku kɔ̃ɔsi si anini nŋɛ

¹⁶ ku ba ka yɔkɔ ka bɔò laabaau jiidau si ilɛ ŋa iyi à wa waju nŋɛ, ku maà ti ku jɛ do fufu ku tɔɔ na saabui icɛ iyi inɛ gɔ ŋa à ce tã.

¹⁷ Kukɔi idei Ilaaɔ̃ wa fɔ, í ni, inɛ iyi wa tɔɔ fufu, ku tɔɔ fufu na Lafɛ̃ɛ.

¹⁸ Na nŋu, inɛ iyi wa cɔ araɛ inɛ jiida, kù jɛ nŋui Ilaaɔ̃ á saabu, í gbe inɛ iyi Aɔ̃ Lafɛ̃ɛ takaɛ wa cɔ inɛ jiida.