Kɔrɛnti 1, 15 - Bibeli do fee

Kujĩi Kirisi* hai si balɛ

¹ Iŋɛ inɛm ŋa, ǹ wa n ye ŋɛ gigii laabaau jiidau iyi ǹ sɔ̃ ŋɛ wo nɔ ì gbaa ŋa, ì nɔ ì waa leekĩ si ŋa.

² Bii ì nɔ ì muu dim dim ŋa si bɛi ǹ sisi nŋɛu, faaba nŋɛi. Amma bii i kù muu dim dim ŋa, inya ngbɛi ì dasi naanɛ ŋa.

³ Ide iyi í nɛ amboe í re nŋui ǹ sisi nŋɛ bɛ si bɛi à daam si awɔ. Ideu wee. Kirisi í ku na irii dulum du wa si bɛi kukɔi idei Ilaaɔ̃ wa fɔ.

⁴ À suu nɔ í jĩ hai si balɛ si ajɔ mɛɛtasia si bɛi kukɔi idei Ilaaɔ̃ wa fɔ.

⁵ Í tusɛ araɛ bi Piɛɛ, si anyii nŋu nɔ í tusɛ araɛ bi mɔcɔ maateejiɛ ŋau.

⁶ Si anyii nŋu, í bɛi í koo í tusɛ araɛ bi mɔcɔɛ ŋa iyi à re baa amanɛ cĩɔ miiuu. Nkpɔ nŋa í wɛɛ baa nsɛi, amma inɛ gɔ ŋa à ku.

⁷ Nɔ í koo í tusɛ araɛ má bi Zaaki, si anyiɛ í bɛi í koo í tusɛ araɛ bi woo bɛ ŋau fei.

⁸ Si anyii aŋa fei í bɛi í tusɛ araɛ bi tom, amu iyi ǹ yɛ bɛi inɛ iyi cukpai kubíɛ kù kɔ̃ à bɛi à búu.

⁹ Ntɔ ntɔ, amui ǹ jɛ keekei woo bɛ ŋau. N kù to a kpem woo bɛ, domi ǹ kpã inɛi igbɛi Ilaaɔ̃ ŋa iju.

¹⁰ Amma mii iyi ǹ jɛ nnyi, na didɔ̃i Ilaaɔ̃i, nɔ didɔ̃ iyi í ceem nɔu kù ce nfe. Ǹ ce kookaai ǹ re baa woo bɛ ŋau fei, amma kù jɛ amu takam nii ǹ coo, didɔ̃i Ilaaɔ̃ iyi í wa sim nii í coo.

¹¹ Na nŋu, ide akãui awa fei à waa waazo bɛ, nŋu mɔi ì nɔ ì dasi naanɛ ŋa bɛ.

Kujĩ nwa hai si balɛ

¹² Nsɛi à waa waazo iyi Kirisi í ku nɔ í jĩ hai si balɛ má. Nɔ bɛirei í ce inɛ gɔ nŋɛ ŋa à ya ni iku ŋa a kaa jĩ má.

¹³ Bii iku ŋa a kaa jĩ hai si balɛ, debɛi Kirisi mɔ kù jĩ.

¹⁴ Nɔ bii Kirisi kù jĩ, waazo nwa ngbɛi, nɔ naanɛ ku dasi nŋɛ mɔ ngbɛi.

¹⁵ Bii í jɛ ntɔi iku ŋa a kaa jĩ hai si balɛ, debɛi Ilaaɔ̃ kù jĩ Kirisi wo. Debɛi, sɛɛda iboi à waa jɛa Ilaaɔ̃ si waati iyi à ni í jĩ Kirisi hai si balɛ.

¹⁶ Ntɔ ntɔ, bii iku ŋa a kaa jĩ, Kirisi mɔ kù jĩ wo.

¹⁷ Nɔ bii í jɛ Kirisi kù jĩ hai si balɛ wo, ì kɔ̀ ì wa si dulum du ŋɛi, nɔ naanɛ ku dasi nŋɛ ngbɛi.

¹⁸ Nɔ inɛ ŋa mɔ iyi à dasi Kirisi naanɛ à bɛi à ku, à ce nfei.

¹⁹ Bii na kuwɛɛu ihɛ̃ nŋu akãi à dasi Kirisi naanɛ, à jɛ ilu araare ŋa í re baa inɛ fei.

²⁰ Amma ntɔ ntɔ Kirisi í jĩ hai si balɛ, nɔ í jɛ inɛ sinte si inɔi inɛ ŋa iyi aa na a jĩ.

²¹ Iŋɛ fei ì mà ŋa iyi iku í naai hai bi inɛ akã. Bɛɛbɛ mɔi kujĩi iku ŋa í naa hai bi inɛ akã.

²² Ntɔ ntɔ, si bɛi ara akã nwa do Adamu í jɔ̀ awa fei aa ka na ka ku, bɛɛbɛ mɔi anu akã nwa iyi à ce do Kirisi á jɔ̀ awa fei ka jĩ hai si balɛ,

²³ amma inɛ fei do waatiɛi. Sinte Kirisii, si anyii nŋu inɛ ŋa iyi à jɛ titɛɛ si waati iyi á nyi wa.

^24-25 Si anyiɛ, iri ku kpai andunya á to wa, nɔ kù nɛ bɛi á ce iyi Kirisi kù jɛ bomma nɔ ku kãmia mbɛɛɛ ŋau fei. Si anyiɛ nɔ ku so bommau ku daa Ilaaɔ̃ Baaba si awɔ. Ntɔ ntɔ, Kirisi á kpa irii ilu yiiko ŋa do ilu gbugbã ŋa do inɛ ngbo ŋau fei.

²⁶ Mbɛɛi ankãanyi iyi Kirisi á kpa, nŋui í jɛ iku.

²⁷ Si tiai idei Ilaaɔ̃ à kɔɔ à ni, Ilaaɔ̃ í daa mii fei si awɔ. Amma baa bii kukɔu í ni bɛɛbɛ, kù jɛ do Ilaaɔ̃ takaɛ iyi í jɔ̀ mii fei wa sũaa iri ilɛui wa fãa.

²⁸ Nɔ waati iyi á daa Kirisi mii fei si awɔ, nŋu iyi wa jɛ Amau, á so araɛ ku daa Ilaaɔ̃ si awɔ, ku ba Ilaaɔ̃ ku wa si antaii mii fei.

²⁹ Ntɔi, Kirisi í jĩ hai si balɛ. Bii kù jɛ bɛɛbɛ, inɛ ŋa iyi à ce inyi ku dasi si agbɛi iku ŋa, aranfãani yoomai à waa ba. Bii í jɛ ntɔi iku ŋa a kaa jĩ, na mii í ce inɛ ŋa à ce inyi ku dasi si agbɛ nŋa.

³⁰ Awa taka nwa, na mii í ce à ya kaa maa wa si kpãai mbiisi waati kãma fei.

³¹ Iŋɛ inɛm ŋa, ajɔ fei si anui ikui ǹ ya n maa n wa. Nɔ ntɔ ntɔ bɛɛbɛi, si bɛi ì mà ŋa ntɔ ntɔ iyi ǹ wa n tɔɔ fufu na saabu nŋɛ si Lafɛ̃ɛ nwa Jesu Kirisi.

³² Inɛ ŋa iyi à kɔ̀sim Efɛɛzu bɛ à yɛi bɛi mɛɛmui sako ŋa iyi awaò ŋa à waa jabu. Aranfãani yoomai ǹ nɛ bii í jɛ ǹ wa n jabui na didɔ̃i andunyau ihɛ̃ nŋu akã. Bii í jɛ iku ŋa a kaa jĩ, ka jɛ nɔ ka mɔ domi ala aa ka ku.

³³ I maà ya jɔ̀ a dĩ iju nŋɛ. Kpaasi laalɔ, í ya jɔ̀ inɛ ku sindai hai si kpãa jiida.

³⁴ I jɔ̀ laakai jiida nŋɛ ku nyi wa si bɛi á sĩa, nɔ i jɔ̀ kookoosui dulum. Inɛ gɔ nŋɛ ŋa a kù mà Ilaaɔ̃ do ntɔ. Ǹ wa n fɔ iyi bɛi ku ba anyɔ ku mu ŋɛ.

Ara titɔ̃ iyi aa ka jĩò hai si balɛ

³⁵ Ǹ mà inɛ gɔ ŋa aa bee a ni, bɛirei iku ŋa aa ce a jĩ. Dimii ara mii aa nɛ.

³⁶ Amma an jɛ nŋa n ni i kù nɛ bisi ŋa. I mà ŋa iyi bii ì gbɛ̃ ngboi mii gɔ kaa fita bii kù jɛ í ku.

³⁷ Mii iyi amanɛ wa gbɛ̃ fei dimii ngɔgɔi í ya jɛ, bɛi ijui iya, walakɔ ngɔgɔ. Kù jɛ kpokpoo takaɛi aa tu wa i naa i lɔ.

³⁸ Nɔ Ilaaɔ̃ í na dimi ŋau fei ara ikã ikã si bɛi í bi, í na ngboi mii fei araɛ ikã ikã.

³⁹ Mii ŋa iyi à waa mi fei, iŋai ara nŋa kù jɛ dimi akã. Ti amanɛ ŋa ikã, ti mɛɛmu ŋa ikã, ti yɛi ŋa ikã, ti cɛ̃ɛ ŋa mɔ ikã.

⁴⁰ Arai lele í wɛɛi, ti andunya mɔ í wɛɛi. Arai lele í nɛ kusĩaɛi, nɔ ti andunya mɔ í nɛ tɛɛi.

⁴¹ Inunu í nɛ kusĩaɛi, nɔ cukpa mɔ í nɛ tɛɛi do leleaɔ̃ ŋa. Nɔ baa si inɔi leleaɔ̃ ŋau à re njɛ do kusĩa.

⁴² Bɛɛbɛ mɔi á yɛ si waati iyi Ilaaɔ̃ á jĩ iku ŋa. Ara iyi à siu, ara iyi á bɛjɛi, amma bii à jũu kaa bɛjɛ má.

⁴³ Bii à suu ci ya nɛ bɛɛrɛ, amma bii à jũu ilu jirima nlai. Bii à suu, hai nɛ gbugbãi, amma bii à jũu á nɛ gbugbã.

⁴⁴ Bii à suu, arai ilɛi, amma bii à jũu ti lelei á jɛ. Ntɔ ntɔ, arai ilɛ í wɛɛ, nɔ bɛɛbɛ mɔi arai lele mɔ í wɛɛ.

⁴⁵ Bɛɛbɛ mɔi à kɔɔ à ni, waati iyi à taka Adamu sinte à daa si kuwɛɛ, amma Kirisi iyi à ya kpe Adamui ankãanyiu, nŋui í jɛ hunde nɔ nŋui í ya daa inɛ ŋa si kuwɛɛ.

⁴⁶ Kù jɛ arai lelei í tako í naa, arai ilɛui, ti leleu í bɛi í naa.

⁴⁷ Adamu sinteu, í naai hai si ilɛ nɔ í jɛ sãa. Adamu minjisiau í naai hai lelei Aɔ̃.

⁴⁸ Inɛ ŋa iyi à jɛ ti ilɛu ihɛ̃ fei à yɛi bɛi inɛ sinte iyi à taka do sãa. Nɔ inɛ ŋa iyi à jɛ ti lelei Aɔ̃ à yɛi bɛi inɛ iyi í naa hai lelei Aɔ̃.

⁴⁹ Nɔ si bɛi à jɔ inɛi ilɛu, bɛɛbɛ mɔi aa ka jɔ inɛi leleu.

⁵⁰ Iŋɛ inɛm ŋa, iyi ihɛ̃i ǹ wa n fɔ, arai ilɛ kaa yɔkɔ ku ba ikpɛ̃ɛ si bommai Ilaaɔ̃. Nŋu iyi í jɛ ti iku kaa yɔkɔ ku ba kuwɛɛ hai tã.

⁵¹ Idei asii wee iyi ǹ wa n sɔ̃ ŋɛ. Awa fei sisi aa ka ku, amma Ilaaɔ̃ á kpaasi awa fei

⁵² gbakã, si iju kãmɛɛ akã, waati iyi kãakãakĩi ankãanyi á kpata. Waati iyi kãakãakĩi ankãanyiu á kpata Ilaaɔ̃ á jĩ iku ŋa nɔ a kaa ku má, nɔ ku kpaasi awa mɔ.

⁵³ Ntɔ ntɔ, ara iyi á bɛjɛu kù nɛ bɛi á ce iyi kù kpaasi iyi ci ya bɛjɛ. Nŋu iyi í jɛ ti iku, kù nɛ bɛi á ce iyi kù kpaasi iyi ci ya ku.

⁵⁴ Nɔ waati iyi ara ku bɛjɛu á kpaasi iyi kaa bɛjɛ, nɔ ti iku mɔ ku kpaasi iyi kaa ku, waati bɛɛbɛi ide iyi à kɔu á ce, iyi í ni, Ilaaɔ̃ í kãmia iku mam mam.

⁵⁵ Iku, hee iwoi igũ ku jɛɛ í wa. Iku, hee iwoi gbugbãɛ í wa.

⁵⁶ Iku kaa nɛ gbugbã wo bii kù jɛ na dulum, nɔ dulum mɔ kaa nɛ gbugbã wo bii kù jɛ na wooda.

⁵⁷ Amma ka saabu Ilaaɔ̃, nŋu iyi í jɔ̀ à jɛ igũ na saabui Lafɛ̃ɛ nwa Jesu Kirisi.

⁵⁸ Na nŋu, iŋɛ baakɔɔm ŋa, i leekĩ dim dim i maà tɛkɛɛ ŋa. I ce kookaai si icɛi Lafɛ̃ɛ do ajɔ fei si na iyi í jɔ̀ ì mà ŋa icɛ iyi ì waa cea Lafɛ̃ɛ kaa ce nfe ŋa.