Kɔrɛnti 1, 14 - Bibeli do fee

Idei amuai Hundei Ilaaɔ̃

¹ Na nŋu, kubii í sĩa i dɛdɛ ŋa. Nɔ i dɛ amua ŋa iyi Hundei Ilaaɔ̃ wa mu nwa, iyi í re mɔm nŋui í jɛ walii ku ce.

² Inɛ iyi wa fɔ ide do fee iyi kù waa gbɔ, Ilaaɔ̃i wa ba ide ku fɔ, kù jɛ amanɛ, domi inɛ gɔ kù waa gbɔ ideɛ. Amma idei asiii wa fɔ do gbugbãi Hundei Ilaaɔ̃.

³ Amma inɛ iyi wa ce walii amanɛ ŋai wa ba ide ku fɔ. Í ya jɔ̀ a leekĩ si naanɛ ku dasi dim dim, nɔ ku mu nŋa gbugbã, nɔ ku tũ inɔ nŋa.

⁴ Inɛ iyi wa fɔ ide do fee iyi kù mà, naanɛ ku dasii nŋu takaɛi wa mua gbugbã. Amma walii, inɛi igbɛi Jesu ŋai wa mua gbugbã.

⁵ Á dɔ̃ɔm si bii iŋɛ fei ì waa fɔ ide do fee ŋa iyi i kù waa gbɔ ŋa, amma iyi ǹ wa n bi wa re, nŋui í jɛ i ya maa ce walii ŋa. Ǹ ni bɛɛbɛi si na iyi í jɔ̀ inɛ iyi wa ce walii, icɛɛ í nɛ aranfãani í re inɛ iyi wa fɔ ide do fee ŋa iyi kù wa gbɔ, í gbe bii wa tusɛ ideui, ku bɛi ku mua inɛi igbɛi Jesu ŋa gbugbã.

⁶ Nsɛi, iŋɛ inɛm ŋa, aranfãani yoomai aa ba ŋa bii ǹ naa bi tu ŋɛ nɔ ǹ wa n fɔ fee iyi i kù waa gbɔ ŋa. I kaa ba aranfãani kãma ŋa. Amma bii ǹ sɔ̃ ŋɛ yaasei ide iyi Ilaaɔ̃ í sɔ̃m, walakɔ ǹ sisi nŋɛ idei kumà, walakɔ idei walii, walakɔ cio gɔ, inɛ nŋu á nɛ nŋɛ aranfãani.

⁷ Bɛɛbɛ mɔi, mii iyi kù nɛ kuwɛɛ bɛi yee do mɔɔlɔ, bii a kù waa cãa dee dee, bɛirei inɛ gɔ á ce ku gbɔ yaaseɛ.

⁸ Inɛ mɔ iyi wa cã gãgãi igũ, bii kù waa cãa dee dee, yooi á ce sɔɔlui igũ.

⁹ Bɛɛbɛ mɔi, bii kù jɛ ì waa fɔ fee iyi inɛ ŋa à mà ŋa, bɛirei aa ce a gbɔ yaaseɛ. Ide nŋɛ á nɛi si fufu.

¹⁰ Fee dimi ikã ikã nkpɔi í wa si andunya, nɔ kãmaɛ kù kua yaase.

¹¹ Do nŋu fei, bii n kù wa n gbɔ fee iyi à waa bam ku fɔ, inɛ iyi wa fɔɔu, dimi mmui í jɛ bi tom, nɔ amu mɔ ǹ jɛ dimi mmu bi lafɛ̃ɛ.

¹² Bɛɛbɛ mɔi iŋɛ mɔ, si na iyi í jɔ̀ ì waa dɛ amuai Hundei Ilaaɔ̃ ŋa, á sĩa i hanya i dɛdɛ amua ŋa iyi á jɔ̀ naanɛ ku dasii inɛi igbɛi Jesu ŋa ku bɔ waju.

¹³ Na nŋu, á sĩa inɛ iyi wa fɔ ide do fee iyi a kù waa gbɔ ku tɔɔ Ilaaɔ̃ amua iyi á tusɛò ideu.

¹⁴ Bii ǹ wa n ce kutɔɔ do fee iyi n kù wa n gbɔ, hundem nii wa ce kutɔɔ, amma lasabum kù waa ce nkãma.

¹⁵ To, nsɛi, bɛirei an ce. An ce kutɔɔ do hundem do lasabum ajɔ. An kɔ̃ iri do hundem do lasabum ajɔ.

¹⁶ Bii do hunde nŋu akãi ì waa saabu Ilaaɔ̃, bɛirei inɛ ŋa iyi à gbe aa ce a ni ami si kutɔɔɛ. Kaa ce, domi a kù mà iyi ì waa fɔ.

¹⁷ Baa bii kutɔɔɛ í sĩa, kaa mua lafɛ̃ɛ ŋa gbugbã.

¹⁸ Ǹ wa n saabu Ilaaɔ̃ si na iyi í jɔ̀ ǹ ya n fɔ fee ŋa iyi inɛ ŋa a kù waa gbɔ ǹ re iŋɛ fei.

¹⁹ Amma si igbɛi inɛi Jesu ŋa ǹ gbasi n fɔ ide icu miiu do yaase n kɔa inɛ ŋa si cio do iyi an fɔ ide icu dubu mɛɛwa do fee iyi inɛ ŋa a kù waa gbɔ.

²⁰ Iŋɛ inɛm ŋa, i maà ya wũa ide bɛi ama keeke ŋa má ŋa. Bii í jɛ idei laalɔ ku cei, í sĩa i yɛ bɛi ama keeke ŋa iyi a kù mà laalɔ ku ce, amma si kpãai ide ku wũa i jɔ̀ i yɛ bɛi inɛ ngbo ŋa.

²¹ Si tiai woodai Ilaaɔ̃ à kɔɔ à ni, Lafɛ̃ɛ í ni, an jɔ̀ isɛ mmu ŋa a ba inɛ ŋau ihɛ̃ ide ku fɔ do fee mmu. Amma do nŋu fei, a kaa gbɔ idem.

²² Amuai ide ku fɔ do fee iyi inɛ ŋa a kù waa gbɔ, nyindai í jɛ bi hai dasi Jesu naanɛ ŋa, kù jɛ bi woo dasi naanɛ ŋa. Amma amuai walii ku ce, nŋui í jɛ nyinda bi woo dasi Jesu naanɛ ŋa, kù jɛ bi hai dasi naanɛ ŋa.

²³ Na nŋu, bii inɛi igbɛi Jesu ŋa fei à tɔtɔɔ, nɔ inɛ fei ku lɔsi ku fɔ fee iyi inɛ ŋa a kù waa gbɔ, bii inɛ titɔ̃ ŋa walakɔ hai dasi Jesu naanɛ ŋa à lɔ wa, a kaa ni ì waa sũmu ŋai?

²⁴ Amma bii inɛ fei wa ce walii, bii hai dasi naanɛ gɔ í lɔ wa walakɔ inɛ titɔ̃ gɔ, ideu á tosi idɔɛ nɔ ide iyi inɛ ŋa à waa fɔu ku jɔ̀ ku mà dulum dɛɛ.

²⁵ Nɔ lasabuɛ á fita gbugbã, nɔ ku gulɛ ku tɔɔ Ilaaɔ̃ ku ni, ntɔi, Ilaaɔ̃ í wa si anini nŋɛ.

Yaase jiida si kutɔtɔɔ

²⁶ Na nŋu, iŋɛ inɛm ŋa, bɛirei aa ka ce. Bii ì waa tɔtɔɔ ŋa inɛ gɔ nŋɛ ŋa aa nɛ iri ku kɔ̃, inɛ gɔ ŋa mɔ cio ku kɔsi, inɛ gɔ ŋa mɔ idei Ilaaɔ̃ ku waazo, inɛ gɔ ŋa mɔ ide ku fɔ do fee iyi a kù waa gbɔ, inɛ gɔ ŋa mɔ yaasei fee ŋau ku tusɛ. Í sĩa i maa ce fei ndɛɛ ŋa ku ba ku mua inɛi igbɛi Jesu ŋa gbugbã.

²⁷ Bii inɛ gɔ ŋa à waa fɔ ide do fee iyi a kù waa gbɔ, kù sĩa a re amanɛ minji walakɔ mɛɛta nɔ á sĩa a fɔ ide akã akã, nɔ inɛ gɔ mɔ ku maa tusɛ ideu.

²⁸ Amma bii inɛ gɔ kù wa bɛ iyi á yɔkɔ ku tusɛ ideu, i jɔ̀ a coko si kutɔtɔɔu, nɔ ku jɛ Ilaaɔ̃i à waa ba ide ku fɔ.

²⁹ Inɛ ŋa iyi à waa ce walii, í sĩa ku jɛ amanɛ minji walakɔ mɛɛta, nɔ inɛ ŋa iyi à gbe a wusɛ ideu a cɔ.

³⁰ Bii Ilaaɔ̃ í nyisi inɛ gɔ ngɔgɔ si kutɔtɔɔu, i jɔ̀ inɛ iyi í tako wa fɔ ideu ku coko.

³¹ Iŋɛ fei aa yɔkɔ i ce walii akã akã ku ba inɛ fei ku ba ikɔ nɔ i ba gbugbã ŋa.

³² Í sĩa walii ŋa a ceò amua nŋa icɛ dee dee.

³³ Ntɔ ntɔ, Ilaaɔ̃ kù bi kuce hai nɛ yaase ku ya wa si kutɔtɔɔ nwa, í bi ka cooi si laakai ku sũ. Si bɛi inɛ ŋa à ya ce si igbɛi woo dasi Jesu naanɛ ŋa fei,

³⁴ í sĩa inaabo ŋa a ya coko bi kutɔtɔɔ. Kù sĩa a fɔ ide, amma a sũ iri ilɛ si bɛi wooda wa fɔ.

³⁵ Bii à bi a mà ngɔgɔ a ya bee mɔkɔ nŋa ŋa kpasɛ̃, domi kù jɛ dee dee inaabo ku maa fɔ ide bi kutɔtɔɔ.

³⁶ Hai bi tu ŋɛi idei Ilaaɔ̃ í sinti? Mà iŋɛ akãi ì gbaa ŋa.

³⁷ Bii inɛ gɔ í tamaa nŋu í jɛ walii, walakɔ wa tamaa nŋu í ba amuai Hundei Ilaaɔ̃, í sĩa ku jɛsi iyi ide iyi ǹ jɔ̀ nŋɛu woodai Lafɛ̃ɛi.

³⁸ Inɛ iyi kù jɛsi bɛɛbɛ a kaa gba lafɛ̃ɛ.

³⁹ Na nŋu, iŋɛ inɛm ŋa, i dɛdɛ amuai walii, nɔ i maà ti i ganji woo fɔ ide do fee iyi a ci ya fɔ si andunya.

⁴⁰ Amma i ce fei ndɛɛ dee dee do yaase jiida ŋa.