Markus 8 - Miyawa

Yesu ɨse Sɨbɨ zangu fɨɗɨ

¹ Ndɨ sɨno ndaɓɨ, niwi sɨbɨ caseni dɨ paghama tlɨn. Tlɨn dɨma hambatau. Je zara sɨba gyagiyakɨ niwasa Yesu a tirusɨ du,

² “Mɨna ta talulu nikin sɨbɨkɨn adama sɨno kidi jɨkɨn tlɨnde wute ɨna mɨn, conakɨn tlɨmma wɨham hambatau.

³ Mɨnka zuwa tlɨn dɨ batlɨna kan nda mai ka niwiya bi ɗɨvɨratlɨn ɗɨvɨra darhai, adama niwi bɨtlɨn a saar.”

⁴ Sɨba gyagiyakɨ niwasɨ dɨ gɨsa ndu, “Bada bɨ za ɨsayaka nikɨn sɨbɨ cas kɨn moyi ɗe vare takɨn tsakɨmu.”

⁵ Yesu dɨ tsiyatlɨn du, “Hɨna pɨktɨn mɨna?” Je tlɨne gɨsandu, tɨ matsɨr,”

⁶ Yesu dɨ zai sɨbɨ dɨ tsɨgatlɨna mɨdzai jete kiya pɨktɨn matsɨr ka, dɨ zhɨga Ghɨnsɨ, dɨ wakɨsau dɨ tsa sɨba gyagyiyakɨ niwasɨ dɨ tsa aya sɨbɨ, je ɗɨma wane te zaitlɨn.

⁷ Tlɨn da ghɨdɨ ndaɓa tiratlɨn,dɨmɨna tiya gila gham a Yesu, dɨ ɗɨnga sɨba gyagyiyakɨ niwasɨ dɨ tsa aya tlɨn.

⁸ Ndyam tlɨn je ta dɨ ɨsatlɨn. Daga mba tahɨ, sɨba gyagiyakɨ niwasɨ dɨ pakɨtla bɨrɨm hamba sɨlau dɨ wana badai matsɨr.

⁹ Dzafu bai baya zangu fuɗɨ eyai, je lɨɓetlɨnai.

¹⁰ Aɗɨka Yesu dɨ zusɨ ɗe kwatal ɨna sɨba gyagiyakɨ niwasɨ, dɨ batlina pakɨ ta Dalmanuta.

Donaka Ghɨrɨ ta Farisiyawa

¹¹ Niwi Farisiyawa dɨ buwatlɨna tɨra Yesu, dɨ dzakwa ta kɨ ɨna ti, tlɨn da lu dɨ gwaya ngwazar je tlɨne tsɨya Yesuwa ndu, “Gɨrama wɨham a dɨna aghɨnsa.

¹² Yesu dɨ kama shawu kulkulna du, “Madɨzai sɨbɨ ni conakɨn da dona nayaka ghɨrɨya? Mɨna bɨlana, a gashɨwan jika, wiya ghɨrɨ moyu mamɨn dabi gɨranau.”

¹³ Dɨ zuwatlɨn ɗɨka dɨ piya ɗe kwatalai, dɨ piyata wiya paka madzai.

¹⁴ Dɨ ma sɨba gyagyiyakɨ niwasaya a buwayaka pɨkɨtɨm zhɨkɨ dɨ ndɨ wutɨ ja kɨntlɨn ɗe kwatal.

¹⁵ Yesu dɨ kama kumayatlɨna ndu, “Ɗɨmɨ kɨɗa-kɨɗa ɨna pɨkɨtɨm na Farisiyawa ɨna na Hirudus.”

¹⁶ Dɨ kɨrma ɗɨnga vɨnatlɨnai du,“A bɨlama wankaka nda dama mima pɨkɨtɨmu.”

¹⁷ Ndyam Yesu sɨngan hanba tlɨn data ɗɨngaya gham, jete tsiyatlɨn du, “Madɨzai nadata takaya ndu nama pɨkɨtɨnmuwa? Har conakɨn na sɨnma ko na lɨkaima gama? Har conakɨn canna santama?

¹⁸ Hɨna ti nama ta naya? Hɨna kumai dɨ mama dɨkaya? Amanase?

¹⁹ Wokaci ba mɨne wakɨsa pɨkɨtɨm vatlɨ mɨn ɨsee sɨbɨ zangu vatlɨ, Na kɨrɨm bɨrɨm hamba sɨla badai mɨna? Dɨ gɨsaya ndu, “Bahɨn tsɨr.”

²⁰ Yesu dɨmɨna tsɨya tlɨna ndu, “Wokaci ba mɨne wakɨsa pɨkɨtɨm matsɨr adama sɨbɨ zangu fɨɗɨ ka, na kɨrɨm bɨrɨn hamba sɨla badai mɨna?” Dɨ gɨsaya ndu, “Matsɨr.”

²¹ Je tiye tsɨyatlɨn ɗa ndu, “Ama buwakɨ conakɨn na lɨkaima ɗaha?”

Yesu Lai Dɨbakodzɨhɨ na Betsaida

²² Yesu ɨna sɨba gyagyiyakɨ niwasɨ dɨ buwatlɨna Betsaida niwi sɨbɨ dɨ buwai wɨ dɨbakodzɨhɨ dɨ rawa Yesu dɨ tɨkɨnusɨ, dɨ laiya kwai.

²³ Yesu dɨ kwiya kɨn dɨbakodzɨhɨ dɨ bawatlɨna kyar vuwa gwahɨ gyaɓiya. Jete bɨtsaya naniki ata tiyusɨ dɨ vaya kɨnwasɨ, dɨ tsiyu sa ndu, “Fagata iya naya wɨhanwa?”

²⁴ Dɨ tla ghamusɨ dɨna dɨ gɨsa ndu, “Hoo mɨn gata naya sɨbabau ama tlɨn ndɨ wan dɨmmamau ata ndandɨmau.”

²⁵ Yesu dɨ mɨna va kɨnwasɨ ata tiyusɨ mɨnam dɨbakodzɨhɨ ka dɨ gɨta tiyusai tsa alasai, tɨ da ta nayai saɗaɗa.

²⁶ Yesu dɨ kama kumayusa ndu, “Fate zafa vuwagwahɨyu,” Dɨ kafusa kamai.

Bitrus ɗɨnga ndu Yesu ji Almasihu

²⁷ A ɗɨka Yesu ɨna sɨba gyagiyakɨ niwasɨ dɨ zatlɨna vuwa gwahɨyayo ta mbatla Kasariya Filibi. Tlɨn ndata darhɨ jɨka, Yesu dɨ tsiya tlɨn du, “Sɨba ta ɗɨnga ndu mɨn ji we?”

²⁸ Je tlɨne gɨsa ndu, “Niwiya ndu Yohanna bana ɗɨma baptisima, “Niwi du, “Fɨ Iliya” Niwi kwaya ndu fɨ wutɨ aɗe Annabawa niya shiyi.”

²⁹ Jete tsiyatlɨna ndu, “Hɨm kwa hɨna ta ɗɨnga ndu mɨn ji we? “Bitrus dɨ gɨsa ndu, “Fajɨ Almasihu.”

³⁰ Yesu dɨ kama kumayatlɨn du, “Nate bɨlawɨ ndɨrunu.”

Yesu ɗɨnga ndɨra Miyau Nusɨ

³¹ Yesu dɨ dzakwa gyagiyahiyatlɨna ndu, “Vɨrkɨsɨma bi sa kaitɨ tuwahɨ-tuwahɨ, gyaruni dɨ hiyusɨ, ɨna firisitoci gyaruni, ɨna sɨba gyagyiyaka doka. Dɨ tiya viyyusai ama ata sɨno na kida ka ta tlusɨ arayi.”

³² Aɗɨnga wankaka a mbel-mbel ɗe tlɨn. Daga dɨkaya wanka a Bitrus dɨ zara Yesu ngaaɗa ɗetlin dɨ dzakwa dabahiya ya.

³³ Ama Yesu dɨ dzigusɨ dɨ naya sɨba gyagyiyakɨ niwasɨ, dɨ daba Bitiris du, “Dzarkwai ɨna mɨn tɨmbɨzɨm ɗuwakɨ tafɨkɨn dɨma ta Ghɨnsu ama ndɨ ta vɨrkɨsɨn!”

³⁴ Aɗɨka Yesu dɨ zara sɨbɨ ndyam ɨna sɨba gyagyiyakɨ niwasa tirusɨ dɨ bɨlatlɨna ndu, “Ndyam ba tɨdalu dɨ ɗiyyunka kwa a hiya ghamusɨ dɨ kiya nge nusɨ dɨ ɗɨyun ɗɨ.

³⁵ Ndyam ba tɨdalu dɨ tacawur rayɨwasɨ ka ta kusɨkwau, ama ba dɨ kwa rayɨwasa damuwɨn ɨna dama ɗɨngɨ ma piyatɨka, atasu cawur rayiwasai.

³⁶ Sɨn kɨna mara ma, kabi mara dunɨya ndyam ama dɨkwa rayiwasaika?

³⁷ Wiham moyu batɨ de tsa asɨn dɨ pɨna rayiwasu.

³⁸ Ndɨ badɨ dɨkaya atsuwɨn ɨna gyagiyakɨ tɨwɨn ɗe nakɨn gwahɨ ba mbɨrsɨ ɨna ba lyapɨ, to Vɨrkɨ sɨma dɨkaya atsusɨ kabɨ busɨ ɗe gwalfu ta Busɨ ka ɨna malaʻiku sɨba cartɨ.”