Markus 7 - Miyawa

Asafi bana ɗɨma Sɨba kwambal

¹ -Daga paghama tlɨna tira Yesu a Farisiwa, ɨna niwi sɨbana ɗɨma gyagiyakɨ aghama doka na Musa sɨba buwatlɨna Urushalima,

² je tlɨne naya niwi sibana gyagiya tirusɨ ata ta hambatau, a kɨn bakwa bɨsau, wane na ɗɨma ɗe asafi na tlɨn.

³ (Da ma Yahudawa ɨna Farisiyawa tlɨnma ta hambatau awanakwa abɨsɨma kɨntlɨnu, adama ɗiyaka asafi na sɨba kwambal nitlɨn.

⁴ Kwa piya kasuka tlɨnma ta hambatau kwafa a bɨsɨ kɨntlɨn shɨɗɨ. Wɨ asafi natlɨn dɨ jeyi ba tlɨn da ɗiyau, wan bɨsaka ni tlɨrkaya bii, dakkɨman, ɨna kiɓaɓo, ɨna hambana cɨna e ɗiya hamba tau.)

⁵ Farisiyawa ɨna sɨba sɨna doka na Musa, dɨ tsiya Yesuwa ndu, “Ma zai sɨba gyagiyakɨ nifu tlɨma ta ɗiya asafi na sɨba kwambal nimauwa tlɨn da ta ta hambata kɨm bakwa bɨsau?”

⁶ Je gɨsa tlɨna ndu, “Hɨn sɨba mermati, aɗɨngɨ ma ɗɨnga Annabi Ishaya ghamana nda gashi, ma dɨ rɨdla ndu, “ ‘Nikin sɨbɨ kɨna ta zhɨgɨwun nda vɨnatlɨn, ama cantlɨn ja sar ɨna mɨn.

⁷ Tlɨna ta zhɨguwɨn nda mbam. Tlɨnda ta zɨmana a ɗingɨ ta sɨba ndu, aɗɨngɨ ta Ghɨnsɨ.’

⁸ Na zusu ɗiyaka doka na Ghɨnsai nada ɗiya asafi na sɨbɨ.”

⁹ Je ɗɨnga tlɨna ndu, “Na i, iya ngudlayaka ɗɨngɨ ta Ghɨnsɨ adama nada ɗiya asafi nana!

¹⁰ Ai Musa ɗɨnga ndu, ‘Fa tsa gyarweti gharahodzɨhɨ nahu, ɨna gharahodzaku tahu,’ dɨmɨna ɗɨnga ndu, Ndyam badɨ tabɨna gharahodzɨhɨ nusɨka ko gharaho dzaku tusɨka miyau ja pyenusɨ.’

¹¹ Ama hɨn hɨna ndu, “Sɨm kwa ɗɨnga gharahodzɨhɨ nusɨ, ko gharahodzaku tusa ndu, ndyam hamba dɨ mbɨna atsa hiyanaka (mɨn tsasu Ghɨnsai).

¹² Na hɨryasu jikai, e bɨra gharaho niwasɨ.

¹³ Nda ɗe wanka jena hɨnda ngudlai sɨbai ata ɗiyaka ɗɨngɨ ta Ghɨnsɨ, nada zetlɨne na ɗiya asafi nana nashiyi. Nada ɗɨma mbasaka kutatau vare nikya.”

Ham bana kɨmaya Sɨm

¹⁴ Jemɨna zara sɨbɨ du, “dɨkayi wan ndyanna, kuma na sɨnasɨnau.

¹⁵ Dɨma hamba dɨ zatlɨna vuwasɨm a vikan ji kɨmayusu, ama hambada bawatlɨna aɗe wasɨ ji kɨmayusɨ.”

¹⁶ [Batɨda kumai madɨkaya yuka ta dɨkai]

¹⁷ Daga dzarusai ɨna sɨbɨ, dɨ zusa kamai, sɨbana gyagiya tirusɨ je tlɨne tsɨyusɨ zhamata na ka vɨna do ka.

¹⁸ Jete bɨla tlɨn du, Ase hɨmma na sɨmma? Ase na sɨmma ndyam hamba zatlɨna vuwa Sɨm a vikanka dɨma tlɨnji ham bana kɨmayusa?

¹⁹ Ai azatlimma ɗe canwasu, azatlɨna vuwusɨ, kwa ɗɨmaka tlina bawatlɨm bawai nda?” (A dama wanka Yesu hɨrma tahɨya kowaiya varai tahɨyu.)

²⁰ Je mɨna ɗɨnga tlɨna ndu,“Hambana bawalɨna ɗe Sɨm ji hamba na kɨmayusɨ.

²¹ Domacin a ɗahɨ, wato, aɗe canwasɨ, jena bawatlɨn a divina kutɨ, wan ni kwacakɨ, akir, Barayaka dugwam, kiyaka gham, zɨmaka sɨbɨ, ɨna ɗiyaka tɨvam,

²² Fa kwaɗi a gɨrgɨr vu,haɗama, kalayaka sɨbɨ, ɨna ɗɨmaka mermeti, ɨna kwahɨya gaskewatɨ ɨna shirhɨ, ɨna kiyaka ɗɨngɨ ɨna garu ɗɨngɨ ɨna kalakɨ.

²³ Ndyam nikya divina kutatauka tlɨna bawa tlɨna ɗahɨ, tlɨn ji hamba na kɨmaya Sɨm.

Tsahɨya Gaskewatɨ ta wiya Am

²⁴ A ɗika Yesu dɨ tlusai dɨ busa a dara Taya ɨna sidom. Je zusɨ ɗe wikam, tɨma lu wi dɨ sɨnau, ndyan ɨna wanka apuwatamau.

²⁵ Nda dliya dli wiya Am dɨ sukɨnai, ma wuntaza gyaɓiya da tɨmbɨzɨm, daga dɨkaya ndɨrusɨ je bawaza ɓɨgaza bɨɗusɨ.

²⁶ An ka Helinawa dzaku, ta varena Siriyanfonikiya. Nji data rawa Yesu wa ndu, ta bawai kwai tɨmbɨzɨmka ɗe wuntaza.

²⁷ Yesu dɨ ɗɨngatla ndu, “Witlimi niya kam ta ɨsɨtlɨn ɨsa shɨɗɨ, a dama a mbɨnama fa kiya tahi ta wutlimi niyakam fatsa iyuwu.”

²⁸ Ama dɨ gɨsa ndu, “Nji wanka Bakam, ama Iyu ga para bɨrɨn witlimi.

²⁹ Je ɗɨnga tla Yesu du, “Adama takɨn ɗɨngɨ, ma ma gɨsankɨn piya kamai tɨmbɨzɨm dzarta sai awun toom.”

³⁰ Je njiye piyakamai amara wuntaza epiyawa ta dlar tɨmbɨzɨm botasa ɗe za.

Yesu lai sɨm bana kwa dɨ kayau

³¹ Dage piya vuwa gwahi ta Taya je bawusa Sidom, je dawusa vina madzɨ gyarya ta Galili a dara pakɨ ta Dɨkapolis.

³² Niwi sɨbɨ je biyaya wi bana kwa dɨkayau ba ndankɨ, dɨ rawa Yesu du, ta ar kwai kunwasa ghama sɨnka dɨ laiyai.

³³ Je kiyusa Yesu dɨ beɗyatlina aɗe sɨbɨ, je tsakɨfa vɨrkɨ kɨnwasa kumaya bana kwa dɨkaya ka dɨ babɨtsa nyanikɨ dɨ tɨkɨna shɨnakɨ bana kwadɨkayaka.

³⁴ Je tla ghamusɨ dɨna dɨ ara canwasɨ du, “Iffata!” Ja ndu (“Gɨtɨkɨmai!”).

³⁵ Dɨ gɨtazaya kumayusɨ dɨ babɨtusaya shɨnakɨwasɨ, dɨ dzakwa ɗɨngai saɗaɗa.

³⁶ Yesu dɨ gɨtlatlɨna ndu, “Na te bɨla wiyu, kwaya gɨtlatlɨn a ɗɨngusɨ kwaya ɓandaza.

³⁷ Sɨbɨ dɨ naya-naya ghɨri zhɨkɨ, tlɨnda ɗɨnga ndu, “Ndyam hamba tiye ɗɨmmau ndɨ saɗaɗa! Harma dazai sɨbana kwa dɨkaya ɗɨngɨ da dɨkayai, sɨba tlɨnda ndankɨ tlɨmma da ɗɨngaɗɨngai.”