Markus 6 - Miyawa

Sɨbɨni Nazarat hiya Yesu

¹ Yesu dɨ tlusa ɗɨka dɨ piya vuwagwahi husai, sɨba gyagiyakɨ niwasɨ ma dɨ ɗiyusɨ.

² Dage ɗama Mukwa sawakɨ, dɨ dzakwa gyagiyakɨ a Bali ta tlɨn mana pagham, Sɨbabau cassɨ dɨ dɨkayusɨ dɨ naya-naya ghɨrɨya ɗɨngɨ tusɨ. Da tsatsiyaya tsafayatlɨna ndu, “Nakɨn sɨnkɨn amar nɨkɨnkutato kɨnayikwa jiwan kɨna? Amar nakɨn nineti kɨn ayikwa? Wa tsaya? Tata ɗima vare waiya ghɨrɨ ji wankɨna?

³ Awai dɨma ti ji naka ba tsawaɗɨ ko nda? Dɨma ti ji vɨrkɨ na Maryamu wu nda, yasɨ ni Yakubu ɨna Yahuza ɨna Saminu wuwa? Awai dɨma dawan wasɨ tɨvan ka je wute ɨna mikɨnu nda?” Je mbasa tlɨna ndɨrusɨ.

⁴ Je ɗɨnga tlɨna Yesuwa ndu, “Ai Bacan na Ghɨnsɨ ma kwa gyarwatu kwapa da vuwa gwahi husɨ, ɨna ɗe turusɨ ɨna kawasɨ.”

⁵ Yesu marma dɨ ɗɨma hamba ghɨri yikau. Tamma ndɨ ara ka kɨn wasa ghama sɨba vɨzhɨ ndaɓeni dɨ lai tlɨn kau.

⁶ Yesu dɨ ɗuwaɗuwa ghama kwahiya zahiya canhɨ natlɨn. Yesu dɨ ndandɨma vuwa gwahiyayo gyaɓoya tɨda gyagiyatlɨn.

Kafaka nika bahɨn tsɨreni a Yesu

⁷ Je zara nikya bahɨn tsɨreni ka ewute dɨ kafa tlɨn tsɨr-tsɨr dɨ tsatlɨn Iko aghama mbasaka riwan.

⁸ Dɨ ɗɨnga tlɨna ndu, “Kiyi ndɨ kwambal etivu nana, ama na tabi kiya pɨkɨtɨm, ko tapu, ko mɨr ɗe bakwal nanau.”

⁹ Zi kakɨr, ama nate kiya wuya kabu.

¹⁰ Ndyam kam ba na dawana ɗahɨka, makɨ ndyeyi kwapa mukwa tlahɨ tana ɗe taka vuwa gwahika.

¹¹ Ndyam vuwa gwahi mana zanaka, ka nja gɨsahinakai, na pɨtla kwatai tata ngarana eyi sɨdɨ jika ghamatlɨn.

¹² Je bawa tlɨn, da bɨla sɨba ndu ta dzɨga tlɨna ɗe lyapɨ natlɨnai.

¹³ Da bawai tɨmbɨzɨm cass da faka shu sɨba vɨzhɨ, da lai tlɨnai.

Ɓalaka Ghama Yuhanna ba Baptisima

¹⁴ Je dɨkaya Malvu Hiridus, ndɨra ɓandakɨ ta ngɨna Yesu koyikweki. Niwi data ɗɨnga ndu, Atlai Yohanna ba Baptisima aɗe sɨba miya tlɨn, hamba zai jika tɨ data iko ba ɗɨma nikin ham ba ghɨri.

¹⁵ Niwi du, “Tiji Iliya.” Niwi dɨ kwaya ndu, “Tiji Annabi, wan wuta ɗe Annabawa niya shiyi.”

¹⁶ Dage dɨkaya wanka Hiridus du, “Yohanna, ba mɨn zai dɨ ɓalaya ghamusai, dɨ tlusai!”

¹⁷ Hiridus dɨ zai dɨ kuya Yuhanna dɨ ɗɨhɨ nusɨ dɨ baiya dɨbi tɨɓusai, Hiridus ɗɨn wankaka dama Hiridiyas, anta vashi wasɨ Filibus ma ti hiridus dɨ kɨnaza.

¹⁸ Adama Yuhanna sasa ɗɨnga ka Hiridus du, “Doka tsama darhɨ fa kɨna anta vashi fu.”

¹⁹ Je mbasa Hirudiya a ɗingɨ ta Yuhanna, je nje dona darhɨ ba ma ghamusai amarmau.

²⁰ Adama Hiridus kata lakalaka Yuhanna da gusɨ gau dan asɨnsɨna ndu ti bana ɗɨma saɗa, Sɨm ba cartɨ, ta dɨkaya-dɨkaya ɗɨngɨ tusɨ dɨ arusɨ e mbam. Hiridus sasa damahɨyusɨ sosai ndyam wookaci bate dɨkaya ɗɨngɨ taYohanna, ndyam ɨna wanka tɨdɨga lu dɨkayaka ɗɨngɨ tusɨ.

²¹ Je nje mara ɗɨ darhɨ ɗe wara muku ma vɨrka Hiridus, je te paa ghama sɨba Gwalfu a gyaruni sɨba yaki niwasɨ ɨna Gyaruni ni ɗe mɨdzai ta Galɨlɨ.

²² Daga buwaza a wunta Hiridia dibi zaba zabɨ, dɨ meɗe Hiridus ɨna sɨbɨ niwasɨ. Je ɗɨnga wɨnka malvu du, “Tsiwan ndyam hamba mada lu mɨna tsoontsai.”

²³ Har dɨ tsɨmatla ndu, “Ndyam hamba mace tsiyuwɨn ka mɨna tson, ko tanga pɨra gwalfu tuwun.”

²⁴ Je bawaza viyakan dɨ ɗɨnga maza du, “Mɨna rawa ma?” Je gɨsa Mahɨka du, “Ghama Yohanna bana dɨma Baptisima.”

²⁵ Nda dliya-dli dɨ zaza tira malvu a sɨbɨ niwasɨ hɨdakɨ dɨbɨ rawau du, “Mɨna lu fa tsan ghama Yohanna ba Baptisima conakɨn ɗe kiɓɨ.”

²⁶ Daga dɨkaya wanka Malvu dɨ ɗuwa-ɗuwa ghama wanka ama adama tsɨmakɨ tusɨ ɨna sɨbɨ niwasɨ tɨma lu dɨ hɨratlayu.

²⁷ A ɗika je kafa bacan nusɨ a malvu dɨzai dɨ buwai ghama Yohanna a ee tɨɓusa kurkuku.

²⁸ Dɨ buwai ɗɨ ghama Yohanna ɗee kiɓɨ, dɨ tsa wunka njima dɨ baza tsa maza.

²⁹ Dage dɨ kaya wanka sɨba gyagiyakɨ ni Yohanna. Je buwa tlɨn dɨbi kiya tuwa-tuwa Yohanna, dɨ pɨsai.

Yesu ɨse sɨbɨ zangu vatlɨ

³⁰ Sɨba gyagiyakɨ ni Yesu daga piya tirusɨ dɨ paghamatlɨna tirusɨ dɨbɨlaya ndyam hamba tlɨne ɗɨmau, ɨna hamba tlɨne gyagiya tlɨn.

³¹ Aɗika Sɨbɨ cassɨ da buwatlɨn da batlɨn har Yesu ɨna sɨbana gyagiya tirusɨ amarma wokaci ba taa hambatau. Je te ɗɨnga tlɨna ndu, “Tiwika mibama ekwa sɨbɨ dama na sawa gaɓɨ.”

³² Je zatlɨn ndyan tlɨn ɗe kwatal dɨ batlɨn edu wimoyu ndɨ tlɨn.

³³ Ama sɨbɨ cassɨ dɨnaya bahi tatlɨn dɨ sɨna ndɨra tlɨnai, sɨbɨka je ɓa mirai dɨ cagatlɨna ɗamaƙe na data batlɨn.

³⁴ Daga dawusa Yesu wa ta vɨna madzɨ, dɨ naya sɨbɨ cas, je ta lulu tlɨn, adama tlɨn ndɨ wan tɨmakwi sɨba kwa baki. Dɨ dzakwa gyagiya hiyatlɨn kutato cas.

³⁵ Daga ɗɨma rɨdzɨ, sɨba gyayakɨ niwasɨ dɨ buwa tlɨna tirusɨ, du, “Ridzi ɗɨnsai, nai wɨma ɗɨkɨnu.

³⁶ Zu sɨbɨ dɨ zatlɨna vuwa gwahɨ gyarya mbatlaiya ɨna gyaɓoya dɨ batlɨn kɨna hambata adama ghama tlɨn dɨ tau.”

³⁷ Ama Yesu dɨ gɨsatlɨna ndu, “Hɨnka tsitlɨn hambata ka kwa dɨ tau.” Je tlɨne ɗɨngaya ndu, “Wato fiyalu mi bama kɨna pɨkɨtɨm ba dinari ɗel tsɨr baibaya pɨnaka bacan ɗo tir furfuɗai adama mi tsatlɨn dɨ taa?”

³⁸ Yesu dɨ tsiya tlɨna ndu, “Hɨna pɨkɨtɨm mɨna? Tika naya dza.” Daga ndarnau dɨ marau du, “Pɨkɨtɨm vatlɨ ɨna ghɨdɨ tsɨr.”

³⁹ Je zai tlɨna Yesu dɨ ɗɨnga sɨbɨ ndyam, dɨ tsatsɨgatlɨn a tsɨga-tsɨgɨ ata betlema wasɨ.

⁴⁰ Dɨ tsɨga tlɨn a tsɨga tsɨgɨ, niwi ɗel wutɨ, niwi kuma diɓi vatlɨ-vatlɨ.

⁴¹ Je kiya pɨkɨtɨm vatlɨ ɨna ghɨdɨ tsɨr ka a Yesu, dɨ tla tiyusɨ dɨna, dɨ godeya Ghɨnsɨ dɨ wakɨsa pɨktɨnka, dɨ tsa sɨba gyagiyaki niwasɨ dɨ tsa a sɨbɨ. Je mɨna Tsaaʻa ghɨdɨ tsɨreyaka a tsafayatlɨn ndyam.

⁴² Ndyam dɨ tau dɨ ɨsa tlɨnai,

⁴³ A ɗika sɨbana gyagiya tirusɨ dɨ paa bɨrɨn pɨkɨtɨm ɨna ghɨdɨ ma sɨlau badai dir ɓitin bahɨn tsɨr.

⁴⁴ Ndɨ dzafu sɨba taka baibaya zangu vatlaɨ.

Yesu Tiva Ghama Bi na Madzi Gyarya.

⁴⁵ Nda dliyadli Yesu dɨ ze sɨba gyagiyakɨ niwasɨ dɨ zatlin ɗe kwatal dɨ cagaya ɗamaka pakɨ ta Betsaida, tɨ kwaya tsa darhɨ sɨbɨka dɨ batlɨnai.

⁴⁶ Daga tsa darhɨ sɨbai, je ghɨmusa ghama ɗai e tiya gil.

⁴⁷ Daga shamaza yu, kwatal da tsafa madzɨ gyarya, Yesu da me wasɨ ata vɨna madzɨ.

⁴⁸ Sɨba gyagyiyakɨ niwasɨ data saketɨ e tive kwatal adama garaba ruwun badata kanbɨlletlɨn. Daga ga hacawu dɨ tiva ghama bii dɨ busa tira tlɨn. Dɨ ɗɨma wan sa zira tlɨnai,

⁴⁹ Ama dage tline nayusa ta tiva ghama bii, dɨ tsaka ndu ariwen, dɨ ɓaa kwararai,

⁵⁰ Adama ndyan tlɨn anayya nayau, lakaka yu dɨ kuya tlɨnai. Ama nda dliyadli Yesu dɨ ɗɨnga tlɨna ɗɨnga ndu, “Nata lɨɓa nau! Gammɨn, nata la ka yuwu.”

⁵¹ Je zusɨ ɗe kwatalla tira tlɨn, je tsɨrusaya ruwum ka. A ghɨri dɨ kuya tlin ndyamai,

⁵² a dama a sɨmma zhamata ɨsa ya ka sɨbɨ zagu vatlɨ a pɨktɨnkau, adama kwasa-kwasa canhɨ na tlɨn.

Yesu Lai Sɨba Vɨzhɨ a Vugwahɨ Ta Janasarata.

⁵³ Dage tlɨne pɨla madzɨ, dɨ dawatlɨna pakɨ ta Janasarata, dɨ ɗɨhɨna kwatalla ta vɨna madzɨ.

⁵⁴ Abo tlɨn ndɨ bawa jika ɗe kwatal, dɨ sɨna Yesuwa ya sɨbɨ.

⁵⁵ Dɨ za tlɨna vuwa gwahiya mirayayo, da buwai sɨba vɨzhi ata hamba piyo ni tlɨn da bai tlɨn ndyam adare yin Yesu.

⁵⁶ Ndyam e te busɨka, avuwa gwahi gya ɓoya, ko avuwa gwahi gyaruya, ko a kyar vuwa gwahi, da piye sɨba vɨzhɨ a ta vɨna kasu. Da rawusɨ dɨ tikɨna kwai tan gan vina Kabɨ tusɨ, kuma ndɨ ba tɨkɨnaka dɨ lai.