Markus 5 - Miyawa

Yesu Lai wi Sim ba tɨmbɨzim na Garasinawa

¹ Yesu ɨna sɨba gyagiya kɨ niwasɨ dɨ pɨla madzɨ dɨ batlɨna pakɨ ta Garasina.

² Nda dawa hiyusa Yesuwa ɗe kwatal, wɨ mbasaka riwan dɨ sukɨn, a bota ɗe yamamau dɨ bɨ gɨmai Yesu.

³ Naka sɨnka maka ɗe yamamau, bana iya ɗɨhɨnusɨ moyu, kotanga a sansali.

⁴ Asasu ɗahɨnakɨ kɨnwasɨ ɨna ngarusɨ a ta sansali ata kwambala mir tɨda ɓalalai, dɨ ɓoyai, wi bakalpɨ mana iya ti.

⁵ Tangan ghajeki, camaza a mukwa ta maka ɗe yamamau ɨna ghama ɗai, da ɓa kwararɨ da gavɨra tuwatuwusa zɨkɨ.

⁶ Daga naya Yesuwa sar, dɨ kiya mirayai dɨ busɨ dɨda bɨɗusai.

⁷ Dɨ ɓaa kwarara luwasɨ du, “Ma zhafu ɨna mɨna, Yesu laina Ghɨnsɨ Dankwayuwa, mɨna ta rawafu adama Ghɨnsɨ, fata kwaya hɨlaiwanu!”

⁸ A ɗɨnga wanka adama Yesu dɨ ɗɨngaya ndu, “Ɗzarkwai ɨna nakɨn sɨmkɨn mbasaka riwan”

⁹ Je tsiyusa Yesuwa ndu, wa ji ngɨnafa? Je gɨsa ndu “Ngɨnuwɨn ji cas, a dama mi ja cassɨ.”

¹⁰ Je rawa Yesu du kushi-kushi ta kwaya bi raka tlɨna a ɗɨkau.

¹¹ A wiha dangɨsɨ na kam dɨ jaata ki acɨɓɨ ɗai mbatleyi.

¹² Je rawusa mbasaka riwan du,“Kafɨmeyin dagɨsaso na kanka fa zuwama kwai mizama ɗe tlɨn.”

¹³ Je sama tlɨna Yesu du, ta botlɨn dɨ batlɨn, je bawusa mbasaka riwan dɨ zatlɨn ɗe dangɨsasau kai. A wiha dangɨsasau ka a baibaya zangu tsɨrai, dɨ kɨrma mɨrayai, dɨ vatlɨn ɗo biya madzɨ dɨ mbɨla tlɨnai.

¹⁴ A ɗika sɨbana kiya dangɨsasau ka dɨ varara dɨ batlɨn dɨbi bɨla sɨbɨ niya vuwagwahɨ gyarya ɨna gyaɓiya, Je buwatlɨna sɨbabau niya vuwagwahi e naya hamba dɨ dzakwatlɨn.

¹⁵ Dage buwatlɨna tira Yesu, je naya naka ba mbasaka riwan ɗe wasɨka e tsigi, a kaba tuwusɨ, tɨsu ndererai, je kuya tlɨna lakaka yu.

¹⁶ Sɨba dɨ ɗɨma kutɨka ta tiyatlɨn dɨ babɨla hamba dɨ ɗɨma naka ba mbasaka riwan ɨna wiha dagɨsasauka.

¹⁷ Je tlɨne dzakwa rawaka Yesu du, ta botaya ɗe mɨdzai tatlɨn.

¹⁸ Tɨ kwaya ta zusi ɗe kwatal, naka ba mbasaka riwanka a shiyi ka, dɨ rawa Yesu du, “Gana ɗiyafai.”

¹⁹ Ama Yesu a santa mau, dɨ ɗɨngaya ndu, “Piya kamai a tiira sɨbɨnifu, fabi bɨla tlɨn kutato gyaruni sɨba dɨ ɗɨmafa Bakam, ɨna e ta lulufu.”

²⁰ Je piya kamai dɨ babɨla hamba ghɨrɨ sɨba dɨ ɗɨmaya a Yesu, ndyam ɗe vuwa gwahɨ dɨrɓitin ta Dikafolis. Sɨbɨ dɨ mɨtla hamba ghɨri nikya.

Layaka wunta Yayirus ɨna am mana ra pɨram a Yesu

²¹ Yesu dɨ mɨna pɨla ta wiya paka madzai ɗe kwatal sɨbabau cass dɨ ndyuwuseyɨ, tɨ ndɨ ɗɨka ta vɨna madzɨ.

²² Daga ɗɨmau wi garna a ɗe gyaruni niya bali mana pa gham, dɨsu kɨn, ngɨnusi ji Yayirus, nda nayaka Yesu dɨ ɓugusa bɨɗusai.

²³ Tɨ data rawusa ndu, “Kushi-kushi wuntuwun gyaɓiya jaa ta vɨna miyau. Tuku kwai fabɨ vakɨnfa tuwaza nja lalai dɨ tlazai.”

²⁴ Je ɗiyusaYesu. A wiha sibɨ cass data ɗiyusi da zakutusɨ.

²⁵ Wiya am dɨ jeyi ma sa kaitɨ washasa za dirbitim bahɨm tsir ata raa pɨram.

²⁶ A sasa kaitɨ zhɨkɨ a tɨra sibana tsa nihɨ, dɨ mba kuti niya kɨnza ndyam ama dɨ nda mbam, vɨzhɨ da daɗaza ndɨ daɗau amar ma lahiyu.

²⁷ Je dɨkaya ndɨra Yesu, je nje siɗaza adara kyarwasɨ ɗe sɨbɨ, dɨ tɨkɨna kabi tusɨ,

²⁸ Adama am ka ɗɨngasa ɗe canza jika, ndu, “Ko mɨnta tɨkɨn gan ndɨ kabɨ tusɨ, mɨna lalai.”

²⁹ Nda dliya dlɨ pɨram bana vusa ɗeza dɨ tsɨrusai tik. Je ɗaha ɗe tuwatuwaza a laitla sai a ɗe vɨzhɨ taza.

³⁰ Nda dlɨya dlɨ je ɗaha wi kalpɨ e bawusa ɗewasa Yesu, je ghɨdzusɨ ɗe sɨbɨ du, “Wadɨ tɨkɨna kabituna?”

³¹ Je gɨsaya sɨba gyagiya niwasɨ du, “Fada naya-naya wiha sɨbɨ ena zakutayau da gwaɓɨtlafu, fadu wadɨ tɨkɨnafa?”

³² Ama je ghɨdzusa Yesu dama dɨ naya wa dɨ ɗɨma wankana?

³³ Am ka daga asɨnsɨna hamba dɨ marazai, je bawaza a kitlɨrwatɨ, tuwatuwaza da zaba zabau, dɨ dɨda bɨɗusai, je bɨlaya tɨkwasam hamba dametla.

³⁴ Je te ɗɨngatla du, “Wumtuwum, tsahiya gasƙewatɨ toom laiyinsai. Takɨn lapiya, ma lasai aha vɨzhɨton.”

³⁵ Tɨndɨ ɗe ɗɨngɨ, niwi sibɨ dɨsu kɨnai a kamha Yayirus garna na balɨ mana paghan, du ndu, “Wun tafu mitla sai fiya mɨna nzane basɨna ƙema?”

³⁶ Ama Yesu cora ma gan dɨkaya ɗɨngɨ tatlɨnu, je ɗɨnga Yayirus du, “Fata laka wihamu, fidai tsa ndɨ gasƙewatɨ.”

³⁷ Yesu malu wi dɨ ɗiyatlɨnu, tanma ndɨ ni Bitrus a Yakubu, a Yahaya yasɨ Yakubu.

³⁸ Daga bɨ ɗama kanha Yayirus je dɨkaya maya yawari ɨna vɨrɨya sɨbɨ cas, a mayatlɨn ɗekɨm da ɓaɓakumai.

³⁹ Dage zusa kanka, dɨ ɗɨnga tlɨn du, “Hɨna ta para ma nada ɓa kwarara? Wunkɨn a mitla ma miyawu, han nji nda ta sinau.”

⁴⁰ Je ghɨntsaya ndɨ ghɨntsau. Dage te bawai tlɨn ndyama vikamai, je kiya baawunka a maza ɨna sɨba gyagiyakɨ niwasɨ kideni sɨba tlɨnde wutai ɨna ti, je zusa lɨn eyin wunka.

⁴¹ Je kuya kɨn wɨnka du, “Talita kumi.” Wato ji, maci takɨn wunkɨn tlakɨmai.

⁴² Nda dlɨyadlɨ wun dɨ tlaza dɨ dzakwa tivai, wunka (washashanza dirɓitin bahɨn tsɨr) Jetlɨne naya ghɨrɨya hamba tiye ɗɨmau.

⁴³ Ama Yesu dɨ gɨtla tlɨna ndu tabi bɨla wɨyu. Je zetlɨn du ta tsatla hambatau.