Markus 4 - Miyawa

Vɨnado Aghama ba tawazɨ

¹ Yesu dɨ mɨnan dzakwa gyagɨyaka ta vɨna madzɨ. Sɨbɨ cas dɨ pa ghamatlɨn a tirusɨ, har dɨ baiya ta zahɨ ɗe kwatal ɗe madzɨ, dɨ tsɨgusɨ ɗahɨ. Ndyam sɨbaboka tlɨn data vɨna madzɨ.

² Dɨ gyagiya tlɨn kutato cas a vɨnado. Ɗe gyagiyakɨ tusɨ a ɗɨnga ndu,

³ tɨyi kumai! Wɨ ba tawazɨ dɨ buse tawazɨ.

⁴ Tɨ ndɨ ɗe vahiya varai ka, wi varai dɨvusɨ nda ta darhɨ, je buwaza zhanyaku dɨ parai.

⁵ Wi varai dɨ vusa ta ɗai adare kwa mɨdzai zhɨkɨ. Asɨnatama casu dɨ bawai, adama mɨdzaika ma zhɨku,

⁶ dage ɓaa muku dɨ losai, adama amarme za tlerwanwasu dɨ tsɨfai.

⁷ Wi varai dɨ vusɨ ɗe vekiyayo, daga tɨfa veki dɨ tlɨmbuseyi, amarma dɨ za tiyu.

⁸ Ama wi varai dɨ vusɨ ɗe mɨdzai ma mban, dɨ bawa saɗaɗa, dɨ gwardzusɨ, dɨ zaa ti ma mban, dɨtlɨgusɨtlɨgau, wi diɓi kidi, wi diɓi maha, niwi ma kwape be ɗyal wutɨ.

⁹ Yesu dɨ ɗa ndu, “Batɨda kumai ma dɨkayakɨ ka tadɨkai.”

Zhamata vɨnado aghama ba tawazɨ ka

¹⁰ Daga beɗe tlɨna metlɨn, sɨbana ɗiyusɨ fa nikya bahɨntsɨrka,jetsɨyusɨ zhamata vɨnadoka.

¹¹ Je bɨla tlɨna ndu, “Hinkɨn, atsanatsa sɨnaka nzuya Gwalfu ta Ghɨnsai, ama sɨba tlɨmma ɗenau, tangan meki kwafa nda vɨnado.

¹² A dama “Tlɨna ndarna dɨ ndarnau ama tlɨnma nayau, Tlɨna dɨkaya dɨkayai ama tlɨmma sɨna zhamatazau, adama kabi sɨnaka tlɨna dzɨgatlɨn dɨbi bɨsatlɨn lyapɨ natlɨnai a Ghɨnsɨ!”

¹³ Je ɗɨnga tlɨna Yesu du ndu, “Ase na lɨkaima ndɨra nakɨn vɨnado kɨna? To kukwa nasa bi sɨna bɨrɨm vɨna doka jika?

¹⁴ Ba tawazɨ ka tataa tɨnza ɗɨngɨ ta Ghɨnsɨ.

¹⁵ Varai ba vusa ta darhɨka tlɨnji waneyin sɨba dɨkaya ɗɨngɨ ta Ghɨnsɨ. Ndaa dɨkayakɨ ka, tɨmbɨzɨm garna dɨ busɨ kɨrma ɗɨngɨ kayaɗe cantlɨn.

¹⁶ Sɨba dɨ vatlɨn atlara ɗai dɨgan wanka, tlɨnji sɨba ndaa dɨkayaka ɗɨngɨ ka dɨ gɨsai da lyakwa lyakwau.

¹⁷ Tɨn da tlɨmma tlerwanu, tlɨmma gwau. Kwa saa kaitɨ ko wiya hɨlayakɨ dɨ maratlɨnka a dama ɗɨngɨ ta Ghɨnsɨka, tlɨna lɨɓatlɨn lɨɓai nda dliya dli.

¹⁸ Niwi Sɨbɨ dɨ wan vare ba vusɨ ɗe vakɨyayo, tlɨnji sɨbana dɨkaya ɗɨngɨka,

¹⁹ ama daa makɨ ta duniya, ɨna araka cantlɨn ata kutatau, ɨna kwaɗɨya dukɨ ji zusa cantlɨn dɨbi tlatlɨna ɗɨngɨ kai, dɨ tlɨgatlɨn manamu.

²⁰ Varai ba dɨ vusɨ de mɨdzai ma mban, tlɨn ji wane yin sɨbana dikaya ɗɨngɨka, dɨ gɨsau dɨ mbɨnatlɨn dɨ tlɨgatlɨn diɓi kidi kidi, niwi dɨ diɓɨ maha-maha, niwi dɨ ɗyal wutɨ-wutɨ.”

Pɨtɨlah ma dzaɓai a gali

²¹ Dɨ mɨna ɗɨnga tlɨna ndu, wiga gɨɓa ku ɗe pɨtɨla dɨ dzaɓoya galiwa, ko dɨ ara bɨɗa dlarwa, dɨma araza dɨna ta wihamu nda? Damana tsaa ku.

²² Ndyam hamba tlɨn da pepiyaka a bawai tlɨna vikan ewuya, ndyam hamba tlɨnda tɨɓakɨka agɨta tlɨn gɨtau.

²³ Batɨda kumai ma dɨkaya yuka ta dɨkai.

²⁴ Dɨ mɨna ɗɨnga ndu. “Tiyi kumai saɗaɗa fa hamba na da ta dɨ kayau, hamba hɨne ɗɨma wika aɗɨmana gan wanka, har dɨ rara wane hɨne ɗɨmau.

²⁵ Ndɨ batɨda kutɨka a daɗaya gatu. Ba tɨma wihamu, wihan niya kunwasɨka agɨsaya gɨsai.”

Vɨnado Aghama varai ba bawo

²⁶ Dɨ mɨna ma ndu, “Gwalfu ta Ghɨnsɨ ka nji wan sɨm ba dɨ va varai amɨdzai.

²⁷ Ba tleɗa sɨna camaza dɨ zɨkusɨ tsɨwai tɨma sɨna ena bawa varai da gwardzusu.

²⁸ Varaika ta bawa ghama mɨdzai, ta dzakwa ta tsɨkwakɨ, dɨ mbala ɗɨ gham dɨ za ɗa ti.

²⁹ Kwabi naa tlɨna hamba dɨ mbalaka dɨ kiya ɗɨ ngɨlatɨ dɨ kurai,matsau dɨnsu jikai.”

Vɨnado a ghama ditsa mastad

³⁰ Yesu dɨ mɨna tsɨya tlɨna ndu, “Miya gudza gwalfu ta Ghɨnsɨ kɨna ma? Ko miya gudza za varai wena vɨna dawa?

³¹ Nji wan ditsa mastad, ma nji ndɨ gyaɓinini a ɗe varayayau na duniya.

³² Ndyam ɨna wanka, kwabi tɨnzazaka, dɨ gwardzazai dɨ ra tlipiyayo na tsakɨn, dɨ va pe-eyazai har zhanyaku da dawaza tu.”

Yesu ɗɨnga-ɗɨnga vɨna do

³³ Yesu dɨ ɗɨnga tlɨna ɗɨngɨ ma piyatɨ a vɨna do cas wanena tɨda ɗɨmau, saɗaɗa ta vɨna sɨnakɨ ta tlɨn.

³⁴ Tɨma bɨla tlɨna ɗɨngu kwafa a yagu vɨnado ɗahɨ. Ama tansu ndɨ ti ɨna sɨba gyagiyakɨ niwasɨka ta bɨlatlɨn zhamataza ndyam.

Yesu daba lɨpɨm ma ghɨnau

³⁵ Muku taka rɨdza je ɗɨnga sɨba gyagiyakɨ niwasa Yesu du, “Pɨlima mi bama ta pakɨ ta yika.”

³⁶ Je zuwa sɨbɨ ka tacɨɓɨ, dɨ batlɨnai ɨna ti, sɨba gyagiyakɨ niwasɨ dɨ zatlɨn ɗe kwatal ma tɨdɨ ɗahɨ, wuya kwatalalo dɨgoyi.

³⁷ Je tlusa ruwun bakalpɨ da kambɨlai kwatal, zho bi da vusɨ ɗe kwatal wan sa mbɨla zai,

³⁸ Yesu dɨ yika ta ciɓɨ kwatal, tɨ da ta sɨnawa ta hamba piyau. Je zɨkusa sɨba gyagiyakɨ niwasɨ, dɨ ɗɨngaya ndu, “Basɨnakɨ, tama manan ɗahu, fa ma kwaya bɨrama?”

³⁹ Je tlusa Yesu, dɨ daba ruwunka, dɨ ɗɨnga bii na madzɨ ka ndu, “Tsirkwai, makɨnafu tik.” Ruwun dɨ tsɨrusai tik.

⁴⁰ Yesu dɨ ɗɨnga sɨba gyagiyakɨ niwasa ndu, “Hɨnata laka ma ji wankana? Na tsa ma gan gasƙewata?”

⁴¹ Dɨ shiɗa tlɨn lakaka yuwai, tlɨndɨ su ndɨ shashɨkai. Dɨ ɗa tsatsɨyaya tsafaya tlɨn du, “Wena sɨm ji wan kɨna! Ba, ruwun ɨna bi da ɗiya dɨngɨ tusa!”