Markus 14 - Miyawa

Sɨba Kwambal ɗɨn Shawariya Kuyaka Yesu

¹ A sɨla sɨno tsir dɨ ɗima war ba pɨla kai, ɨna war ba hambatau bakwa yisti, Firistoci gyaruni ɨna sɨba sɨna attaura dɨ dona darha kuyaka Yesu a pepiya dɨ taa viyu sai.

² Je tlɨne ɗɨnga ndu, mita kuyusɨ ɗe wokaci war ba pɨlaku, adama sɨbɨ tabi tlai rɨkɨcu.

A faka shu ba Piyatɨ Yesu

³ Yesu da Betanya a kanha Saminu ba sakaita ha tigwerwatɨ ashiyi. Yesu nda ta tahambata jika, wiya am dɨ sukɨm awuna ɗiyai ba shu ba piyatɨ ba dɨ ɗɨmau anardɨ ba mir zhɨkɨ. Je nje gɨta vɨna ɗiyai ka, dɨ saraya shuka ghamusɨ.

⁴ Niwi kuma daga mbasatlɨn, dɨ ɗɨnga tsafayatlɨn du, madɨzai kɨmayakɨ nakɨn shukɨna?

⁵ Ba mɨtsɨ gam rahiya pena bacan ɗe washashan wutɨ, dɨ tsa mirka ni ndalga. Je mbasa tlɨnai dɨ dabatla.

⁶ Ama Yesu dɨ ɗɨnga ndu, zuwitlai hɨna ta dinyaza hama? Ai, a ɗɨman hamba mbam.

⁷ Na nde wutai ɨna ni ndalga tangan ghajeki, hɨna iya iya bɨratlɨnai mukwa na da lu, ama dɨma kullum jena hɨde wute ɨna mɨnu.

⁸ A ɗɨnsu vɨna kokari naza dɨ faka tuwa tuwuna shu, a dama ɗɨmaka pashɨwun.

⁹ Agashɨ mɨnata bɨlana, ndyam ena dabɨ bɨla ɗɨngɨ ma piyatɨ ɗe duniya ndyam hamba dɨ ɗɨma takɨn ankɨn, a dɨnga ɗɨnga ka ɗɨngɨ adama ɗuwakɨ ɨna nji.

Yahuza santasu dɨ tsa Yesu wai

¹⁰ Je tlusa a Yahuza Iskariyoti wutɨ aɗe bahɨn tsɨrenika, dɨ busa tira firistoci gyaruni adama dɨ tsa Yesu wa tiratlɨn.

¹¹ Dage tlɨne dɨ kaya ɗɨngɨ ta Yahuza Iskariyoti dɨ dɨkaya piyatɨ, dɨ tsɨraya ɗɨnga ndu tlɨna tsaya mir. Yahuza dɨ dinga ndi donaka darhɨ bade tsatlɨn Yesu.

Yesu ta Hambata sɨba Pɨlakɨ Ewutai ɨna Sɨba Gyagiyakɨ niwasɨ.

¹² Muku ta vɨnahɨ ma war mahambata sɨba kwa yisti wato mukwada pɨra le mbɨrgu ba war ba pɨlakɨ wane na tlɨnda ɗɨmau. Je tsɨya Yesuwa sɨba gyagiyakɨ niwasa ndu, Fiyalu mibama mibi tafu cawura hambata sɨba war ba pɨlakɨ yikwa?

¹³ Yesu dɨ kafa tsɨra ɗe sɨba gyagiyakɨ niwasɨ dɨ ɗɨngatlɨna ndu, zi ka vogwahi yika, hina gɨma ɨna wisɨm badɨ kiya gumbɨ banakuwa bi, na ɗiyusɨ.

¹⁴ Ndɨ kam badɨ zusɨka, ɗɨngɨ ba kanka ndu, “Basɨnaka ndu ta dawusɨ yikwa ji dɨ taa hambata sɨba war ba pɨlaka, ɨna sɨba gyagiyakɨ niwasa?”

¹⁵ Tiya gɨrana wiya garama lɨm jingɨɗɨ gɨɗiya ma wihi a ɗaɗɨmakɨ. Hina ɗaɗɨman ɗika.

¹⁶ Je tla tlɨna sɨba gyagiyakɨka, dɨ zatlɨna vuwa gwahi, je tlɨne naya ndɨ wane te bɨla tlɨn, je tlɨne taya cawura war ba pɨlakɨ.

¹⁷ Dagabi ɗɨma rɨdzɨ jete buse wutai ɨna nikya bahɨn tsɨrka.

¹⁸ Tlɨn ndata taa hambata jika, je ɗɨnga Yesu du, a gashi mɨna ta bɨlana, wutɨ a ɗena jibi tsuwɨn batɨ da taa e wute ɨna mɨn.

¹⁹ Je kɨmaya rayi tlɨna sɨba gyagiyakɨ niwasɨ, tlɨn data tsatsiyusɨ wutɨ-wutɨ, ko mɨnwa?

²⁰ Je te gɨsa tlɨna ndu, wutɨ a ɗena hɨm bahɨn tsɨreni kɨn dai, ba da ta taa ɗe kɨɓɨ wutɨ ɨna mɨn.

²¹ Vɨrkɨ sɨma bi miyusɨ miyai wane rɨdla ghamusɨ. Ama alulu naka ba da bi tsusɨ. Kwashɨma ba vɨrkɨyama gamu.

Tahiya Pɨkɨtɨm na Bakam

²² Tlɨndɨ ɗe tahiya hambatau. Je te kiya pɨkɨtɨm, dɨ zhɨga Ghɨnsɨ, dɨ wakɨsau, dɨ tsatlɨn, du, “Gɨsi, nikin kin ji tuwa tuwun.”

²³ Je te kiya tlɨrkaya anab , dɨ zhɨga Ghɨnsɨ, dɨ tsatlɨn, ndyan tlɨn dɨ sɨsa ɗahɨ.

²⁴ Je te ɗɨnga tlɨna ndu, nikin kin ji pɨran wan, badɨ gɨra tsɨrayaka Ghɨnsɨ ɨna sɨbɨ niwasɨ, ba dabi vau adama bɨraka sɨbɨ cas.

²⁵ Katsɨ-katsɨ mɨnata bɨlana, mɨmma kara saa bi inabi yu, kwapa mukwa mɨndabi saa sabona ɗe gwalfu ta Ghɨnsɨ.

²⁶ Dage tlɨne tɨmatɨm ma zhɨga Ghɨnsɨ, je bawatlɨn dɨ batlɨna aghama ɗai na zaitun.

Yesu ɗɨnga ndɨra wakana hiyusɨ a Bitirus.

²⁷ Yesu dɨ ɗɨnga tlɨna ndu, ndyan hɨna bi vara varai na zuwun, wane rɨdla ndu, Mɨna tiya viyya baki, Tɨmakwi kuma dɨ ɓai.

²⁸ Ama mɨn kwabɨ tluna a ɗe sɨba miya tlɨnka, mɨna cagana caga bahi ɗe mɨdzai ta Galili.

²⁹ Bitrus dɨ ɗɨngaya ndu, “Ko ta varara gan ndyan tlɨn, mɨn kam mɨmma varau.”

³⁰ Yesu dɨ ɗɨngaya ndu, “katsɨ-katsɨ mɨnata bɨlafu, tan gan ɗe nakɨn camazɨ kɨn, kafin dɨbi kuka sho showa tsɨraka, fiya bi wakane sɨna hiyuna a kidi.”

³¹ Ama Bitrus dɨ ɗɨnga ɗɨngɨ ka ghama gham a kalpɨ tɨda ɗɨnga ndu, “Tanga tiya viyune wutai ɨna fi mɨmma wakane sɨna hiyafu.” Ndyam tlɨn ma dɨ ɗɨnga wanka.

Yesu tiya gil Gatsemani

³² Je tlɨne ɗama ngin e na zara ndu Gatsemani. Yesu dɨ ɗɨnga sɨba gyagiyakɨ niwasa ndu, “Tsɨgɨka ɗɨkɨm, mɨn buwun tiya gil.”

³³ Je te zara Bitrus, ɨna Yakubu, ɨna Yahaya dɨba tlɨne wutai, dɨ damusai, tuwa tuwusɨ dɨ lɨɓazai.

³⁴ Je te ɗɨnga tlɨna ndu, “Canwan kɨmai ta sai, mɨna ta ɗaha wan mɨn sa miyunai. Tsɨrika ɗɨkɨm, na tsɨgana gahɨ.”

³⁵ Dage te ta vɨnahɨ gaɓi, dɨ ɓugusa mɨdzai dɨ tiya gil, tansa ɗɨmaza ka dɨ ziraya takɨn kaitɨ kɨn.

³⁶ Dɨ ɗɨnga ndu, “Buwɨn, kanda weni kuteki hamba ɗimakɨ ja tirafu. Kiyan takɨn tlɨrkai ma kaitɨ kɨnai. Ndyan ɨna wanka fama ɗiya ta tunu, ama ata tafu.”

³⁷ Dage te piyau dɨ mara sɨba gyagyiyakɨ ni wasa ta sɨnau, je te ɗɨnga Bitrus du, “Saminu, fiya ta sinau wa? A se fama iya tsɨrafa tagahɨ tan gan ba sa'a wuta?

³⁸ Tsɨrika ta gahɨ, nada tiya gil natabɨ da na ɗe gudzu. A ryuwan saya lu, ama tuwatu ma kalpu.”

³⁹ Je mɨna busai, dɨ tiya gil tɨda ɗɨnga ganndɨ wane te ɗɨnga vɨnahɨ.

⁴⁰ Aɗika dɨ mɨna piya dɨ maratlɨna ta sɨnau, sɨnau wansa ta tiya tlɨnai, dɨ kwa hamba dabɨ ɗɨngayai.

⁴¹ Je te mɨna piya ta kida, je te ɗɨnga tlɨna ndu, “Har conakɨn hɨna ta sɨnau nada ta sawakɨ wa? Azasuwanka, wokaci ɗansai. A tsa su vɨrkɨsɨma kɨn sɨba lyapai.

⁴² Tlɨka mibamai na nai suka ba da bɨ tsuwun kɨn siyata sukɨ nai.”

Yahuza tsa su Yesu dɨ kuyusai

⁴³ Nda dliya dli a tɨɓama vɨnusu Yahuza Iskariyoti dɨsu kɨm, ti wuta ɗe sɨba gyagyayakɨ niwasɨ bahɨn tsɨreni ka, dɨbuse wutai ɨna sɨbɨ cas a ɓadamamauwa kɨntlɨn ɨna gwadɨ. Firistoci gyaruni, ɨna sɨba sɨnaka attaura, ɨna sɨba kwambal dɨ kafatlɨn.

⁴⁴ To bada bɨ tsusɨka a ɗɨnga tlɨnsu jika ndu,“Bamɨnda bi tlɨrpusɨka tiji sɨnka, kuyiya, saɗaɗa na banai ɨna ti.”

⁴⁵ Daga nda buwa hiyusɨ dɨ busa tira Yesu, dɨ ɗɨngaya ndu, “Basɨnakɨ,” Dɨ tlɨrpusɨ.

⁴⁶ Tlɨn kuma dɨ kuya Yesu dɨ baiyai.

⁴⁷ Ama wɨtɨ aɗe sɨba tlɨnde tsatsɨr ka, dɨ mbala gadai tusɨ dɨ be gɨtsakɨ galudzɨhɨ na firist garna, dɨ kiyaya kumayusa tu.

⁴⁸ Je ɗɨnga tlɨna Yesu,“Nabɨka gadayayau ɨna gwadado e kuyuwɨn wan ba kir wa?

⁴⁹ Kowaiya mukweki mɨnde wute ɨna hɨn abali gyarya mana tiya gil mɨnda ta gyagiyakɨ, ama na kwiwammau. Ama aɗɨn wankɨn kɨn adama dɨ wana ɗɨngɨ ma rɨdlau.”

⁵⁰ Aɗika ndyan sɨba gyagiyakɨ niwasɨ dɨ zuwusɨ ɗika dɨ vararai.

⁵¹ Wi bandzɨhɨ ndɨ ti ɨna hamba lɨmbakɨ, dɨ ɗiyusɨ, dɨ dona kuya hiyusɨ.

⁵² Ti kuma dɨ zuwa tlɨn hamba lɨmba kɨ kai dɨ vara ɓandalya.

Yesuwa bɨɗa sɨba Gwalfu

⁵³ A ɗika je tlɨne be Yesu kanha Firist garna. Ndyan firistoci, ɨna sɨba kwambal, ɨna sɨba sɨna doka, dɨ pa ghama tlɨne wutai.

⁵⁴ Bitrus dɨ ɗiyusa sar, har akanha firist garna ka. Dɨ tsɨgusɨ ɗe dogarai niya bali gyarya ata kaa ku.

⁵⁵ To garu firistoci ɨna 'yan majalisa ndyam dɨ dona wihan hamba dabɨ ɗɨma sida ghama Yesu, adama dɨ ta viyusai, ama amar mau.

⁵⁶ Sɨbɨ casɨ dɨ ɗɨmaya sɨdɨ ba wakɨ, ama vɨnatlɨn bɨta me wutayu.

⁵⁷ Dage ɗɨmau niwi dɨ tlatlɨn, dɨ ɗɨmaya sidɨ ba waka ndu,

⁵⁸ “Midɨkaiya ta ɗɨnga ndu, ʻTa vaza takɨn Bali gyarya mana tiya gil ma ghana kɨn tlɨn a sɨbɨ, dɨ ghana ɗe sɨno kidi, dɨmagan ghanakɨ ta sɨmu.’ ”

⁵⁹ Ndyan ɨna wanka vɨnatlɨn bɨta me wutayu.

⁶⁰ Je tlusa a Firist garna a tsafaya tlɨn dɨ tsɨya Yesu wa ndu, “Fama wuya ɗɨnga ghama sɨdɨ kana? Fama ta dɨkaya hamba data ɗɨnga ghamafa?”

⁶¹ Ama ti dɨ ndɨ tikɨ-tikɨ a ɗɨnga ma ndu wi hamu. Firist garna ka dɨmɨna tsɨyusɨ du, to ase fikɨn faji Almasihu lena Dankwayuwa?

⁶² Yesu dɨ ɗɨnga ndu, “Gammɨn. Hɨna bɨ naya vɨrkɨ sɨme tsɨga teʻeya ba Iko tɨda ta busa ɗe lɨpɨn a dɨna.”

⁶³ Je mberara kabɨ tusaya firist garna di ɗɨnga ndu, “Miya ta dona wena sidɨ mɨnama?”

⁶⁴ Na dɨkaisu saɓo batiye dɨmau. Hɨna ɗɨnga nduma? Ndyan tlɨn dɨ ɗɨnga ndu hamba mbɨna ji dɨ ta viyusai.

⁶⁵ Niwi ma dɨ dzakwa babɨtsahiyaya naniki dɨ ɗɨhɨnaya tiyusoyi, dɨ ta tɨyusi, tlɨn da ɗɨnga ndu, ɗɨma ghirɨ bɨlama ba dɨ tafu dogarai niya haikali dɨ dɨnga ɓahiya ya wumusɨ dɨ baiyai dɨtusɨ.

Bitrus wakane Sɨnaka Yesu

⁶⁶ Bitrius kuma tɨ ndɨ kwatla ɗe dɨbɨ ta kam jɨka je bawaza wiya galudzaku ta firist garna dɨ buwaza.

⁶⁷ Dage njiye naya bitrus ata ka ku dɨ vaya ti du, “Fima ai fiye wutai ɨna nakɨm sɨm na Nazarat kɨm, Yesu.”

⁶⁸ Ama dɨ njai du, “Mɨn sɨmmagan hamba madata ɗɨngau,” je bawusa baliyai. Shosho dɨ kukwai.

⁶⁹ Je nayusa taka galu dzaku ka je mɨna ɗɨnga sɨba tlɨnde tsatsɨroyi du, “Nakɨn kɨn gan natlɨn.” Ama dɨ mɨna njai.

⁷⁰ Daga maka gaɓɨJe ɗɨnga Bitrus sa sɨba tlɨnde tsastsɨrka du,“Tɨkwasam fagan wuta ɗe tlɨn adama fi sɨn na Galili.”

⁷¹ Je tiye dzakwa hiyaka ghamusai tida ta tsatsɨmakɨ da ɗɨnga ndu, “Mɨn sɨn ma gan nakɨn sɨm baa hɨnda taa ɗangau.”

⁷² Nda dliya dli je kukwa shosho wa tsɨra, Bitrus kuwa dɨ ɗuwa ɨna ɗɨngɨ madɨ bɨlaya Yesu wa ndu, “Kafin dɨbi kuka shosho wa tsɨraka, fiya bi wakane sɨna hiyuna a kidi.” Daga bi ɗuwa ɨna taka ɗɨngɨka dɨ kiya vɨrɨyai.