Markus 12 - Miyawa

Vɨnado Aghama Sɨba Cana Shima Inabi

¹ Je zdakwa bɨla hiya tlɨn vɨna dawa ndu: “Wi sɨm jeyi ba dɨ ɗɨma shɨma inabi, dɨ ghana gwangwam dɨ ndyuwa zoyi, dɨ tsɨya gir bana tliyabi inabi, dɨ ghana paldɨm ba gahɨ. Je te tsa cana shinka niwi sɨbɨ dɨ buse tivu ɗe wiya mɨdzai.

² Daga ɗɨmaya matsau, je te kafa bacan nusa tira sɨba canka, dɨ gɨsaya gaɓa ɗe hamba kuwau.

³ Ama sɨba can ka dɨ kuyusɨ, dɨ ɗɨmaya titɨ dɨ rakusɨ ndɨ wanka dɨma ɨna wihama kɨnwasu.

⁴ Aɗika dɨkafa tlɨn wi galudzihɨ nusɨ, sɨba canka dɨ tusɨ dɨ ɓiya ghamusɨ dɨ tsaya kaitɨ ɨna atsi.

⁵ Ba shinka dɨ mɨna kafa wɨ galuzdɨ nusɨ, dɨ tiya nakai. Dɨmɨna kafa niwi caseni, dɨ tsaa kaitɨ niwi, dɨ tiya viya niwi.

⁶ Dɨ sɨla su ndɨ sɨn wutɨ ba de kafusɨ, ji Lai nusɨ bate raa cama hiyusɨ. Dɨ kafu ɗa ta cɨɓɨ, du ndu, “Tlɨna nayaga gyarwati na lai nuwɨn.”

⁷ Ama nikya sɨba canka daga nayusɨ du, “Nakɨnji nashuwasɨ. Tiyima viyusai, shinka dɨsu tamai.”

⁸ Je tlɨne kuyusɨ dɨ tiya viyusai, dɨ shiɗa yika a kyar gwangwam.

⁹ Hɨna ta nayaka, kwabi busa naka ba shinka ta ɗɨma wankwa? Kwa bɨ busa naka bashɨnka tabi tiya-tiya viya nika sɨba can kai ndyam, dɨ tsashinka niwi sɨba can tuwahɨ.

¹⁰ Ase na kɨmma takɨn rɨdla wuta ma ɗɨnga ndu, “Zikɨ ma hiyaza sɨba ghana kam, su nji dɨ dzɨga za ma raa tɨraza tsatsɨr ɗe ghanaka kam.”

¹¹ Acanna Bakam jika, hamba ghɨri jika a tirama.

¹² Sɨba kwambal gyaruni, fa sɨba sɨna doka na Musa, ɨna gyaruni data dona darhɨ ba dabɨ kuyusɨ adama asɨnsai tata ɗɨnga naka vɨna doka ghama tlɨn. Ama tlɨna ta laka wiha sɨbɨ. Adama wanka dɨ zuwusɨ dɨ ba tlɨnai.

Tsɨyakɨ Aghama Pɨnaka Tsɨtsali ta Kaisar

¹³ Je ba tlɨn kafa niwi Farisiyawa ɨna sɨba canni Hiridus, dama dɨ kuyusa lyapɨ ɗe ɗɨngɨ tusɨ.

¹⁴ Je buwatlɨna tirusɨ dɨ ɗɨngaya ndu,“Basɨnakɨ, mi sinfu sɨnai fi bana bɨla gaskewatɨ fama bana hiya wuyu, fa ki sɨbɨ ndɨ wɨtɨ wi rama wuyu. Fiyata gyagiya sɨbɨ a ɗɨngɨ ta Ghɨnsɨ agaskewati. A wai gan saɗa ji pɨnaka tsɨtsali ta Kaisar wa, ko a mbɨna mowa? Ya pɨnawa ko mita pɨnowa.

¹⁵ Yesu sɨnsa ngwazar ta tlɨnai du, “Mazai na data gudzuna? Tɨwayi mirka mɨn nayadza.”

¹⁶ Daga biyaya vare mirka, je tsiya tlɨn du, a ryuwan wa ja tuwa mir kɨna ɨna ngɨnusa? Du Kaisar.

¹⁷ Je ɗɨnga tlɨna Yesu du, “Tsi Kaisar hamba tlɨn dɨ ni Kaisar, na tsa Ghɨnsɨ hamba tlɨn dɨ ni Ghɨnsɨ.” Je tsa tlɨna ghɨri a ɗɨngɨ tusɨ.

Ata tsiya Yesu ndɨra tlahɨ ta sɨba miya tlɨn

¹⁸ Niwi Sadukiyawa sɨbana ɗɨnga ndu tlahɨ ta sɨba miya tlɨn maiyu, je buwa tlɨna tirusɨ da ta tsiyusɨ.

¹⁹ “Basɨnakɨ, Musa rɨdlama ndu, kwa miyusa sɨn dɨ zɨwa am avɨrkɨmo ka, dole ji yassɨ wasɨ dɨ ara anka dama dɨ mara varai yassɨ wasɨ.

²⁰ To niwi jeyi dawan-dawan tlɨn matsir. Garna na tlɨn dɨ kɨna am dɨ miyusai a zuma wutlu.

²¹ A tsɨrusɨ dɨ ara anka, dɨ miyusai, a zuma wutlu. A kida tlɨn dɨ gan wanka.

²² Ndɨ wanka ndyam matsɨr dɨ mbatlɨnai ba vɨrka ma ɗe tlɨnu. Dɨ buwaza miyaza faigan njai, a anka.

²³ To kwa ɗama muka tlahɨ ta sɨba miyatlɨn ka, nja dzɨgaza am tawe jaa ɗetlɨn kana? Da ga ndyam tlɨn matsir ka aɗɨm ama nji.

²⁴ Je gɨsa Yesu du, “Dɨma hamba zai jika na mɨmayu nda, nasɨmma rɨdla dlau fa Iko na Ghɨnsu wa.

²⁵ A dama kwa tlɨtlai sɨba miyatlɨnka, tlɨmma kɨna amu kuma tlɨmma tɨka amu, tlɨna dzigalɨn wan malaʻiku dɨna ghɨnsa

²⁶ Conakɨn ndɨra tlahɨ ta sɨba miyatlɨn ka, ase na kɨn ma wɨtɨ ɗe rɨdlɨ ta Musau nda? A ghama ɗɨngɨ tusɨ a tsakɨm, wane bɨlaya a Ghɨnsɨ a ndu, ‘Mɨnji Ghɨnsɨ na Ibrahim a Ishaku dɨfa Yakubu.’

²⁷ Tɨma Ghɨnsɨ na siba miyatlɨnu, ama ti na sɨba rayɨ. Na mɨmasu ndyamai.”

Doka ba ra gyarweti

²⁸ Wɨtɨ aɗe sɨba sɨnakɨ ɗe doka na Musa, je dikaya tlɨna ta takɨ atsafatlɨn, daga dɨkaya Yesu bɨlatlɨn sa ɗɨngɨ kwaya kwayaya. Je tsiyusa ndu, “Wena ji doka garna bara tɨrusɨ ndyama?”

²⁹ Je gɨsa Yesu du, “Bara gyarwatɨ ndyam ji, ʻDikayi hɨn Israʻila, Ghɨnsɨ Bakamma, Bakamma Ghɨnsɨ ndɨ wutɨ.

³⁰ Fa cama Ghɨnsɨ bakamfu a camfu wutɨ, ɨna ndyam rayifu, ɨna ndyam kalpufu, ɨna ndyam ɨna nineti na fu.’

³¹ Na tsɨraka ji: ʻFacama gyama tsɨgɨ tafu wane fiye cama ghamafu.’ Wi doka garna ba ra nakɨnkɨn maneyu a gyarwetu.”

³² Je gisa naka basɨnakɨ ɗe doka na Musa du, “Tɨkwasam, gaske watɨ nafu Basɨnakɨ. Fabɨla gaskewatɨ efiye ɗɨnga ndu Ghɨnsɨ Bakam tɨ ndɨ wutɨ, wi maiyu tamma tiyu.”

³³ Kuma gaskewatɨ efiye ɗɨnga ndu, fa camusɨ a camfu wutɨ, ɨna hankalifu, ɨna Kalpɨfu, fa cama gyama dzɨg tafu wane fiye cama ghamafu a rara ndyam zahɨya tɨr bana tsɨya ɗe ku ɨna papɨraka dlangɨrarau saar.

³⁴ Dage naya gɨsaka ɗɨngɨ tusa Yesu ma sɨnakɨ, je ɗɨngaya ndu, “Fama saar ɨna Gwalfu ta Ghɨnsu.” Aɗɨka wi marmanan kalpɨ ba dɨ tsiyusɨ ndɨra wɨhamu.

Tsiyakɨ Aghama Lai na Dauda

³⁵ Wokaci ba Yesu da ta gyagyiyakɨ ɗe Avuwa kan garna na Ghɨnsɨ je te tsɨya ndu, “Madɨzai sɨba sɨna doka na Musa da ɗɨnga ndu, Almasihu laina Dauda?”

³⁶ Dauda atuwaiwasɨ, aɗe kalpɨ na Ryuwan ma cartɨ, ɗɨnga ndu, “Bakam ɗɨnga Bakanwana ndu, ʻTsɨga kwa dara teʻeyuwun kwapa mɨn arfa ghama sɨba gabɨ nifu.” ’

³⁷ Dauda atuwaiwasɨ a zarya ndu, Bakanwan,To aɗɨn wankwa ji dɨsu lainusaya?” Sɨbɨ cass data dɨkayusɨ da lyekwau.

Yesu gɨta nzuya sɨba sɨnakɨ ɗe Doka na Musa

³⁸ Ɗe gyagikɨ tusɨ du ndu, “Ɗɨmi kɨɗa-kɨɗa ɨna sɨba sɨna kɨ ɗe rɨdlɨ ta Musa. Sɨba tlɨnda lu ndɨmaka kabɨ gyarya, tlɨnda lu da tɨre tlɨna kasu a sɨbɨ.

³⁹ Tlɨna lu e tsɨgɨ gyarya Bali ma pa ghan ta yahudawa, ɨna e wararau.

⁴⁰ Tlɨnji sɨbana kɨrma wihita tɨvan sɨba miya tlɨna dzafu nitlɨn, a cam cama tɨyaka gil kara karaya dama daa mɨmai tsɨmaya tlɨn. Tlɨn ji bi gɨma ɨna tluwar na Ghɨnsɨ garna.”

Tsahɨya sadakɨ ta gwardzaku

⁴¹ Yesu dɨ tsɨgusɨ mbatla e ara hambana paa mir ɗahɨ tɨda naya sɨbe na vaa mir ɗahɨ. Sɨba dukɨ cas data vaa mir natlɨn zhɨk ɗahɨ.

⁴² Wiya gwardzaku ma njɨima wihamu dɨ buwaza dɨbɨ vaa anini tsir ɗahɨ, ndɨ wana pɨra kwabo jika.

⁴³ Je zara sɨbana gyagiya tirusa Yesu du, “a gashi mɨna ta bɨlana hamba dɨ vaa taka gwardzaku ma kwa wihanka arara ndyam hamba dɨ vaa nikya sɨba dukɨ ka.

⁴⁴ Tlɨn fa a kɨɗa ɗe cassena na kam, njikɨn, a ɗe nzahɨ ta za, hamba njida tlɨnjika dɨ vaa ndyam ɨna hamba njide tau.”