Markus 10 - Miyawa

Gyagyiyakɨ ta Yesu a ghama bɨtaka am

¹ Je tlusa ɗika Yesu dɨ busa Pakɨ ta Yahudiya ɨna pɨlaka pakɨ ta madzɨ ta Urdum. Sɨbɨ dɨ mɨna pa ghamatlɨn atɨrusɨ, jete mɨna gyagiyatlɨn wane na tɨda ɗɨmau.

² Niwi Farisiyawa je buwatlɨna tirusɨ adama dɨ gwudzusɨ, je tsiyusa ndu, “Gansaɗa ji sɨn dɨ bɨta antusɨwa?”

³ Jete gɨsatlɨna ndu, “Musa bɨlana ndu ma?”

⁴ Je tlɨne ɗɨngaya ndu, “Musa tsa darhɨ dɨ rɨdla takarda ma tiya ore, dɨ bɨta amai.”

⁵ Yesu dɨ ɗɨnga tlɨna ndu, “Musa rɨdlana naka doka ka, adama kwahiya dɨkayaka yu tana.

⁶ Ama tun ata dzakwaka duniya, ʻGhɨnsɨ ghantlɨn, jifana ɨna am.

⁷ Adama wanka sɨma zuwazuwa bavɨrkusai ɨna ma vurkusai dɨ tlyapusa ta antusɨ.

⁸ Tlɨn tsirka dɨ dzɨgatlɨn tuwatu wutai.' Ata taka mukwuka, tlɨnma nan tsɨru, ama tuwatu wutɨ.

⁹ Adama wanka hamba dɨ ɗɨhɨna Ghɨnsɨka vɨrkɨ sɨn tabi bɨtau.”

¹⁰ Daga piya kamai, je tsɨyusa sɨba gyagiyakɨ niwasɨ a ghama taka ɗɨngɨka.

¹¹ Je ɗɨngatlɨna ndu, “Ndyam badɨ bɨta antusɨ dɨ kɨna wuyaka, tata ɗima kwacakɨ,

¹² Kabi zuwa juhu naza an dɨ kɨna wika, njata kwacakɨ ji ɨna ti.”

Yesu va gwur wutlɨmi

¹³ Niwi sɨbɨ dɨ buwe wutlɨmi nitlɨna tira Yesu adama dɨ aratlɨn kɨnwasa aghatlɨn, ama sɨba gyagiyakɨ niwasɨ dɨ hɨra tlɨnai.

¹⁴ Daga naya wanka Yesu, dɨ mbasayai, dɨ ɗinga sɨba gyagiyakɨ niwasɨ du, “Zuwi wɨtlɨmi dɨ buwatlɨna tiruwɨn, na ta hɨratlɨnayu, han Gwalfu ta Ghɨnsɨka ta vare tlɨn.

¹⁵ A gashi, mɨnata bɨlana, ndɨ ba a gɨsɨma gwalfu ta Ghɨnsɨ wan Le gaɓɨnauka, tɨma zusɨ ɗahu.”

¹⁶ Je tlɨrpatlɨna tuwusa Yesu, dɨ ara tlɨn kɨnwasɨ, dɨ vatlɨn gwur.

Bandzɨhɨ ba dukɨ.

¹⁷ Daga kuya darha Yesu , wisɨm dusukɨm amirai dɨ ɓugusa bɨɗusɨ, dɨ tsɨyusɨ du, “Basɨnakɨ ba gaskewatɨ, mɨna ɗɨmama ji mɨn mara rayi banakwa mbusa?”

¹⁸ Yesu dɨ ɗɨngaya ndu,“Madɨ zai fa zaruna ndu ba gaskewata? Ai wi ba gaskewatɨ maiyu tamma Ghɨnsu.

¹⁹ Fa sɨngan naka doka ka, fata tiya viya sɨmu, fata ɗɨma kwacaku, fata ɗɨma kiru, fata tsa sidɨ ba waku, fata ɗɨma mbɨrsu, fa tsa gyarwatɨ gharaho dzɨhɨ nafu, fa gharaho dzaku tafu.”

²⁰ Jete ɗɨnga Yesu du, “Basɨnkɨ, tɨn mɨndɨ le bandzɨhɨ, je mɨne mba ɗiyaka naka doka ka ndyamai.”

²¹ Yesu dɨ nayusɨ nayakɨ ma camakɨ, dɨ ɗingaya ndu, “Kutɨ wɨtɨ dɨ sɨlafu, taku, famɨtsa ndyam hamba fada tlɨn, fa tsa ni ndalga, fiyabi mara wiya duƙɨ dɨna ghɨnsa. Fa buwafu ɗɨ ɗɨyuwɨn.”

²² Dagabi dɨkaya ɗɨngɨ ta Yesu wa naka sɨnka dɨ mbasayai, dɨ busai, adama ti ba dukɨ casɨ.

²³ Je dzɨgusa Yesu dɨ naya sɨba gyagiyakɨ niwasɨ, dɨ ɗɨnga tlɨna ndu, “A kaitɨ ji ɗahɨ sɨba dukɨ dɨ ɗɨma hamba Ghɨnsɨ da lu.”

²⁴ Sɨba gyagiyakɨ niwasɨ dɨ naya-naya ghɨrɨ aghama ɗɨngɨ tusɨ. Ama Yesu dɨ mɨna ɗɨnga tlɨna ndu, “Hɨn wutlɨ niwan, a kaitɨ ji ɗahɨ sɨba dukɨ dɨ ɗɨma hamba Ghɨnsɨ da lu!

²⁵ Kwashɨ zirakɨ ta lakumi a ta gir liɓir, a ta badukɨ dɨ ɗɨma hamba Ghɨnsɨ da lu.”

²⁶ Je tlɨne naya ghɨrɨ ma ra taka, dɨ ɗɨngaya tsafaya tlɨn du, “Wajibi mara bir jikana?”

²⁷ Yesu dɨ naya tlɨn du, “Atira sɨm dɨma ɗɨma tlɨnu, ama a tira Ghɨnsɨ tlɨna ɗɨma tlɨn ɗɨmau, adama koweni kuteki tlɨna ɗɨmatlɨn ɗɨmau a tira Ghɨnsɨ.

²⁸ Je ɗɨngaya Bitrus du, “To ai mi zusu wihan ndyam hamba mida tlɨn, miɗiyafai.”

²⁹ Yesu du, “Agashɨ mɨna ta bɨlana, wi moyu ba dabi zuwa kam, ko dawanwasɨ tɨvam, ko dawanwasɨ dzafu, ko mavurkusɨ, ko bavurkusɨ ko wutlɨmɨ niwasɨ, ko shɨmamo tusɨ, adamuwɨn, ɨna ɗɨngɨ mapiyatɨ ta Ghɨnsɨ,

³⁰ dɨma kwa maraka mɨna hiyaya hamba ratlɨn ɗyela ghama ɗyel. Ɗe duniya takɨnkɨn ta mɨna mara na kamamo ɨna dawan tɨvan, ɨna dawan dzafu, ɨna gharaho tɨvan, ɨna witlimi, ɨna shimamo, ama atsatlina kaitɨ. A lahira kuma dɨ mara rayi bana kwambusɨ.

³¹ Ama ndyam sɨba tlɨndɨ vɨnahɨ tlɨna piya ta cɨɓi, ama ndyam sɨba tlɨndata cɨɓɨ tlɨna dzɨga tlɨn ni vɨnahɨ.

Yesu mɨna bɨla vare miyau ba tɨdabi ɗɨmau

³² Yesu ɨna sɨba gyagiyakɨ niwasɨ nda ta darhɨ ba bahiya Urushalima, tɨdɨ vɨna tlɨn Je kuya tlɨna ghɨri, niwi sɨba tlɨnda ta ɗɨyusɨ dɨ lakalakayu. Jete mɨna beɗusɨ ɨna nikya bahɨntsɨrka, dɨ dzakwa bɨlahiyatlɨn hamba dabi marusɨ yika.

³³ Du,“Naimakɨna ta bama Urushalima, abi tsa vɨrkɨ sɨma kɨn Fristoci gyaruni ɨna sɨbana gyagiya attaura, tlɨna ɓalaya hukunciya miyau, dɨ tsusa tira sɨba tlɨmma Yahudawau.

³⁴ Sɨba dabi ɗɨmaya vina dem, dɨ bɨtsaya nenikɨ, dɨ ɗɨmaya ti ta wiɗi, dɨ tɨya viyyusai, ama ata sɨnau nakida ka dɨ tlusai.”

Arau ta Yakubu ɨna Yohanna

³⁵ Je buwatlɨna ni Yakubu ɨna Yohanna wutlɨmi ni zebedi, dɨ ɗɨngaya ndu, “Basɨnakɨ, miyalu fa ɗɨmama ndyam hamba mi rawafu.”

³⁶ Jete ɗɨnga tlɨna ndu, “Hɨnalu mɨn ɗimana ma?”

³⁷ Je tlɨne gɨsaya ndu, “Sanku kwai,wutɨ aɗema dɨ tsɨgusɨ ate'eyafu wutɨ da ga'ai ɗe ngɨlangɨl tafu.

³⁸ Ama Yesu dɨ ɗɨngatlɨna ndu, “Nasɨmma hamba hɨnda rawau. Naga iya sa aɗe tlɨrkayabi ma mɨn dabi saa? Ko naga iya dɨ ɗɨmana baptisima avarai baptisima madabɨ ɗɨmanwa?”

³⁹ Je tlɨne gɨsaya ndu, “Miga iyau.” Je ɗɨnga tlɨna Yesuwa ndu, “Tlɨrkaya bii ma mɨnda bɨ sau, hɨna saa gan nji, Baptisima ma de ɗɨmanka, aɗɨmana ga nji.

⁴⁰ Ama a tsɨga ate'e yiwun ko a ga aiʻyiwun, dɨma mɨn ji ba mɨn de tsau. Ama na sɨba dɨ paratlɨna Ghɨnsɨ.”

⁴¹ Daga bɨ dɨkaya wanka sɨba gyagiyakɨ dirɓitin niwasɨka, dɨ dzakwa mbasahiya tlɨnai a ndɨra ni Yakubu ɨna Yohanna.

⁴² Yesu dɨ zara tlɨn ndyantlɨn ewutai dɨ ɗɨnga tlɨna ndu,“Na sɨngam sɨba gwalfu sɨba tlɨnma ɗemau acancama gɨraka kalpɨ aghama sɨbana ɗiyatlɨn ɨna gyaruni nitlɨn agɨra kalpa ghama sɨbɨ nitlɨn.

⁴³ Ama wanka ta dzakwaza tsafayanau. Ama ndɨ ba tɨda lu dɨ dzɨ gusɨ garna a ɗenaka, to lallai dɨ dzɨgusɨ ba can nana.

⁴⁴ Ba tɨda lu dɨ dzɨgusɨ garna nanaka, to kwafa dɨ dzɨgusɨ wan galudzɨhɨ nana ndyam.

⁴⁵ Adama ko tangan vɨrkɨsɨmma, a bɨtama dama sɨbɨ dɨ dzɨgatlɨn galughɨno niwasu, kwafa ti dɨ dzɨgusɨ galudzɨhɨ natlɨn, dɨ tsa rayiwasɨ adama pɨnaka sɨbɨ cassɨ.”

Yesu Lai dɨbako dzɨhɨ Bartimawas

⁴⁶ Dage tlɨne ɗama Yariko, Yesu ɨna sɨba gyagiyakɨ niwasɨ, ɨna niwi sɨbɨ cas, wi dɨbako dzɨhɨ, bana ɗɨma rau ba ngɨnusa ndu, Bartamawas, (wato ji “Lena timawus”), Dɨ je tsɨga ta vɨna darha ta rau.

⁴⁷ Dagabi dɨkaya ndu, Yesu na Nazaret jika, dɨ dzakwa tlahɨya mayusɨ da ɗɨnga ndu, “Yesu, Lena Dauda, taa kwaya luluwan!"

⁴⁸ Sɨbɨ cas dɨ gɨtlusɨ du ta makɨ nusɨ, ama dɨ daɗa tlahiya mayusɨ da ɗɨnga ndu, “Lena Dauda nai kwaya luluwan!”

⁴⁹ A ɗika Yesu dɨ tsɨrusɨ du,“zariya.” Je tlɨne zara dɨbako dzɨhɨka dɨ ɗɨngaya du, “Albishirnahu! Tlakwu, tɨsa ta zarafu.”

⁵⁰ Jete shɨɗa gwado tusɨ ɗika, dɨ vara dɨ busa tira Yesu.

⁵¹ Yesu dɨ tsiyusa ndu, “Fiya lu mɨn ɗɨmafuma?” Dɨbako dzɨhɨka du, “Basɨnakɨ, mɨna lu mɨn lai mɨn mara nayakayu!”

⁵² Yesu dɨ ɗɨngaya du, “Taku nafu tsahiya gasƙewatɨ nafu laifu sai, “Nda dlɨya dli dɨ lai dɨ mara naya ka yu wai, dɨ ɗiya Yesu dɨ batlɨ nai.”