Проповедник 4 - Библија: Стариот и Новиот Завет Константинов

Б. Жесток и неправеден живот 1. Солзи на угнетувани

¹ Пак почнав да ги набљудувам сите насилства што се прават под сонцето, и ете, солзи на угнетуваните, и никој нема да ги избрише; и насилствата на угнетувачката рака, а утешител нема за нив.

² Затоа ги сметам среќни мртвите што веќе умреле; посреќни се од живите што живеат уште.

³ А од едните и другите е посреќен оној кој уште не постои, кој не ги видел лошите дела што се прават под сонцето.

2. Труд без цел и осаменост

⁴ Натаму искусив дека секој напор и секој успех му прибавува на човекот завист од неговиот ближен. И тоа е суета и гонење на ветер.

⁵ Безумникот ги скрстува рацете и се јаде себеси.

⁶ Подобро е полн грст во мир отколку двата грста со мачен труд и мака во духот.

⁷ И уште една суета забележав под сонцето:

⁸ Човек сосем сам - без син, без брат, и пак нема крај на неговиот труд; очите не можат да му се наситат со богатство; а не мисли: за кого се трудам и си го скратувам доброто себеси? И тоа е суета и зло дело.

⁹ Подобро им е на двајцата отколку на еден, зашто имаат подобра плата за својот труд.

¹⁰ Ако падне едниот, другиот ќе го поткрене а тешко му на едниот! Ако падне, нема никој да го крене.

¹¹ Па и ако се спие двајца заедно потопло е; а како ќе се загрее самецот?

¹² И ако некој удри на едниот, двајцата ќе му се спротиват; и троструко јаже не се кине скоро.

3. Непостојаност на земните царства

¹³ Подобар е сиромашен младец а мудар, отколку стар цар а неразумен, кој веќе не знае за совет.

¹⁴ Зашто младецот може да излезе од темница и да стане цар, а тој и како цар да е роден пак ќе е сиромашен.

¹⁵ Забележав како сите кои живеат и одат под сонцето се определија за младецот, за настапникот кој ќе го наследи.

¹⁶ Тој стапува на чело на безбројните поданици и идните поколенија не можеа да се радуваат заради него. И тоа е суета и тежина на духот.

4. Вистинска побожност

¹⁷ Кога одиш во Божјиот дом, пази на своите чекори. Приближи се за да можеш подобро да слушаш - отколку да принесуваш жртва на лудиот, зашто нема број на сиот народ на сите тие, на кои им началствуваше, иако наследниците не ќе му се радуваат нему. Тие и не знаат дека прават зло.