Проповедник 12 - Библија: Стариот и Новиот Завет Константинов

3. Повик кон живиот Бог

¹ И спомнувај си за својот Создател во деновите на својата младост, пред да дојдат лоши денови и пред да пристигнат годините, кога ќе речеш: „Не ми се милеат.“

² Пред да се помрачат сонцето и светлината, месечината и ѕвездите, и да се вратат облаците по дождот.

³ Во денот кога затреперуваат чуварите на куќите и се наведнуваат јунаците, и се здодеваат мелничарките, зашто се премалку, и се помрачуваат оние кои гледаат низ прозорците;

⁴ кога се затвораат уличните врати, ослабува шумот на мелницата, кога стивнува пеењето на птиците и замруваат звуците на песната.

⁵ Кога патот надолу е мака, и секое излегување закана; а бадемот е во цутење, и скакулецот не скока веќе, и бадемовиот плод пука, зашто човекот си оди во својот вечен дом! А тажачките веќе се движат по улиците.

⁶ Пред да се скине сребрената врвца и се скрши златната светилка и се распарчи врчвата на изворот и се разбие тркалото над бунарот;

⁷ и се врати правот во земјата како што дојде од неа; а духот се врати при Бога, Кој го даде.

⁸ „Суета над суетите,“ вели Проповедникот, „сѐ е суета.“

ЗАКЛУЧОК: ЖИВОТ ВО СВЕТЛИНА НА ВЕЧНОСТ 12:9-14 А. Цел на Проповедникот

⁹ А освен тоа, зашто самиот Проповедник беше мудар, тој и народот го учеше на мудрост, па измери, проучи и состави многу мудри изреки.

¹⁰ Воедно Проповедникот се трудеше да најде прикладни зборови и да ја изрази направо вистината.

Б. Значение на Проповедниковите слова

¹¹ Беседите на мудрите луѓе се како остени и како закачени колци: пастирот се служи со нив за доброто на своето стадо.

¹² И на крај, сине мој, знај дека е потребно неизмерливо многу труд за да се напише книга, и дека многу учење го уморува телото.

В. Заклучен совет

¹³ Да го чуеме завршниот збор за сѐ: „Бој се од Бога, исполнувај ги Неговите заповеди, зашто во тоа е сѐ за човекот.“

¹⁴ Зашто сите скриени дела, било добри или зли, Бог ќе ги изведе на суд.