Проповедник 10 - Библија: Стариот и Новиот Завет Константинов

Б. Лажливост на сѐ на земја и гибел од глупост 1. Пропаст од глупост и помош од мудрост

¹ Пцовисаната мува го засмрдува мирисливото масло, а и малку лудост му ја расипува мудроста и честа на чесниот.

² Срцето на мудрецот е на десната страна, а на глупецот на левата.

³ Достатно е лудиот да тргне на пат: бидејќи нема разум, секому му покажува дека е луд.

⁴ Ако гневот на владетелот се подигне против тебе, не напуштај го своето место, зашто благоста ги спречува големите престапи.

⁵ Има зло што го видов под сонцето како престап што доаѓа од владетелот:

⁶ безумните се издигнуваат на највисоки места, а богатите заземаат ниски положаи.

⁷ Видов слуги на коњи, а кнезови кои одеа пеш како слуги.

⁸ Кој копа јама, паѓа во неа; кој разурнува ѕид, змија го каснува.

⁹ Кој крши камења, тоа го повредува; кој цепи дрва, може да настрада.

¹⁰ Кога ќе се затапи железото и неговата острица не е наострена, тогаш треба повеќе сила; а успехот е награда на мудроста.

¹¹ Ако змијата касне пред вражањето, тогаш вражачот ништо не користи.

2. Глупост на празно зборување

¹² Полни се со благодат зборовите од устата на мудрецот, а безумникот го упропастуваат неговите усни.

¹³ Тој ги почнува своите беседи со лудост и ги завршува со целосно безумство.

¹⁴ Лудакот зборува премногу: човекот не ја знае иднината, и кој може да му каже што ќе биде после него?

¹⁵ Лудите ги мори нивниот труд; зашто тие не знаат да отидат ни во градот.

3. Цар и кнезови

¹⁶ Тешко тебе земјо, кога ти е царот премлад и кога твоите кнезови се гостат веќе наутро.

¹⁷ Блазе ти, земјо, кога ти е царот син на благородник и кога твоите кнезови јадат на време, за да се поткрепат, а не да се испијанат.

¹⁸ Од мрзливост се свиткуваат гредите, заради негрижа прокапува куќата.

¹⁹ Но гозбите се заради забава, и виното го развеселува животот, а сребрениците набавуваат сѐ.

²⁰ Не колни го царот ни во својата мисла, не колни го богатиот ни во својата соба, зашто птиците ќе го однесат гласот и сѐ што е крилесто, ќе ја каже клеветата.