Плачот 5 - Библија: Стариот и Новиот Завет Константинов

ПЕТТА ТАЖАЧКА - ПРОРОКОВА МОЛИТВА ЗА ИЗРАЕЛ 5:1-22 А. Сознавање на Израелева грешност

¹ Спомни си Господи што нѐ најде, погледај, види го нашиот срам!

² Нашето наследство падна во рацете на странците, нашите домови им припаднаа на туѓинците.

³ Сирачиња сме: немаме татко, мајките ни се како вдовици.

⁴ Водата што ја пиеме ја плаќаме со сребреници, треба да платиме и за дрво.

⁵ Јаремот ни е на вратот, нѐ гонат, исцрпени сме, не нѐ оставаат да здивнеме.

⁶ Ги пружаме рацете кон Египет и Асирија за да се наситиме со леб.

⁷ Нашите татковци згрешија, и веќе ги нема, а ние ги носиме казните за нивните беззаконија.

⁸ Робови ни заповедаат а никој - да нѐ избави од нивните раце.

⁹ Го донесуваме својот леб излагајќи го животот на меч во пустината.

¹⁰ Кожата ни гори како вжарена печка, со треска од пламенот на гладта.

¹¹ Ги осквернија жените на Сион и девиците во јудејските градови.

¹² Со свои раце ги бесеа кнезовите, не ги почитуваа ни старечките лица.

¹³ Момчињата ги натераа да мелат, децата паѓаа под бремето на дрвата.

¹⁴ Старците ја оставија вратата, младите веќе не свират на лири.

¹⁵ Ја снема радоста од нашите срца, нашето играње се претвори во тажење.

¹⁶ Венецот падна од нашата глава, тешко ни нам што згрешивме!

¹⁷ Еве, зошто ни болува срцето, еве, зошто ни се покриваат очите:

¹⁸ затоа што опусте Сионската Гора и по неа скитаат шакали.

Б. Молитва за милост и помош

¹⁹ А Ти, Господи, остануваш за секогаш, Твојот престол е од колено до колено.

²⁰ Зошто да нѐ заборавиш за секогаш, да нѐ оставиш за долго време?

²¹ Врати нѐ кон себе, Господи, и ќе се обратиме. Обнови ги нашите денови како што беа некогаш.

²² Или сакаш да нѐ зафрлиш сосем и да се срдиш бескрајно на нас?