Матеј 8 - Библија: Стариот и Новиот Завет Константинов

Очистување на лепрозен

¹ А кога слезе од гората, големо мноштво Го следеше.

² И ете, еден лепрозен Му пристапи и падна пред Него ничкум, велејќи: „Господи, ако сакаш, можеш да ме очистиш.“

³ Тогаш Исус ја испружи својата рака и го допре, велејќи: „Сакам! Биди очистен!“ И веднаш се очисти неговата лепра.

⁴ И Исус му рече: „Гледај, никому да не му кажеш, туку оди, покажи му се на свештеникот и принеси го дарот, што го заповедал Мојсеј, ним за сведоштво.“

Исцелување на стотников слуга

⁵ А кога влезе Исус во Капернаум, Му пристапи еден стотник и Го молеше, велејќи:

⁶ “Господи, мојот слуга лежи фатен дома и многу се мачи.“

⁷ Исус му рече: „Јас ќе дојдам и ќе го исцелам.“

⁸ А стотникот во одговор му рече: „Господи, не сум достоен да влезеш под мојот покрив; туку кажи само збор и мојот слуга ќе биде исцелен.

⁹ Зашто исто и јас сум подвластен човек, и имам војници под себе; му кажувам на едниот: ‘Оди!’ и тој оди; и на другиот: ‘Дојди!’ - и доаѓа; а на својот слуга: ‘Направи го тоа!’ - и тој прави.

¹⁰ А кога Исус го чу тоа се зачуди и им рече на оние, кои Го следеа: „Вистина ви велам, во никого во Израел не најдов толкава вера.

¹¹ И ви велам дека мнозина ќе дојдат од исток и од запад, и ќе седнат со Авраама, Исака и Јакова во царството небесно;

¹² а синовите на царството ќе бидат фрлени во крајна темнина, каде ќе биде плач и чкртање на заби.“

¹³ И Исус му рече на стотникот: „Оди си, нека ти биде, како што си верувал.“ И неговиот слуга оздраве во истиот час.

Исцелувања во Капернаум

¹⁴ И кога Исус дојде во Петровиот дом, ја виде неговата тешта како лежи болна од треска.

¹⁵ Ја допре раката нејзина, и треската ја оста-ви, и таа стана и им служеше.

¹⁶ А кога настапи вечер, Му доведоа многу опфатени од демони. Тој со збор ги истера духовите и ги исцели сите болни.

¹⁷ За да се исполни кажаното преку пророкот Исаија, кој вели: „Тој ги зеде нашите слабости и ги понесе нашите болести.“

Следење на Христа

¹⁸ А кога Исус виде големо мноштво околу Себе, заповеда да отпловат на другата страна.

¹⁹ И пристапувајќи Му еден книжник Му рече: „Учителе, јас ќе Те следам каде и да одиш.“

²⁰ А Исус му рече: „Лисиците имаат легла и птиците небесни - гнезда, а Синот Човечки нема каде да ја положи главата.“

²¹ А друг од Неговите ученици Му рече: „Господи, дозво-ли ми најнапред да отидам и да го погребам татка си.“

²² А Исус му рече: „Следи Ме и остави ги мртвите да ги погребуваат своите мртовци.“

Стивнување на бура. Бесните Гадаринци

²³ И кога влезе во коработ, Неговите ученици Го следеа.

²⁴ И ете, голема бура се подигна во морето, така што брановите го покриваа коработ; а Тој спиеше.

²⁵ И Му пристапија учениците и Го разбудија, велејќи: „Господи, спаси нѐ! Загинуваме!“

²⁶ И им рече: „Зошто се боите, маловерни?“ Тогаш стана, ги прекори ветровите и морето, и настана голема тишина.

²⁷ А луѓето се зачудија и рекоа: „Каков е Овој, та и ветровите и морето Му се покоруваат!?“

²⁸ И кога дојде на другата страна, во Гадаринската земја, Го сретнаа двајца опседнати од демони, кои излегоа од гробовите, многу сви-репи, така што никој не можеше да помине по оној пат.

²⁹ И ете, извикаа, велејќи: „Што имаш со нас Ти, Исусе Сине Божји! Дали дојде ваму, за да нѐ измачуваш пред време?“

³⁰ А далеку од нив пасеше големо стадо свињи.

³¹ А демоните Го молеа, велејќи: „Ако нѐ изгониш, позволи ни да отидеме во свињите.“

³² И им рече: „Отидете!“ А тие излегоа и отидоа во свињите; и ете, целото стадо се стрча низ карпата во морето, и загина во водите.

³³ А свињарите побегнаа, и штом дојдоа во градот, известија за сѐ, и за она што им се случи на опседнатите.

³⁴ И ете, целиот град Му излезе во пресрет на Исуса, и кога Го видоа Го замолија да си отиде од нивниот крај.