Матеј 4 - Библија: Стариот и Новиот Завет Константинов

Исусово искушување

¹ Тогаш Духот Го одведе Исуса во пустината, за да биде искушуван од ѓаволот.

² И откако постеше четириесет дни и четири-есет ноќи, најпосле огладне.

³ Тогаш искушувачот Му пристапи и рече: „Ако си Божји Син, кажи овие камења да станат лебови!“

⁴ А Тој одговори и рече: „Напишано е: ‘Човекот не ќе живее само од леб, туку од секој збор, што излегува од устата на Бога’.“

⁵ Тогаш ѓаволот го одведе во Светиот Град, Го постави на крилото на Храмот,

⁶ и Му рече: „Ако си Божји Син, фрли се долу; зашто е напишано: ‘Ќе им заповеда на Своите ангели за Тебе, и ќе Те носат на раце, за да не Си ја удриш ногата на камен.’

⁷ Исус му рече: „Напишано е повторно: ‘Не искушувај Го Господа, твојот Бог’!“

⁸ Ѓаволот пак Го одведе на многу висока гора и Му ги покажа сите царства на светов и нивната слава,

⁹ и Му рече: „Ќе Ти го дадам сѐ ова ако паднеш и ми се поклониш.“

¹⁰ Тогаш Исус му рече: „Оди си, сатано, зашто е напишано: ‘На Господа, твојот Бог, ќе Му се по-клонуваш и ќе Му служиш само Нему!’“

¹¹ Тогаш ѓаволот Го остави и, ете, ангели дојдоа и Му служеа.

Почеток на работа во Галилеја

¹² А кога чу дека Јован е предаден, се повлече во Галилеја.

¹³ И откако го напушти Назарет, дојде и се насели во Капернаум, крај морето, во пределите Завулонови и Нефталимови,

¹⁴ за да се исполни она што го рече пророкот Исаија:

¹⁵ “Земјата Завулонова и земјата Нефталимова, на пат кон морето, од другата страна на Јордан, Галилеја на народите;

¹⁶ народот, кој седеше во темнина, виде голема Светлина, и на оние, кои седеа во пределот и сенката на смртта, на нив им изгреа Светлина.“

¹⁷ Оттогаш Исус почна да проповеда и да говори: „Покајте се, зашто царството небесно се приближи!“

¹⁸ А кога одеше покрај Галилеј-ското Море, ги виде двајцата браќа: Симона, наречен Петар, и брата му Андреја, дека фрлаа мрежа во морето, зашто беа ри-бари,

¹⁹ па им рече: „Дојдете по Мене и Јас ќе ве направам рибари на луѓе!“

²⁰ А тие веднаш ги оставија мрежите и Го следеа.

²¹ И кога отиде оттаму, виде натаму други двајца браќа: Јакова Заведеев и брата му Јована, во кораб со татка им Заведеј, како ги крпат своите мрежи, и ги повика.

²² И тие веднаш ги оставија коработ и татка си и Го следеа.

²³ И Исус обиколуваше по цела Галилеја, учејќи во нивните синагоги и проповедајќи го Еванге-лието за царството, и лекувајќи секаква болест и секаква немоќ меѓу народот.

²⁴ И се разнесе глас за Него по цела Сирија; и ги доведуваа при Него сите болни, кои страдаа од разни болести и маки, опфатени од демони, месечари и фатени, и ги излечи.

²⁵ И Го сле-деше големо мноштво од Галилеја и Десеттоградието, од Ерусалим и Јудеја, и отаде Јордан.