Матеј 28 - Библија: Стариот и Новиот Завет Константинов

Христово Воскресение

¹ А по саботата, на осамнување на првиот седмичен ден, дојдоа Марија Магдалена и другата Марија да го видат гробот.

² И ете, стана голем земјотрес, зашто Господов ангел слезе од небото, пристапи и го одмести каменот и седна на него.

³ А лицето му светеше како молња, а неговата облека - бела како снег.

⁴ Од страв пред него, стражарите трепереа и станаа како мртви.

⁵ Тогаш ангелот проговори и им рече на жените: „Вие не бојте се! Зашто знам дека Го барате распнатиот Исус.

⁶ Го нема тука, зашто воскресна, како што рече! Дојдете и видете го местото каде што лежеше,

⁷ и отидете бргу и кажете им на Неговите ученици дека воскресна од мртвите и - ете - Тој оди пред вас во Галилеја. Таму ќе Го видите! Ете, ви кажав!“

⁸ И тие излегоа веднаш од гробот, со страв и со голема радост, и отрчаа да им соопштат на Неговите ученици.

⁹ И ете, Исус ги пресретна и рече: „Здраво!“ А тие се приближија при Него, Му се фатија за Неговите нозе и Му се поклонија.

¹⁰ Тогаш Исус им рече: „Не бојте се! Одете и соопштете им на Моите браќа, да отидат во Галилеја; и таму ќе Ме видат.“

Апостолска мисија

¹¹ А кога одеа, ете, некои од стражарите дојдоа во градот и им соопштија на првосвештениците за сѐ што беше станало.

¹² И се состанаа со старешините, и се советуваа, и им дадоа на војниците многу сребреници

¹³ и им рекоа: „Кажете дека Неговите ученици дојдоа ноќе и Го украдоа, додека ние спиевме.

¹⁴ И ако за ова чуе управителот, ние ќе го убедиме и ќе ве направиме да немате грижа.“

¹⁵ А тие ги зедоа сребрениците и постапија, како што ги подучија. И тоа слово се разгласи меѓу Јудејците до денес.

¹⁶ А Единаесетте ученици отидоа во Галилеја, на гората, каде што им беше определил Исус.

¹⁷ И штом Го видоа, Му се поклонија, а некои се сомневаа.

¹⁸ Тогаш Исус им се приближи и им рече: „Дадена Ми е сета власт на небото и на земјата.

¹⁹ Затоа одете и направете од сите народи Мои ученици, крштавајќи ги во името на Таткото и Синот и Светиот Дух, учејќи ги да го чуваат сето она што ви го заповедав!

²⁰ И еве, Јас Сум со вас во сите дни до крајот на светот.