Марко 16 - Библија: Стариот и Новиот Завет Константинов

Исусово воскресение

¹ А кога мина саботата, Марија Магдалена, Марија Јаковова и Салома, купија мириси, за да дојдат и да Го помажат.

² И многу рано, во првиот ден на седмицата, дојдоа на гробот кога изгреваше сонцето.

³ И си зборуваа меѓу себе: „Кој ќе ни го одмести каменот од вратата на гробот?“

⁴ И кога погледаа, видоа дека каменот е одместен. Имено, беше многу голем.

⁵ А кога влегоа во гробот, видоа младич во долга бела облека, како седи оддесно и се зачудија.

⁶ Но тој им рече: „Не бојте се! Вие Го барате распнатиот Исус Наза-реецот. Воскресна! Не е тука! Еве го местото, каде што Го положија.

⁷ Туку одете и кажете им на Неговите ученици, и на Петра; дека ‘Тој отиде пред вас во Галилеја; таму ќе Го видите, како што ви рече.’“

⁸ А тие излегоа и побегнаа од гробот, зашто ги опфати трепет и страв. И никому ништо не рекоа, зашто се боеја. (

Исусово јавување

⁹ А кога воскресна рано, во првиот ден на седмицата, ѝ се јави прво на Марија Магдалена, од која беше истерал седум демони.

¹⁰ Таа отиде и им јави на оние, кои беа со Него - кои тагуваа и плачеа.

¹¹ А тие, кога чуја дека е жив и дека таа Го видела - не поверуваа.

¹² Потоа им се јави во друг лик, на двајца од нив, по патот, кога одеа во селото.

¹³ И тие отидоа и им јавија на другите; но и ним не им поверуваа.

Апостолска мисија. Вознесение

¹⁴ Најпосле им се јави и на Единаесетмината, додека беа покрај трпезата, и ги укори заради нивното неверие и закоравеноста на срцето, зашто не им поверуваа на оние, кои Го видоа воскреснат.

¹⁵ И им рече: „Одете по целиот свет и проповедајте го Евангелието на секое создание!

¹⁶ Кој ќе поверува и се крсти, ќе биде спасен; а кој не поверува, ќе биде осуден.

¹⁷ А овие знаци ќе ги придружуваат оние, кои поверувале: во Мое име ќе истеруваат зли духови; ќе зборуваат нови јазици;

¹⁸ ќе фаќаат змии; ако испијат и нешто смртоносно - нема да им напакости. Ќе полагаат раце на болни и тие ќе оздравуваат.

¹⁹ А Господ Исус, откако им го рече тоа, се вознесе на небо и седна оддесно на Бога.

²⁰ А тие излегоа и проповедаа насекаде; а Господ помагаше и го утврдуваше словото со знаци, кои го придружуваа. Амин!)