Лука 24 - Библија: Стариот и Новиот Завет Константинов

Воскресение

¹ А во првиот ден на седмицата, многу рано, жените дојдоа на гробот, носејќи ги мирисите, што ги приготвија.

² И го најдоа каменот одвален од гробот.

³ И кога влегоа, не го најдоа телото на Господа Исуса.

⁴ И додека стоеја збунети заради тоа, ете, пред нив застанаа двајца мажи во светли облеки.

⁵ Бидејќи беа уплашени ги наведнаа лицата кон земјата, а тие им рекоа: „Зошто Го барате Живиот меѓу мртвите?

⁶ Тој не е тука! Воскресна! Спомнете си како ви зборуваше, додека уште беше во Галилеја;

⁷ говорејќи: ‘дека Човечкиот Син треба да би-де предаден во рацете на греш-ниците и да биде распнат и да воскресне на третиот ден!’

⁸ И си ги спомнаа Неговите зборови.

⁹ И кога се вратија од гробот, им го соопштија сето тоа на Единаесет-мината и на сите други.

¹⁰ А тие беа: Марија Магдалена, и Јоана, и Марија Јакововата мајка, и други жени со нив; им го кажаа тоа на апостолите.

¹¹ А ним овие зборови им изгледаа како празна шега, и не им веруваа.

¹² А Петар стана и отрча до гробот се наведна и ги виде само ленените завои, и отиде назад, чудејќи се за она што се случило.

Исус им се јавува на два ученика

¹³ И ете, во истиот ден, двајца од нив одеа во едно село, наречено Емаус, оддалечено шеесет стадии од Ерусалим,

¹⁴ и разговараа меѓу себе за сите овие настани.

¹⁵ И додека тие разговараа и се запра-шуваа, Сам Исус им се приближи и одеше со нив.

¹⁶ Но на нивните очи не им беше дадено да Го препознаат.

¹⁷ И им рече: „Какви се тие зборови што ги водите патем меѓу себе и зошто сте нажалени?“

¹⁸ И едниот од нив, по име Клеопа, Му одговори и рече: „Дали си Ти единствениот странец во Ерусалим, Кој не знаеш, што се случило во него овие дни?“

¹⁹ И им рече: „Што?“ А тие Му рекоа: „Она што стана со Исуса Назареецот, Кој беше пророк силен на дело и во словото, пред Бога и пред целиот народ:

²⁰ како нашите свештенички глава-тари и старешини Го предадоа да биде осуден на смрт и Го распнаа,

²¹ А ние се надевавме дека е Тој Оној, Кој ќе го избави Израел. И покрај сето тоа, веќе е трет ден откако стана ова.

²² А нѐ збунија и некои жени од нашите, кои биле многу рано на гробот,

²³ и не го нашле Неговото тело; дојдоа и кажаа дека виделе и појава на ангели, кои им рекле дека Тој е жив.

²⁴ Некои од нашите отидоа до гробот и најдоа како што рекоа жените, но Него не Го виделе.“

²⁵ И Тој им рече: „О неразумни и спори во срце, за да верувате во сѐ што рекле пророците!

²⁶ Не требаше ли Христос да го претрпи тоа, и да влезе во Својата Слава?“

²⁷ И кога почна од Мојсеја и од сите пророци, им протолкува што е пишано за Него во целото Писмо.

²⁸ И кога се приближија до селото, во кое одеа, Тој се направи како да сака да оди натаму.

²⁹ Но, тие Го задржуваа, велејќи: „Остани со нас, зашто вечерта е близу, а денот веќе превали!“ И влезе да остане со нив.

³⁰ И додека беше прилегнат со нив покрај трпезата, зеде леб, благослови, го раскрши и им го даде.

³¹ Тогаш им се отворија очите и Го препознаа; но Тој стана невидлив за нив.

³² И си рекоа еден на друг: „Не гореше ли срцето во нас, кога ни зборуваше патем и ни ги толкуваше Писмата?“

³³ И во истиот час станаа и се вратија во Ерусалим, каде ги најдоа собрани Единаесетмината, и тие кои беа со нив,

³⁴ кои зборуваа: „Господ навис-тина воскресна; му се јавил на Симона!“

³⁵ А тие пак раскажаа што се случило патем и како Го препознаа при раскршувањето на лебот.

Исус им се јавува на апостолите. Вознесение

³⁶ И додека тие уште зборуваа за тоа, Сам Исус застана меѓу нив и им рече: „Мир вам!“

³⁷ А тие збунети и уплашени мислеа дека гледаат дух.

³⁸ А Тој им рече: „Зошто сте збунети? И зошто се јавуваат сомненија во вашите срца?

³⁹ Погледајте ги Моите раце и Моите нозе - Јас Сум Истиот! Допрете Ме и видете, зашто духот нема месо и коски, а како што гледате Јас имам.“

⁴⁰ И кога го рече тоа, им ги покажа рацете и нозете.

⁴¹ А бидејќи тие од радост уште не веруваа, туку се чудеа, им рече: „Имате ли тука нешто за јадење?“

⁴² И Му дадоа парче печена риба и мед со саќе.

⁴³ Тој го зеде и јадеше пред нив.

⁴⁴ И им рече: „Тоа се зборовите што ви ги зборував додека уште бев со вас, дека треба да се исполни сѐ што е напишано за Мене во Мојсеевиот Закон, во Пророците и во Псалмите.“

⁴⁵ Тогаш им го отвори умот, за да ги разберат Писмата,

⁴⁶ и им рече: „Така е напишано дека Христос треба да пострада и да воскресне од мртвите во третиот ден,

⁴⁷ и да биде проповедано во Негово име покајание и прошка на гревовите на сите народи - почнувајќи од Ерусалим.

⁴⁸ Вие сте сведоци на тоа;

⁴⁹ а еве, Јас ќе го испратам на вас ветувањето на Мојот Татко; а вие останете во градот, додека не се облечете во сила одозгора!“

⁵⁰ И ги изведе до Витанија; ги подигна Своите раце и ги благослови.

⁵¹ И додека ги благословуваше, се оддели од нив и се вознесе на небо.

⁵² А тие Му се поклонија и се вратија во Ерусалим со голема радост.

⁵³ И беа постојано во Храмот фалејќи Го и благословувајќи Го Бога. Амин!