Јован 2 - Библија: Стариот и Новиот Завет Константинов

Свадба во Кана Галилејска и прво чудо

¹ А на третиот ден имаше свад-ба во Кана Галилејска, и Исусовата мајка беше таму.

² Ги повикаа на свадбата и Исуса и Неговите ученици.

³ Кога сврши виното, Му рече на Исуса Неговата мајка: „Немаат вино.“

⁴ Исус ѝ одговори: „Што имам Јас со тебе, жено? Уште не дошол Мојот час.“

⁵ Неговата мајка им рече на слугите: „Што и да ви рече, направете.“

⁶ Таму имаше шест камени садови, според прописот за јудејското миење, што собираа по две до три мери.

⁷ Исус им рече: „Наполнете ги садовите со вода!“ И ги наполнија догоре.

⁸ Тогаш им рече: „Сега нацрпете и однесете му на старосватот!“ И му однесоа.

⁹ А кога старосватот вкуси од водата претворена во вино - а не знаеше од каде е, но знаеја слугите, кои црпеа од водата - го повика младоженецот

¹⁰ и му рече: „Секој чо-век најнапред го изнесува доброто вино, а кога ќе се поднапијат - слабото. Ти си го чувал доброто вино досега.“

¹¹ Ова го направи Исус во Кана Галилејска како почеток на чудесата и ја објави Својата слава; и Неговите ученици поверуваа во Него.

¹² Потоа слезе во Капернаум, Тој и мајка Му, и Неговите браќа, и Неговите ученици, и останаа таму неколку дена.

Протерување на трговци од Хра-мот

¹³ И беше близу јудејската Пасха и Исус се искачи во Ерусалим.

¹⁴ И ги најде во Храмот продавачите на волови, овци и гулаби и мену-вачите на сребреници - како седат таму.

¹⁵ Направи бич од јажиња и ги истера сите од Храмот, заедно со овците и воловите. На среброменувачите им ги истури сребрениците и им ги преврте масите.

¹⁶ А на оние, кои продаваа гулаби им рече: „Однесете го тоа оттука! Не правете трговска куќа од Домот на Мојот Татко!“

¹⁷ Него-вите ученици се сетија дека е напишано: „Ревноста за Твојот Дом Ме изеде.“

¹⁸ Тогаш Јудејците Го прашаа: „Со каков знак ни го докажуваш тоа што го правиш?“

¹⁹ А Исус им одговори и рече: „Разурнете го овој Храм, и ќе го подигнам за три дни!“

²⁰ Тогаш Јудејците рекоа: „Храмов е граден четириесет и шест години, а Ти за три дни ли ќе го подигнеш?“

²¹ Но Тој зборуваше за Храмот на Своето тело.

²² Кога воскресна, пак, од мртвите, Неговите ученици се сетија дека го рече тоа; па им поверуваа на Писмото и на зборот, што Исус им го рече.

²³ А кога беше во Ерусалим, на празникот Пасха, мнозина поверуваа во Неговото име, гледајќи ги знаците, што ги правеше.

²⁴ Но Самиот Исус не им се доверуваше, зашто ги познаваше сите,

²⁵ и немаше потреба некој да Му сведочи за човекот, зашто Самиот знаеше што има во човекот.