Исход 2 - Библија: Стариот и Новиот Завет Константинов

Мојсеј - Избавител

¹ Некој си човек од Левиевото колено отиде и се ожени со девојка Левијка.

² Жената зачна и роди син. Откако виде колку е красен, го криеше три месеци.

³ Кога не можеше веќе да го крие, набави кошница од папирусова трска, ја намачка со смола и катран, го стави детето во неа и го положи во трските на брегот на Реката.

⁴ Неговата сестра застана подалеку, да види што ќе биде со него.

⁵ Фараоновата ќерка слезе до Реката да се капи, додека нејзините слугинки шетаа по брегот на Реката. Таа ја забележа кошницата во трските, па ја испрати слугинката да ја донесе.

⁶ Ја отвори и погледа, а тоа во неа: дете! Машко чедо. Плачеше. Таа му се сожали. „Тоа ќе е еврејско дете“, рече.

⁷ Тогаш неговата сестра ѝ рече на фараоновата ќерка: „Сакаш ли да побарам доилка меѓу Еврејките, да ти го дои детето?“

⁸ „Оди!“ ѝ одговори фараоновата ќерка. Така девојката отиде и ја повика мајката на детето.

⁹ „Земи го детево - ѝ рече фараоновата ќерка - и одгледај ми го, а јас ќе те платам.“

¹⁰ Кога детето порасте, таа го доведе при фараоновата ќерка, која го посини. Му го даде името Мојсеј, „зашто го извадив - рече - од вода.“

¹¹ Еден ден, кога Мојсеј веќе беше порастен, дојде меѓу своите браќа и ги виде нивните маки. Тогаш забележа како еден Египетец бие еден Евреин - негов брат.

¹² Се заврте ваму-таму и откако виде дека нема никој, го уби Египетецот и го закопа во песокот.

¹³ Тој излезе и другиот ден и најде двајца Евреи како се тепаат. „Зошто го тепаш својот другар?“ - му рече на напаѓачот.

¹⁴ Овој му одговори: „Кој те постави за наш старешина и судија? Имаш ли намера да ме убиеш и мене, како што го уби оној Египетец?“ Мојсеј се исплаши и си рече во себе: „Така! Сепак се научило.“

¹⁵ Кога фараонот го чу тоа, сакаше да го погуби Мојсеја. Затоа Мојсеј избега од фараонот и се засолна во Мадијамската Земја. Таму седна покрај еден кладенец.

¹⁶ Мадијамскиот свештеник имаше седум ќерки. Тие дојдоа да нацрпат вода и да ги налеат поилата, за да го напојат стадото на својот татко.

¹⁷ Но дојдоа и пастирите и ги истераа. Мојсеј стана, ги одбрани и им го напои стадото.

¹⁸ Кога се вратија при својот татко Рагуил, тој ги праша: „Како се вративте денес толку брзо?“

¹⁹ Тие одговорија: „Еден Египетец нѐ одбрани од пастирите, и уште ни нацрпи вода и ни го напои стадото.“

²⁰ „Каде е? - ги праша тој своите ќерки. - Зошто го оставивте човекот? Повикајте го на ручек.“

²¹ Мојсеј се согласи да остане при човекот. Тој го ожени Мојсеја со својата ќерка Сепфора.

²² А кога таа роди син, тој му го даде името Гирсам, „зашто сум - рече - странец во туѓа земја.“

Разговор на Мојсеј со Бога

²³ По долго време почина египетскиот цар. Израелците уште стенкаа во ропство. Викаа, и нивниот повик за помош, среде ропството, се издигна до Бога.

²⁴ Бог го чу нивното викање за помош и се сети за Својот Завет со Авраама, Исака и Јакова.

²⁵ И Бог погледна на Израелците, и се зазеде за нив.