Евреите 5 - Библија: Стариот и Новиот Завет Константинов

¹ Зашто, секој првосвештеник, кој е избран од помеѓу луѓето, се поставува за луѓето, за да служи пред Бога, за да принесува дарови и жртви за гревовите,

² како оној кој може да биде благ кон оние кои не знаат и се заблудени, зашто и самиот е со слабост.

³ И заради тоа е должен да принесува жртви за гревовите, како за народот, така и за себеси.

⁴ И никој не ја зема оваа почест за себе, туку Бог го повикува, како и Арона.

⁵ Така и Христос не се прослави Сам Себеси за да биде Првосвештеник, туку Оној Кој Му рече: „Ти си Мој Син, Јас Те родив денес,“

⁶ како што Тој и на друго место вели: „Ти си свештеник довека по редот Мелхиседеков.“

⁷ Тој, во деновите на Своето тело, Му принесе молитви и молби со силно викање и солзи, на Оној Кој можеше да Го спаси од смрт, и беше чуен заради богобојазливоста.

⁸ Иако беше Син, ја научи послушноста од она што го претрпе

⁹ и откако се усоврши, им стана на сите кои Му се послушни, Повод за вечно спасение,

¹⁰ наречен од Бога Првосвештеник по редот Мелхиседеков.

Укорување на оние на кои им е испратено посланието

¹¹ За ова имаме да зборуваме многу, што е тешко да се протолкува зашто станавте мрзливи за слушање.

¹² Имено, според времето требаше да бидете учители; меѓутоа вам ви е пак потребно да ве учи некој на основните начела на Божјите пророчки зборови; и станавте такви што ви е потребно млеко, а не тврда храна.

¹³ Зашто секој, кој се храни со млеко, неискусен е во словото на правдата, зашто е младенец.

¹⁴ А тврдата храна е за полнолетните, кои преку навика, ги извежбале сетилата да разликуваат добро и зло.