Броеви 29 - Библија: Стариот и Новиот Завет Константинов

Паленици во ден на трубен звук (Ден на повикување)

¹ ‘Во седмиот месец, во првиот ден на месецот, имајте свое собрание. Не работите никаква работа! Тоа нека ви биде Ден на трубниот звук.

² Принесете паленица за пријатен мирис на Господа: еден јунец, еден овен и седум јагниња годиначиња без недостаток.

³ Нивниот лебен принос, од чисто брашно измешано со масло, нека биде: три десетини ефа на јунец, две десетини ефа на овен

⁴ и една десетина ефа на секое од седумте јагниња.

⁵ И еден јарец во жртва за грев, за ваше очистување.

⁶ Тоа нека биде - покрај паленицата на млада месечина и нејзиниот лебен принос; покрај секојдневната паленица и нејзиниот лебен принос, и покрај нивните налевници, според прописот - палена жртва за пријатен мирис на Господа.’

Паленици во ден на очистување

⁷ ‘А на десеттиот ден на седмиот месец имајте свето собрание; смирете ги вашите души и не работите никаква работа.

⁸ Принесете Му на Господа паленица за пријатен мирис: еден јунец, еден овен и седум едногодишни јагниња. Нека ви бидат без недостаток.

⁹ Нивниот лебен принос, од чисто брашно измешано со масло, нека биде: три десетини ефа на јунец, две десетини на овен

¹⁰ и една десетина ефа на секое од оние седум јагниња.

¹¹ И еден јарец во жртва за грев. Тоа е покрај: приносот за грев на Денот на очистувањето, покрај постојаната паленица и нејзиниот лебен принос и нивните налевници.’

Паленица во празник на Сеници

¹² ‘Во петнаесеттиот ден на седмиот месец имајте свето собрание. Не работите никаква работа. Седум денови прославувајте го празникот на Господа.

¹³ А за паленица, изгорена за пријатен мирис на Господа, принесете: тринаесет јунци, два овна и четиринаесет јагниња годиначиња. Нека бидат без недостаток.

¹⁴ Нивниот лебен принос, од чисто брашно измешано со масло, нека биде: три десетини ефа на секој од тринаесетте јунци, две десетини ефа на секој од двата овна

¹⁵ и една десетина ефа на секое од четиринаесетте јагниња. И еден јарец во принос за грев.

¹⁶ Тоа нека биде освен секојдневната паленица, нејзините лебни приноси и нејзините налевници.

¹⁷ Во вториот ден: дванаесет јунци, два овна, четиринаесет едногодишни јагниња без недостаток.

¹⁸ Нивниот лебен принос и нивната налевница принесете ги, по правилникот, според бројот на јунците, овните и јагнињата.

¹⁹ И еден јарец во принос за грев, освен секојдневната паленица, нејзиниот лебен принос и нејзините налевници.

²⁰ Во третиот ден: единаесет јунци, два овна и четиринаесет јагниња годиначиња без недостаток.

²¹ Нивниот лебен принос и нивните налевници принесете ги, по правилникот, според бројот на јунците, овните и јагнињата.

²² И еден јарец во принос за грев, освен секојдневната паленица, нејзиниот лебен принос и нејзината налевница.

²³ Во четвртиот ден: десет јунци, два овна, четиринаесет едногодишни јагниња без недостаток.

²⁴ Нивниот лебен принос и нивните налевници принесете ги, по правилникот, според бројот на јунците, овните и јагнињата.

²⁵ И еден јарец во принос за грев, освен секојдневната паленица, нејзиниот лебен принос и нејзината налевница.

²⁶ Во петтиот ден: девет јунци, два овна, четиринаесет едногодишни јагниња без недостаток.

²⁷ Нивниот лебен принос и нивните налевници принесете ги, по правилникот, според бројот на јунците, овните и јагнињата.

²⁸ И еден јарец во принос за грев, освен секојдневната паленица, нејзиниот лебен принос и нејзината налевница.

²⁹ Во шестиот ден: осум јунци, два овни, четиринаесет едногодишни јагниња без недостаток.

³⁰ Нивниот лебен принос и нивната налевница принесете ги, по правилникот, според бројот на јунците, овните и јагнињата.

³¹ И еден јарец во принос за грев, освен секојдневната паленица, нејзиниот лебен принос и нејзината налевница.

³² Во седмиот ден: седум јунци, два овна, четиринаесет јагниња годиначиња без недостаток.

³³ Нивниот лебен принос и нивните налевници принесете ги, по правилникот, според бројот на јунците, овните и јагнињата.

³⁴ И еден јарец во принос за грев, освен секојдневната паленица, нејзиниот лебен принос и нејзината налевница.

³⁵ Во осмиот ден имајте славно собрание. Не работите никаква работа.

³⁶ А за паленица, изгорена за благоугоден мирис на Господа, принесете: еден јунец, еден овен и седум едногодишни јагниња без недостаток.

³⁷ Нивниот лебен принос и нивните налевници принесете ги, по правилникот, според бројот на јунците, овните и јагнињата.

³⁸ И еден јарец во принос за грев, освен секојдневната паленица, нејзиниот лебен принос и нејзината налевница.

³⁹ Принесувајте Му го тоа на Господа на вашите празници, освен вашите заветници и освен вашите доброволни жртви; освен вашите паленици, лебни приноси и налевници и освен вашите помирителни жртви.’“

⁴⁰ Мојсеј им кажа на Израелевите синови сѐ што Господ му заповеда.