Броеви 15 - Библија: Стариот и Новиот Завет Константинов

Лебни приноси

¹ Господ му рече на Мојсеја:

² „Зборувај им на Израелевите синови и речи им: ‘Кога ќе влезете во земјата во која ќе живеете и која Јас ви ја давам,

³ и кога ќе почнете да Му принесувате жртва на Господа: паленица или закланица, жртва заветница или доброволна, или принос по повод вашите празници - правејќи така од крупниот или од ситниот добиток пријатен мирис за Господа -

⁴ жртвоприносникот нека го принесе својот дар на Господа: лебен принос од десет ефи чисто брашно, измешано со четврт ин масло.

⁵ Покрај паленицата или покрај закланицата принеси четвртина ин вино за налевница на секое јагне.

⁶ А принесувајќи овен, принеси и лебен принос: две десетини ефи пченично чисто брашно, измешано со една третина ин масло;

⁷ принеси и вино за налевница третина ин за благоугоден мирис на Господа.

⁸ Ако Му принесуваш на Господа јунец како паленица или како закланица, за да исполниш завет или како помирителна жртва,

⁹ тогаш покрај јунецот нека се принесат: три десетини ефа пченично чисто брашно, измешано со половина ин масло,

¹⁰ а за налевница принеси половина ин вино, како паленица за пријатен мирис на Господа.’

¹¹ ‘Така нека се постапи при секое принесување на вол, на овен, и на секоја глава ситен добиток, овца или коза:

¹² колку и да ги принесете, направете така за секое одделно, според нивниот број.

¹³ Секој роден во татковината нека постапува вака, кога принесува палена жртва за пријатен мирис на Господа.

¹⁴ И ако некој туѓинец, кој живее среде вас, или ќе биде среде вашите потомци, посака да принесе паленица за благоугоден мирис на Господа, нека прави така како што правите и вие.

¹⁵ Нека е еден закон и за вас и за туѓинецот, кој живее среде вас. Тоа е вечен закон за вашите поколенија: пред Господа, како што е со вас, така нека биде и со странецот, кој живее среде вас.

¹⁶ Еден закон и една заповед да е за вас и за туѓинецот кој е придојден меѓу вас.’“

Воздигнат принос на Господа

¹⁷ Господ му рече на Мојсеја:

¹⁸ „Зборувај им на Израелевите синови и речи им: ‘Кога ќе дојдете во земјата во која ве водам,

¹⁹ и кога ќе го јадете лебот на таа земја, принесете Му воздигнат принос на Господа.

²⁰ Како првина од своето тесто принесете еден колач како воздигнат принос; принесете го како и воздигнат принос од гумното.

²¹ Од првините на своето тесто давајте Му на Господа воздигнат принос од поколение до поколение.’

Жртва за грев од незнаење

²² ‘Ако згрешите неволно и не исполнувате некоја од заповедите што Господ ги соопшти преку Мојсеја -

²³ сѐ што Господ ви нареди преку Мојсеја, оттогаш кога ви ги даде заповедите па натаму од колено до колено -

²⁴ тогаш: ако е направено тоа поради невнимание скришно од општеството, целото општество нека принесе еден јунец како паленица за пријатен мирис на Господа со лебен принос и со налевница, според правилникот, и еден јарец во жртва за грев.

²⁵ И свештеникот ќе направи покривање на гревот за целото општество на Израелевите синови, па ќе им биде простено; зашто тоа беше грешка, а тие го принесоа својот дар - палена жртва на Господа - и принос за грев пред Господа за своето невнимание.

²⁶ Ќе ѝ биде простено на сета израелска заедница, а така и на странецот, кој живее среде нив, зашто целиот народ згреши од незнаење.’

²⁷ ‘Ако згреши поединец од незнаење, нека принесе едно женско јаре годиначе како жртва за грев.

²⁸ И свештеникот ќе направи покривање на гревот за човекот, кој згрешил неволно од незнаење, и ќе биде чист, и ќе му биде простено.

²⁹ Кога некој ќе згреши од невнимание, нека ви важи еден закон и за домородецот и за странецот, кој живее среде вас.

³⁰ Но оној кој направи нешто волно, било да е роден во татковината или странец, тој хули на Господа. Таквиот нека биде истребен од својот народ,

³¹ зашто го презре Господовото слово и ја прекрши Неговата заповед. Таквиот нека биде истребен. Неговата вина нека падне на него!’“

³² Кога Израелевите синови беа во пустината, најдоа човек како бере дрва во саботен ден.

³³ И тие, кои го најдоа дека бере дрва, го доведоа при Мојсеја и Арона и при целото општество.

³⁴ Го ставија под стража, зашто уште не беше одредено што треба да се прави со него.

³⁵ „Човекот треба да биде погубен! - му рече Господ на Мојсеја. Сето општество нека го затрупа со камења надвор од логорот.“

³⁶ Целата заедница го изведе надвор од логорот и го каменува, и тој загина, како што Господ му заповеда на Мојсеја.

³⁷ Господ му рече на Мојсеја:

³⁸ „Зборувај им на Израелевите синови и речи им: Нека прават реси на рабовите на своите облеки, од род до род; а за ресата на секој раб нека врзуваат сина врвца.

³⁹ Ќе имате реси за да ве потсетува погледот врз нив на сите Господови заповеди. Исполнувајте ги, а не се занесувајте со своето срце и со своите очи што толку лесно ве заведуваат во неверие.

⁴⁰ Така ќе си спомнувате за сите Мои заповеди, ќе ги исполнувате и ќе бидете свети пред вашиот Бог.

⁴¹ Јас Сум Господ, вашиот Бог, Кој ве изведе од Египетската Земја за да ви бидам Бог. Јас, Господ, вашиот Бог.“