Матеј 28 - Свето Евангелие 2008

ГЛАВА 28 (Зачало 115)

¹ Кога измина саботата, на осамнување, во првиот ден од седмицата, дојдоа Марија Магдалина и другата Марија, да го видат гробот.

² И ете, стана голем потрес: ангел Господов слезе од небото, пристапи, го оттргна каменот од гробната врата и седеше на него;

³ лицето му беше како молња, а алиштата – бели како снег;

⁴ и стражарите, уплашени од него, трепереа и беа како мртви.

⁵ Ангелот се заврте кон жените и им рече: – Не плашете се; знам дека Го барате Исуса Распнатиот;

⁶ не е овде, воскресна, како што беше рекол. Дојдете и видете го местото, каде што лежел Господ,

⁷ па отидете побргу и кажете им на учениците Негови дека Он воскресна од мртвите. И ете, ќе отиде во Галилеја, порано од вас; таму ќе Го видите. – Ете, ви кажав.

⁸ И откако излегоа набрзина од гробот, тие со страв и голема радост отрчаа да им соопштат на учениците Негови.

⁹ Кога одеа да им јават на Неговите ученици, ете, Исус ги сретна и рече: – Радувајте се! Крај на предутреното евангелие на Велигден А тие се приближија, се фатија за нозете Негови и Му се поклонија;

¹⁰ тогаш Исус им рече: – Не плашете се; одете и соопштете им на браќата Мои, да отидат во Галилеја, и таму ќе Ме видат.

¹¹ Кога одеа тие, ете, некои од стражарите, влегувајќи в град, им кажаа на првосвештениците за сето она што беше се случило.

¹² И тие, кога се собраа со старешините и направија совет, им дадоа многу пари на војниците,

¹³ велејќи: – кажете дека учениците Негови дојдоа и Го украдоа, кога ние спиевме;

¹⁴ и, ако за тоа чуе управникот, ние ќе го смириме и ќе направиме и вам ништо да не ви се случи.

¹⁵ А тие ги зедоа парите и направија, како што беа подучени. И тој глас се пренесува меѓу Јудејците и до ден-денеска.

(Зачало 116)

¹⁶ Аединаесетте ученици отидоа во Галилеја, во гората, каде што им беше заповедал Исус;

¹⁷ па штом Го видоа, Му се поклонија; а некои се сомневаа.

¹⁸ А Исус, кога се приближи, им проговори, велејќи: – Ми се даде секаква власт на небото и на земјата.

¹⁹ Одете и научете ги сите народи, крштевајќи ги во името на Отецот, и Синот, и Светиот Дух,

²⁰ и, учејќи ги да пазат сѐ што сум ви заповедал; и ете, Јас сум со вас преку сите дни, до крајот на светот. – Амин! Крај на Велика Сабота и на првото воскресно евангелие.